500 വര്ഷങ്ങള്ക്ക് ശേഷം രാമജന്മഭൂമി തിരിച്ചെടുക്കാന് കഴിയുമെങ്കില് സിന്ധുവിനെ തിരികെ പിടിക്കാന് ഇന്ത്യയ്ക്ക് ഒരു കാരണവും വേണ്ടെന്ന് യോഗി
500 വര്ഷങ്ങള്ക്ക് ശേഷം ശ്രീരാമജന്മഭൂമി തിരിച്ചുപിടിക്കാന് കഴിയുമെങ്കില്, ഇപ്പോള് പാകിസ്ഥാനിലുള്ള സിന്ധ് പ്രവിശ്യയായ സിന്ധുവിനെ തിരികെ പിടിക്കാന് ഇന്ത്യയ്ക്ക് ഒരു കാരണവും വേണ്ടെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്. 500 വര്ഷങ്ങള്ക്ക് ശേഷം അയോധ്യയില് ശ്രീരാമന്റെ മഹത്തായ ക്ഷേത്രം നിര്മിക്കുകയാണ്. ജനുവരിയില് രാംലാലയെ പ്രധാനമന്ത്രി വീണ്ടും ക്ഷേത്രത്തില് ഇരുത്തുമെന്ന് യോഗി പറഞ്ഞു. രണ്ട് ദിവസത്തെ ദേശീയ സിന്ധി കണ്വെന്ഷനില് സംസാരിക്കവെ മുഖ്യമന്ത്രി പറഞ്ഞതായി സംസ്ഥാന സര്ക്കാര് പുറത്തിറക്കിയ പത്രക്കുറിപ്പില് പറയുന്നു.
500 വര്ഷങ്ങള്ക്ക് ശേഷം രാമജന്മഭൂമി തിരിച്ചെടുക്കാന് കഴിയുമെങ്കില് സിന്ധുവിനെ തിരിച്ചെടുക്കാന് ഒരു കാരണവും വേണ്ടെന്ന് അദ്ദേഹം കൂട്ടിച്ചേര്ത്തു. യോഗി ഈ പരാമര്ശം നടത്തിയപ്പോള് ഓഡിറ്റോറിയം മുഴുവനും കരഘോഷം മുഴക്കിയെന്നും പ്രസ്താവനയില് പറയുന്നു. വിഭജനത്തിന് ശേഷം ഏറ്റവും കൂടുതല് ദുരിതം അനുഭവിച്ചത് സിന്ധി സമുദായമാണെന്നും ഇന്നത്തെ തലമുറയ്ക്ക് ആ ചരിത്രം പറഞ്ഞു കൊടുക്കണമെന്നും ആദിത്യനാഥ് പറഞ്ഞു. കേവലം ഒരാളുടെ പിടിവാശിയാണ് രാജ്യ വിഭജനത്തിലേക്ക് നയിച്ചതെന്നും അദ്ദേഹം കൂട്ടിച്ചേര്ത്തു.
'രാജ്യ വിഭജിക്കപ്പെട്ടപ്പോള് ലക്ഷക്കണക്കിന് ആളുകള് കൂട്ടക്കൊല ചെയ്യപ്പെട്ടു. ഇന്ത്യയുടെ ഒരു വലിയ പ്രദേശം പാകിസ്ഥാനായി മാറി. സിന്ധി സമുദായത്തിന് അവരുടെ മാതൃഭൂമി വിട്ടുപോകേണ്ടി വന്നു. ഒരുപാട് ദുരിതം അനുഭവിച്ചു. ഇന്നും ആ ദുരന്തത്തിന്റെ ആഘാതം നാം വഹിക്കുന്നു.'- സിന്ധി കൗണ്സില് ഓഫ് ഇന്ത്യ സംഘടിപ്പിച്ച ചടങ്ങില് സംസാരിക്കവെ അദ്ദേഹം പറഞ്ഞു.
പരിഷ്കൃത സമൂഹത്തിന് ഒരിക്കലും തീവ്രവാദമോ അരാജകത്വമോ തിരിച്ചറിയാന് കഴിയില്ലെന്നും ആദിത്യനാഥ് വ്യക്തമാക്കി.
'മനുഷ്യരാശിയ്ക്ക് ക്ഷേമത്തിന്റെ പാതയിലൂടെ മുന്നോട്ട് പോകണമെങ്കില്, സമൂഹത്തിലെ ദുഷ്പ്രവണതകള് അവസാനിപ്പിക്കേണ്ടിവരും. നമ്മുടെ മതഗ്രന്ഥങ്ങള് അതിന് പ്രചോദനം നല്കുന്നു. ഭഗവാന് ശ്രീകൃഷ്ണന് മനുഷ്യ ക്ഷേമത്തിനായി നന്മയെ സംരക്ഷിക്കുന്നതിനെക്കുറിച്ചും തിന്മ ഇല്ലാതാക്കുന്നതിനെക്കുറിച്ചും പറയുന്നു- യോഗി പറഞ്ഞു. പ്രധാനമന്ത്രി നരേന്ദ്രമോദിയുടെ നേതൃത്വത്തില് ഇന്ത്യയില് ഭീകരവാദം തടയുന്നത് അവസാനഘട്ടത്തിലാണെന്ന് അദ്ദേഹം കൂട്ടിച്ചേര്ത്തു.
വിഭജനം പോലുള്ള ഒരു ദുരന്തം ആവര്ത്തിക്കാതിരിക്കാന് 'രാജ്യം ആദ്യം' എന്ന പ്രതിജ്ഞയെടുക്കാന് ആദിത്യനാഥ് ജനങ്ങളോട് അഭ്യര്ത്ഥിച്ചു. രാജ്യത്തിന്റെ ഐക്യത്തോടും അഖണ്ഡതയോടും കളിക്കുന്ന ആര്ക്കും ഉചിതമായ മറുപടി നല്കാന് നമ്മള് തയ്യാറായിരിക്കണം.
'സിന്ധി സമൂഹം ഇന്ത്യയുടെ സനാതന് ധര്മ്മത്തിന്റെ അവിഭാജ്യ ഘടകമാണ്. ദുഷ്കരമായ സാഹചര്യങ്ങളിലും സിന്ധി സമൂഹം പ്രയത്നത്തിലൂടെ മുന്നേറി. പൂജ്യത്തില് നിന്ന് എങ്ങനെ മുകളിലെത്താം എന്നതിന് സിന്ധി സമൂഹം മാതൃകയായി.'- അദ്ദേഹം പറഞ്ഞു. ചടങ്ങില് പത്മഭൂഷണ് ജേതാവും ലോക ബില്യാര്ഡ് ചാമ്പ്യനുമായ പങ്കജ് അദ്വാനിയെ മുഖ്യമന്ത്രി 'ഷെര്-ഇ-സിന്ധ്' പുരസ്കാരം നല്കി ആദരിച്ചു.
https://www.facebook.com/Malayalivartha
