കോവിഡാനന്തര കാലത്തെ ഹൃദയ പരിചരണം സംബന്ധിച്ച് ഗൗരവമായ ചര്‍ച്ചകള്‍ ആഗോളതലത്തില്‍ നടന്നുകൊണ്ടിരിക്കുകയാണിപ്പോള്‍. കോവിഡ് 19 രോഗം വന്നു ഭേദമായശേഷവും നെഞ്ചുവേദന, പെട്ടെന്നുള്ള കിതപ്പ്, ഹൃദയാഘാതം, ഹൃദയസ്തംഭനം, ഉയര്‍ന്ന വേഗത്തിലുള്ള ഹൃദയമിടിപ്പ് തുടങ്ങിയ പ്രശ്‌നങ്ങള്‍ ആഗോള തലത്തില്‍ വര്‍ധിക്കുന്നതായാണ് റിപ്പോര്‍ട്ടുകളുള്ളത്.ഹൃദയ സംബന്ധമായ രോഗങ്ങളൊന്നും ഇല്ലാതിരുന്ന നിരവധി പേര്‍ക്കും കോവിഡ് ബാധിച്ച ശേഷം ഹൃദയസംബന്ധമായ തകരാറുകള്‍ കണ്ടെത്തിയിട്ടുണ്ട്. ഗുജറാത്തിലെ ഗര്‍ബ നൃത്തങ്ങള്‍ ഹൃദയാഘാത മരണങ്ങള്‍ ഉണ്ടാക്കുന്നുവെന്ന് പഠനങ്ങള്‍ പറയുന്നു. മുന്‍കാല ആരോഗ്യപ്രശ്‌നങ്ങള്‍, നീണ്ട മണിക്കൂറുകളുടെ ഉപവാസം, അനാരോഗ്യകരമായ ഭക്ഷണം, നിലവിലുള്ള ഹൃദയസംബന്ധമായ പ്രശ്‌നങ്ങളെക്കുറിച്ചുള്ള അജ്ഞത എന്നിവ കാരണമാകാം ഇത്. കണക്കുകള്‍ പ്രകാരം, ഗുജറാത്തില്‍ ഉടനീളമുള്ള ഗര്‍ബ പരിപാടികളില്‍ ഒരു ദിവസം ഹൃദയാഘാതം മൂലം കുറഞ്ഞത് 10 മരണങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.

ഗുജറാത്തില്‍ നവരാത്രി ആഘോഷത്തിനിടെ ഗര്‍ബ നൃത്തം ചെയ്യുന്നതിനിടെ ഹൃദയാഘാതം മൂലം മരിച്ചവരുടെ എണ്ണം 10 ആയി. 24 മണിക്കൂറിനിടെയാണ് പത്തുപേര്‍ ഹൃദയാഘാതം മൂലം മരിച്ചത്. കപദ്‌വഞ്ച് ഖേദ ജില്ലയിലാണ് സംഭവം. മരിച്ചവരില്‍ പതിനേഴുകാരനും ഉള്‍പ്പെടുന്നു. 17 വയസുള്ള വീര്‍ ഷാ പെട്ടെന്ന് തലകറക്കമുണ്ടെന്ന് പറയുകയും കുഴഞ്ഞുവീഴുകയുമായിരുന്നു. ഉടന്‍ പ്രാഥമിക ശുശ്രൂഷ നല്‍കി ആശുപത്രിയില്‍ എത്തിച്ചെങ്കിലും മരണം സ്ഥിരീകരിച്ചു. ഗര്‍ബ നൃത്തം ചെയ്യുന്നതിനിടെ പെട്ടെന്നുണ്ടായ ഹൃദയാഘാതത്തെ തുടര്‍ന്നാണ് കൗമാരക്കാരന്‍ മരിച്ചതെന്നാണ് ഡോക്ടര്‍മാര്‍ പറയുന്നത്. 24 മണിക്കൂറിനിടെ ഗുജറാത്തില്‍ നവരാത്രി ആഘോഷത്തിനിടെ ഗര്‍ബ അവതരിപ്പിക്കുന്നതിനിടെ പത്തു പേര്‍ മരിച്ചതായി ഇന്ത്യ ടുഡേയുടെ റിപ്പോര്‍ട്ട് പറയുന്നു. നവരാത്രി ആഘോഷങ്ങളുടെ ആറാം ദിവസമായ വെള്ളിയാഴ്ചയാണ് വീര്‍ മരിച്ചത്. ബറോഡയിലെ ദാഭോയിയില്‍ നിന്നുള്ള 13 വയസ്സുള്ള ഒരു ആണ്‍കുട്ടിയും കഴിഞ്ഞ ദിവസം കുഴഞ്ഞുവീണ് മരിച്ചിരുന്നു.

അഹമ്മദാബാദില്‍ നിന്നുള്ള 28 കാരനായ രവി പഞ്ചാല്‍, ഗര്‍ബ കളിക്കുന്നതിനിടെ പെട്ടെന്ന് കുഴഞ്ഞുവീണ് വെള്ളിയാഴ്ച രാത്രി മരിച്ചു, വഡോദരയില്‍ 55 കാരനായ ശങ്കര്‍ റാണയും ഗര്‍ബയ്ക്കിടെ കുഴഞ്ഞു വീണ് മരിച്ചു. ഇന്ത്യാ ടുഡേ റിപ്പോര്‍ട്ട് പ്രകാരം, ഗുജറാത്തിലെ 108 എമര്‍ജന്‍സി ആംബുലന്‍സ് സേവനങ്ങള്‍ക്ക് നവരാത്രിയുടെ ആദ്യ ആറ് ദിവസങ്ങളില്‍ ഹൃദയ സംബന്ധമായ പ്രശ്‌നങ്ങളുമായി 521 കോളുകളും ശ്വാസതടസവുമായി 609 കോളുകളും ലഭിച്ചു. സാധാരണയായി ഗാര്‍ബ ആഘോഷങ്ങള്‍ നടക്കുന്ന വൈകുന്നേരം 6 മണിക്കും പുലര്‍ച്ചെ 2 മണിക്കും ഇടയിലാണ് ഈ കോളുകളില്‍ ഭൂരിഭാഗവും ലഭിച്ചതെന്നാണ് റിപ്പോര്‍ട്ട്. ഹൃദയസംബന്ധമായ പ്രശ്‌നങ്ങള്‍ പെട്ടെന്ന് വര്‍ദ്ധിക്കുന്നതിനാല്‍ സര്‍ക്കാര്‍ ആശുപത്രികള്‍ക്ക് ജാഗ്രതാ നിര്‍ദേശം നല്‍കി. മുഖ്യമന്ത്രി ഭൂപേന്ദ്ര പട്ടേലിന്റെ നേതൃത്വത്തിലുള്ള സര്‍ക്കാര്‍ ഗാര്‍ബ വേദികള്‍ക്ക് സമീപമുള്ള എല്ലാ സര്‍ക്കാര്‍ ആശുപത്രികളും കമ്മ്യൂണിറ്റി ഹെല്‍ത്ത് സെന്ററുകളും (സിഎച്ച്‌സി) അതീവ ജാഗ്രത പാലിക്കാന്‍ അഭ്യര്‍ത്ഥിച്ചു.

കോവിഡിന് ശേഷമുള്ള സങ്കീര്‍ണതകള്‍, വായു മലിനീകരണം, അനാരോഗ്യകരമായ ജീവിതശൈലി എന്നിവയുള്‍പ്പെടെയുള്ള വിവിധ ഘടകങ്ങളാല്‍ ഇന്ത്യയില്‍ ഹൃദ്രോഗങ്ങളുടെയും ഹൃദയാഘാതങ്ങളുടെയും വ്യാപനം വര്‍ധിച്ചുകൊണ്ടിരിക്കുകയാണ്. ഹൃദയാഘാതത്തിന്റെ തോത് വര്‍ധിച്ചുവരുന്ന സാഹചര്യത്തില്‍ ഇത് ഏറ്റവും കൂടുതല്‍ ബാധിക്കുന്നത് യുവാക്കളെയാണെന്ന് അഹമ്മദാബാദിലെ നാരായണ ഹോസ്പിറ്റലിലെ കണ്‍സള്‍ട്ടന്റ് ഇന്റര്‍വെന്‍ഷണല്‍ കാര്‍ഡിയോളജിസ്റ്റ് ഡോ സീഷന്‍ മന്‍സൂരി പറഞ്ഞു. നേരത്തെ 10% രോഗികള്‍ മാത്രമാണ് വളരെ ഗുരുതരമായ രോഗലക്ഷണങ്ങള്‍, തടസ്സപ്പെട്ട ധമനികള്‍, ഹൃദയസ്തംഭനം അല്ലെങ്കില്‍ ഹൃദയാഘാതവുമായി സമീപിച്ചതെങ്കില്‍ ഇപ്പോള്‍ ഇത് ഏകദേശം 25% ആയി ഉയര്‍ന്നിട്ടുണ്ട്.

ഗര്‍ബ പോലുള്ള ഉയര്‍ന്ന തീവ്രതയുള്ള ശാരീരിക പ്രവര്‍ത്തനങ്ങളില്‍ ഏര്‍പ്പെടുന്നത് അടിസ്ഥാന ആരോഗ്യസ്ഥിതികള്‍ വഷളാക്കും. ഇത് പെട്ടന്നുള്ള ഹൃദയാഘാതത്തിന് കാരണമാകുന്നു. ഓരോരുത്തരും അവരുടെ ആരോഗ്യത്തെക്കുറിച്ച് ബോധവാന്മാരായിരിക്കേണ്ടത് പ്രധാനമാണ്. ജലാംശം നിലനിര്‍ത്തുക, ഗര്‍ബ പോലുള്ള ആഘോഷങ്ങളില്‍ ശാരീരിക സ്ഥിതി നോക്കി വേണം കളിക്കാന്‍. കൊല്‍ക്കത്തയിലെ എന്‍.എച്ച് .ആര്‍.എന്‍ ടാഗോര്‍ ഹോസ്പിറ്റലിലെ കാര്‍ഡിയോളജി കണ്‍സള്‍ട്ടന്റ് ഡോ ദേബ്ദത്ത മജുംദാര്‍ പറഞ്ഞു. നൃത്തമോ വ്യായാമമോ പോലുള്ള പ്രവര്‍ത്തനങ്ങളില്‍ ശരീരത്തിലെ ഇലക്‌ട്രോലൈറ്റുകളില്‍ അസന്തുലിതാവസ്ഥ ഉണ്ടാകുമ്പോള്‍ ഈ പ്രശ്‌നം കൂടുതല്‍ വഷളാകും. സാധാരണ ജോലിയിലോ ദൈനംദിന പ്രവര്‍ത്തനങ്ങളിലോ, ഇവ പ്രശ്‌നങ്ങളോ ലക്ഷണങ്ങളോ ഉണ്ടാക്കുന്നില്ല. അതിനാല്‍ ശ്രദ്ധിക്കപ്പെടാതെ പോകുന്നു.

ഉത്സവ സീസണില്‍ ഹൃദയ സംബന്ധമായ പ്രശ്‌നങ്ങള്‍ക്ക് വൈദ്യസഹായം തേടുന്ന രോഗികളുടെ എണ്ണത്തില്‍ ഗണ്യമായ വര്‍ധനവ് ഉണ്ടായതായി കണക്കുകള്‍ പറയുന്നു. നിര്‍ജ്ജലീകരണം, മോശം ഭക്ഷണരീതികള്‍, അമിതമായ ശാരീരിക പ്രവര്‍ത്തനങ്ങള്‍ എന്നിവ കൂടാതെ ആഘോഷവേളയിലെ അമിത ചൂടും ഹൃദയാഘാതത്തിന് കാരണമായേക്കാം. ഹൃദയ സംബന്ധമായ പ്രശ്‌നങ്ങളുടെ സാധ്യത കുറക്കുന്നതിന്, പങ്കെടുക്കുന്നവര്‍, പ്രത്യേകിച്ച് ചെറുപ്പക്കാര്‍, ഇത്തരം ആഘോഷങ്ങളില്‍ ജലാംശം നിലനിര്‍ത്താന്‍ പ്രത്യേകം ശ്രദ്ധിക്കണം. കൂടാതെ ഈ ആഘോഷങ്ങളില്‍ അമിതമായ അളവില്‍ പഞ്ചസാരയോ കൊഴുപ്പുള്ളതോ ആയ ഭക്ഷണങ്ങള്‍ കഴിക്കുന്നത് ഒഴിവാക്കുകയും ചെയ്യണം. അസ്വാസ്ഥ്യം, അമിതമായ ക്ഷീണം, ചുമ എന്നിവ അനുഭവപ്പെട്ടാല്‍ ഉടന്‍ വൈദ്യ സഹായം തേടണമെന്നും ഡോക്ടര്‍മാര്‍ നിര്‍ദേശിക്കുന്നു. സമയോചിതമായ ഇടപെടല്‍ ഒരു പരിധി വരെ വലിയ ഹൃദ്രോഗ പ്രശ്‌നങ്ങളുടെ തോത് കുറക്കും.

ഇത്തരം ആഘോഷങ്ങളില്‍ അമിതമായ അദ്ധ്വാനവും സമ്മര്‍ദ്ദവും മൂലമുണ്ടാകുന്ന അപകടസാധ്യതകളെക്കുറിച്ച് അവബോധം വളര്‍ത്തേണ്ടത് അത്യാവശ്യമാണെന്ന് വിദഗ്ധര്‍ അഭിപ്രായപ്പെടുന്നു. എല്ലാ പോഷകങ്ങളും ലഭിക്കും വിധത്തില്‍ ഭക്ഷണ ക്രമീകരണം വരുത്തുക. പൊരിച്ചതും, എണ്ണ, കൊഴുപ്പ് കൂടിയ ഭക്ഷണങ്ങള്‍ പൂര്‍ണ്ണമായും ഒഴിവാക്കുക. രുചി തേടി കൃത്രിമഭക്ഷണങ്ങളുടെ പിന്നാലെ പായാതിരിക്കുക, രക്തസമ്മര്‍ദ്ദവും കൊളസ്‌ട്രോളും അപകടകരമാകാത്ത വിധത്തില്‍ കൈകാര്യം ചെയ്യുക, ദിവസേന ആരോഗ്യം അനുവദിക്കും വിധത്തില്‍ വ്യായാമം ചെയ്യുക, മദ്യം, പുകവലി പൂര്‍ണ്ണമായി ഒഴിവാക്കുക. ശരീരത്തിന്റെ അസാധാരണമായ മാറ്റങ്ങള്‍ അവഗണിക്കാതിരിക്കുക, ആവശ്യമെങ്കില്‍ ഡോക്ടര്‍മാരുടെ സഹായം തേടുക. ശ്വാസതടസ്സം, തളര്‍ച്ച, കിടക്കുമ്പോള്‍ ശ്വാസം മുട്ട് അനുഭവപ്പെടുക, കണങ്കാലില്‍ മുഴയോ നീര്‍ക്കെട്ടോ വരിക, രാത്രി തുടര്‍ച്ചയായി മൂത്രമൊഴിക്കേണ്ടി വരിക തുടങ്ങിയ ലക്ഷണങ്ങളുള്ളവര്‍ ഡോക്ടര്‍മാരുടെ അഭിപ്രായം തേടുക.
ഹൃദ്രോഗികളല്ലാത്തവര്‍ കോവിഡിനു ശേഷം ഇത്തരം ലക്ഷണങ്ങള്‍ കാണുമ്പോള്‍ ആദ്യം കുടുംബ ഡോക്ടറെ കണ്ട് അവരുടെ നിര്‍ദേശപ്രകാരം ഹൃദ്രോഗ വിദഗ്ധനെ കണ്ടാലും മതിയാകും.