കേന്ദ്രസര്ക്കാരിന്റെ പുതിയ സിവില് വ്യോമയാന നയം: ഇന്ധന നികുതിയും സേവന നികുതിയും പൂര്ണമായി ഒഴിവാക്കുന്നു, വിമാന നിരക്കുകള് പകുതിയാക്കും
കേന്ദ്രസര്ക്കാരിന്റെ പുതിയ സിവില് വ്യോമയാന നയത്തിന്റെ അടിസ്ഥാനത്തില് ഇന്ധന നികുതിയും സേവന നികുതിയും പൂര്ണമായി ഒഴിവാക്കും. കൂടാതെ ആഭ്യന്തര വിമാനയാത്രയ്ക്ക് വേണ്ടിവരുന്ന ചെലവ് പകുതിയായി കുറയ്ക്കുകയും ചെയ്യും. വിമാനക്കമ്പനികള് തയ്യാറാകുകയാണെങ്കില് നികുതി ഒഴിവാക്കുമ്പോള് ടിക്കറ്റ് ചാര്ജ് ആനുപാതികമായി വര്ദ്ധിപ്പിക്കാതിരുന്നാല് ടിക്കറ്റ് നിരക്ക് നിലവിലുള്ളതിന്റെ പകുതിയായി കുറയ്ക്കാന് കഴിയും. കേന്ദ്ര സര്ക്കാരിന്റെ ആനുകൂല്യം സ്വന്തമാക്കാന് കമ്പനികള് തീരുമാനിച്ചാല് യാത്രക്കാരുടെ പ്രതീക്ഷക്ക് വകയില്ലാതാകും. എന്തായാലും ഇതിന് വിമാനക്കമ്പിനികളെ അനുവദിക്കുകയില്ല എന്നാണ് കേന്ദ്ര സര്ക്കാര് നല്കുന്ന സൂചന.
യാത്രാചെലവിന്റെ നിരക്കില് അയ്യായിരം രൂപയോളം ഇന്ധനനികുതിയുടെ പേരിലുള്ള എയര്സര്വീസ് ചാര്ജാണ്. ഇതിന് പുറമേ 5.6 ശതമാനം സര്വീസ് ടാക്സും കൂടാതെ മറ്റ് നികുതികളുമാണ് ഈടാക്കുന്നത്. പുതിയ നിര്ദ്ദേശം നടപ്പാക്കുകയാണെങ്കില് തിരുവനന്തപുരത്തുനിന്ന് ചെന്നൈ, മുംബയ്, കൊച്ചി, ബംഗളുരു തുടങ്ങിയ സ്ഥലങ്ങളിലേക്ക് എ.സി ട്രെയിന് നിരക്കിന് അല്പം കൂടിയ നിരക്കില് വിമാനത്തില് യാത്ര ചെയ്യാന് കഴിയും. വിദേശരാജ്യങ്ങളിലെപ്പോലെ ആഭ്യന്തര യാത്രാമേഖലയില് വിമാനയാത്രയ്ക്ക് കൂടുതല് പ്രാമുഖ്യം നല്കിയുള്ള പദ്ധതികളാണ് തയ്യാറാക്കുന്നത്. ഒരു മണിക്കൂര് വ്യോമദൈര്ഘ്യമുള്ള സ്ഥലങ്ങളില് നികുതിയുള്പ്പെടെ ടിക്കറ്റ് നിരക്ക് 2500 രൂപയില് ഒതുക്കുന്നതിനുള്ള സാദ്ധ്യതകളാണ് സര്ക്കാര് തേടുന്നത്. രാജ്യത്ത് 430 വിമാനത്താവളങ്ങളാണുള്ളത്. ഇതില് 90 വിമാനത്താവളങ്ങളാണ് നിലവില് പ്രവര്ത്തിക്കുന്നത്. ബാക്കി വിമാനത്താവളങ്ങള് വികസിപ്പിക്കുന്നതിന് 50 കോടി രൂപയുടെ പാക്കേജും ബഡ്ജറ്റില് ഉള്പ്പെടുത്തിയേക്കും. കിങ് ഫിഷറും ഡെക്കാന് എയര്വേസും പോലെ കുറഞ്ഞ നിരക്കില് വിമാനയാത്രാസൗകര്യം നല്കാന് മുന്നോട്ടുവന്ന സ്ഥാപനങ്ങളെ നഷ്ടത്തിലെത്തിച്ചത് ജെറ്റ് ഫ്യൂവല് നികുതിയിലെ വന് ബാദ്ധ്യതയാണ്. ഇത് തിരിച്ചറിഞ്ഞാണ് നയം മാറ്റം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
