വായു മലിനീകരണം അപകടകരമായ നിലയിലെത്തിയ ഡല്‍ഹിയില്‍ വാഹനങ്ങള്‍ക്കടക്കം കടുത്ത നിയന്ത്രണം ഏര്‍പ്പെടുത്തി. 10, 12 ക്ലാസുകള്‍ ഒഴികെ സ്‌കൂളുകള്‍ പത്താംതീയതി വരെ അടച്ചിടും. ഓണ്‍ലൈന്‍ ക്‌ളാസുകള്‍ നടത്താവുന്നതാണ്.

13 മുതല്‍ 20-ാംതിയതി വരെ വാഹനങ്ങള്‍ക്ക് ഒറ്റ, ഇരട്ട നമ്പര്‍ ക്രമീകരണത്തോടെയാണ് നിയന്ത്രണം.വായുവിന്റെ ഗുണ നിലവാര സൂചിക പ്രകാരം (എയര്‍ ക്വാളിറ്റി ഇന്‍ഡക്‌സ് 400-500ല്‍ എത്തിയാല്‍ ആരോഗ്യത്തിന് ഹാനികരം) നാലിടങ്ങളില്‍ ഇന്നലെ മലിനീകരണം രൂക്ഷമായിരുന്നു.

ആര്‍.കെ പുരം (466), ഐ.ടി.ഒ (402), പട്പര്‍ഗഞ്ച് (471), ന്യൂ മോത്തി ബാഗ് (488). ഡല്‍ഹിക്ക് ചുറ്റുമുള്ള ഗുരുഗ്രാം (369), നോയ്ഡ (403), ഗ്രേറ്റര്‍ നോയ്ഡ (396), ഫരീദാബാദ് (426) എന്നിവിടങ്ങളിലും അപകടകരമായ നിലയിലാണ്. ഇന്നലെ ബംഗ്‌ളാദേശ്-ശ്രീലങ്ക ലോകകപ്പ് ക്രിക്കറ്റ് മത്സരം നടന്ന സ്റ്റേഡിയത്തില്‍ ഇന്‍ഡക്‌സ് 400 രേഖപ്പെടുത്തി.

ഒറ്റ അക്കത്തില്‍ അവസാനിക്കുന്ന നമ്പറുള്ള വാഹനങ്ങള്‍ ഒറ്റ അക്കത്തില്‍ അവസാനിക്കുന്ന ദിവസങ്ങളില്‍ മാത്രമേ 13മുതല്‍ നിരത്തിലിറങ്ങാവൂ. ഇരട്ട അക്കമുള്ള ദിവസങ്ങളില്‍ അതിനനുസരിച്ചും. നഗരത്തില്‍ സി.എന്‍.ജി, ഇലക്ട്രിക്, ബി.എസ് 6 വാഹനങ്ങള്‍ മാത്രം അനുവദിക്കും. മുഖ്യമന്ത്രി അരവിന്ദ് കേജ്രിവാളിന്റെ അദ്ധ്യക്ഷതയില്‍ ചേര്‍ന്ന ഉന്നതതല യോഗത്തിലാണ് തീരുമാനം.



പഴയ പെട്രോള്‍, ഡീസല്‍ ട്രക്കുകള്‍ക്കും നിര്‍മ്മാണ പ്രവര്‍ത്തനങ്ങള്‍ക്കും നേരത്തെ വിലക്ക് ഏര്‍പ്പെടുത്തിയിട്ടുണ്ടായിരുന്നു. അവശ്യ സാധനങ്ങള്‍ കയറ്റിയ വാഹനങ്ങള്‍ക്ക് ഇളവുണ്ട്. പടക്കങ്ങള്‍ക്കും നിരോധനം. ഉത്തര്‍പ്രദേശിലും ഹരിയാനയിലും ഡീസല്‍ ബസുകള്‍ നിരോധിച്ചു. ഇന്നു രാത്രിയോടെ ചെറിയ തോതിലുള്ള മഴയോ കാറ്റോ വീശാന്‍ സാദ്ധ്യതയുള്ളതിനാല്‍ മലിനീകരണം കുറയാനിടയുണ്ടെന്ന് കേന്ദ്ര കാലാവസ്ഥാ വകുപ്പ് .