ഇന്തോനേഷ്യയില് പിടിയിലായ ഛോട്ടാ രാജനെ ഇന്ന് ഇന്ത്യയിലെത്തിക്കും, നടപടിക്രമങ്ങള് പൂര്ത്തിയാകുന്നു
ബാലി വിമാനത്താവളത്തിലെ പ്രവര്ത്തനങ്ങള് പുനഃരാരംഭിച്ചതിനാല് ഇന്തോനേഷ്യയില് പിടിയിലായ മുംബയ് അധോലോക നായകന് ഛോട്ടാ രാജന് എന്ന രാജേന്ദ്ര സദാശിവ് നികാല്ജിയെ ഇന്ന് ഇന്ത്യയിലെത്തിക്കും. ഇതിനായുള്ള നടപടിക്രമങ്ങള് പൂര്ത്തിയായിവരുന്നു. രാജനെ ഇന്തൊനീഷ്യയിലെ ബാലിയിലുള്ള ഡെന്പസാര് പൊലീസ് സ്റ്റേഷനിലെത്തിച്ചു. കാലാവസ്ഥ അനുകൂലമാണെന്ന് വിമാനത്താവള അധികൃതര് അറിയിച്ചതായി മുതിര്ന്ന ഇന്റര്പോള് ഓഫിസര് യാനുവാരി ഇന്സാന് അറിയിച്ചു. ഇന്നു രാത്രിയോടെ രാജനെ ഇന്ത്യയിലെത്തിക്കാനാകും.
ജയിലില് നിന്നു പുറത്തെത്തിച്ച രാജനെ ബുള്ളറ്റ്പ്രൂഫ് വാഹനത്തിലാണ് വിമാനത്താവളത്തിലേക്കു കൊണ്ടുപോകുന്നത്. ഡെന്പാസറില് നിന്നു വിമാനത്താവളത്തിലേക്ക് രാജനെ കൊണ്ടുപോകുന്ന വാഹനത്തെ ക്വിക്ക് റെസ്പോണ്സ് സംഘം അനുഗമിക്കും. റിന്ജാനി അഗ്നിപര്വതം പൊട്ടിയതിനെ തുടര്ന്ന് ബാലിയില് ആകാശം പുകകൊണ്ടു മൂടിയിരുന്നു. അതിനാല് ചൊവ്വ വൈകുന്നേരം മുതല് വിമാനത്താവളം അടച്ചിട്ടിരിക്കുകയായിരുന്നു.
പ്രത്യേക വിമാനത്തിലായിരിക്കും രാജനെ ഇന്ത്യയിലെത്തിക്കുക. സിബിഐ, ഡല്ഹി, മുംബൈ പൊലീസ് ഉദ്യോഗസ്ഥര് എന്നിവരടങ്ങിയ സംഘം ഞായറാഴ്ചയാണ് ബാലിയിലെത്തിയത്. കഴിഞ്ഞ മാസം 25നായിരുന്നു രാജനെ അറസ്റ്റ് ചെയ്തത്. സിഡ്നിയില് നിന്ന് ഇന്തോനേഷ്യയിലെ ബാലിയിലേക്ക് വിമാനയാത്ര നടത്തുമ്പോഴാണ് രാജന് പിടിയിലായത്. കളളപ്പേരില് ഓസ്ട്രേലിയയില് കഴിയുകയായിരുന്ന രാജനെക്കുറിച്ച് ഓസ്ട്രേലിയന് പോലീസാണ് ജക്കാര്ത്ത പോലീസിനെ വിവരമറിയിച്ചത്. മുംബൈയില് മാത്രം 20ല് അധികം കൊലപാതക കേസുകള് ഉള്പ്പെടെ 75ല് പരം കേസുകള് ഛോട്ടാ രാജന്റെ പേരിലുണ്ട്. ഡല്ഹി, ലക്നൗ, ഉത്തര് പ്രദേശ് എന്നിവിടങ്ങളിലും കേസുകള് റജിസ്റ്റര് ചെയ്തിട്ടുണ്ട്.
ഇന്ത്യയിലെത്തിക്കുന്ന രാജനെ ആദ്യം ഡല്ഹിയില് സിബിഐ കസ്റ്റഡിയിലായിരിക്കും പാര്പ്പിക്കുക. പിന്നീടാണ് മുംബൈ, ഡല്ഹി പൊലീസിനു കൈമാറുന്ന കാര്യം പരിഗണിക്കുക. സിബിഐ കേന്ദ്ര ആസ്ഥാനത്ത് സുരക്ഷാ ക്രമീകരണങ്ങള് ശക്തിപ്പെടുത്തി. പിടികിട്ടാപ്പുള്ളി ദാവൂദ് ഇബ്രാഹിമിന്റെ വധഭീഷണി നിലനില്ക്കുന്നതിനാല് രാജനെ കൊണ്ടുവരുന്നതിനും ഇന്ത്യയിലെത്തിച്ചാല് പാര്പ്പിക്കുന്നതിനും കനത്ത സുരക്ഷാ സന്നാഹമാണ് കേന്ദ്രം ഒരുക്കിയിരിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
