ഉഭയ സമ്മതപ്രകാരമുള്ള സ്വവര്‍ഗ ലൈംഗികത കുറ്റകരമല്ലാതാക്കാന്‍ ഉദ്ദേശിച്ചുള്ള ശശി തരൂര്‍ എം.പിയുടെ സ്വകാര്യബില്‍ ലോകസഭ തള്ളി. ഇത്തരം അസഹിഷ്ണുതയില്‍ അദ്ഭുതം തോന്നിയെന്ന് തരൂര്‍ പ്രതികരിച്ചു. സ്വവര്‍ഗ ലൈംഗികത ക്രിമിനല്‍ കുറ്റമാക്കുന്ന ഇന്ത്യന്‍ ശിക്ഷാനിയമത്തിലെ 377-ാം വകുപ്പില്‍ ഭേദഗതി വരുത്താനുള്ള ബില്ലാണ് സഭ വോട്ടിനിട്ട് തള്ളിയത്.

പ്രകൃതിനിയമത്തിന് വിരുദ്ധമായി ആണിനോടോ പെണ്ണിനോടോ ജീവിയോടോ ഉള്ള ലൈംഗികബന്ധം ക്രിമിനല്‍ കുറ്റമാണെന്നാണ് 377-ാം വകുപ്പ് പറയുന്നത്. ചുരുക്കത്തില്‍ സ്വവര്‍ഗ ലൈംഗികതയെ നിരോധിക്കുന്നതാണ് വകുപ്പ്.

പാര്‍ലമെന്റിലെ നിയമനിര്‍മ്മാണത്തിലൂടെ മാത്രമേ വകുപ്പില്‍ ഭേദഗതി വരുത്താനാകൂ എന്ന് 2013-ല്‍ സുപ്രീംകോടതി വിധിച്ചിരുന്നതാണ്. ഈ വകുപ്പ് അസാധുവാക്കുന്ന 2009-ലെ കീഴ്‌ക്കോടതി വിധിയ്‌ക്കെതിരെയാണ് പരമോന്നത കോടതി നിലപാട് വ്യക്തമാക്കിയത്.

സമ്മതമില്ലാതെയോ, പ്രായപൂര്‍ത്തിയാകാത്തവരുമായോ ഉള്ള ലൈംഗിക ബന്ധം മാത്രം കുറ്റകരമാകത്തക്ക വിധം 377-ാംവകുപ്പില്‍ മാറ്റം വരുത്തണമെന്നാണ് തരൂരിന്റെ ബില്‍ ആവശ്യപ്പെട്ടത്.

ബില്‍ പാസാക്കുന്നതിന് പിന്തുണ തേടാന്‍ സമയമുണ്ടായിരുന്നില്ലെന്നും ഭാവിയില്‍ വീണ്ടും അവതരിപ്പിക്കുമെന്നും തരൂര്‍ ട്വീറ്റില്‍ പറഞ്ഞു. ഒരിക്കല്‍ അവതരിപ്പിച്ച് പാസാക്കുക തന്നെ ചെയ്യുമെന്നും അദ്ദേഹം പ്രത്യാശ പ്രകടിപ്പിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha