ഇന്ന് അര്‍ധരാത്രി മുതല്‍ ആകാശത്ത് ഭാഗിക ചന്ദ്രഗ്രഹണം ദൃശ്യമാകുമെന്ന് ഇന്ത്യന്‍ കാലാവസ്ഥാ വകുപ്പിന്റെ പൊസിഷണല്‍ അസ്‌ട്രോണമി സെന്റര്‍ അറിയിച്ചു. ചന്ദ്രന്‍ മൂലമുണ്ടാകുന്ന ഭൂമിയിലെ ഇരുണ്ട പ്രദേശത്തേക്ക് ചന്ദ്രന്‍ പ്രവേശിക്കുന്നതാണ് ഇന്നത്തെ ഭാഗിക ചന്ദ്രഗ്രഹണം. ഇന്ത്യയുടെ എല്ലാ കോണുകളില്‍ നിന്നും ഈ കാഴ്ച ദൃശ്യമാകും.അര്‍ധ രാത്രിയോടടുത്താണ് കാഴ്ച കൂടുതല്‍ ദൃശ്യമാകുക.


പടിഞ്ഞാറന്‍ പസഫിക് സമുദ്രം, ഓസ്ട്രേലിയ, ഏഷ്യ, യൂറോപ്പ്, ആഫ്രിക്ക, കിഴക്കന്‍ തെക്കേ അമേരിക്ക, വടക്ക്-കിഴക്കന്‍ വടക്കേ അമേരിക്ക, അറ്റ്‌ലാന്റിക് സമുദ്രം, ഇന്ത്യന്‍ മഹാസമുദ്രം, ദക്ഷിണ പസഫിക് സമുദ്രം എന്നിവ ഉള്‍ക്കൊള്ളുന്ന പ്രദേശത്തും ഈ ഭാഗിക ചന്ദ്രഗ്രഹണം ദൃശ്യമാകുമെന്ന് ഐഎംഡി പൂനെയുടെ കാലാവസ്ഥാ പ്രവചന വിഭാഗം മേധാവി പറഞ്ഞു.

ഗ്രഹണത്തിന്റെ അംബ്രല്‍ ഘട്ടം ഞായറാഴ്ച പുലര്‍ച്ചെ 01:05ന് ആരംഭിച്ച് 02:24 ന് അവസാനിക്കുകയും ചെയ്യും. ഗ്രഹണം ഏകദേശം 1 മണിക്കൂര്‍ 19 മിനിറ്റ് നീണ്ടുനില്‍ക്കുമെന്നും കശ്യപി കൂട്ടിച്ചേര്‍ത്തു.

പൂര്‍ണ്ണചന്ദ്ര രാത്രികളില്‍ ഭൂമി സൂര്യനും ചന്ദ്രനും ഇടയില്‍ വരുകയും ചന്ദ്രോപരിതലത്തില്‍ നിഴല്‍ വീഴ്ത്തുകയും ചെയ്യുമ്പോള്‍ ചന്ദ്രഗ്രഹണം സംഭവിക്കുന്നു. ചന്ദ്രന്‍ പൂര്‍ണ്ണമായും ഭൂമിയുടെ നിഴലിലായിരിക്കുമ്പോള്‍ പൂര്‍ണ ചന്ദ്രഗ്രഹണമെന്നും ചന്ദ്രന്റെ ഒരു ഭാഗം മാത്രം ഭൂമിയുടെ നിഴലില്‍ ആയിരിക്കുമ്പോള്‍ ഭാഗിക ചന്ദ്രഗ്രഹണമെന്നും പറയുന്നു.