ദീപാവലി ആഘോഷങ്ങളുടെ ഭാഗമായി പടക്കം പൊട്ടിക്കാനുള്ള സമയം രണ്ട് മണിക്കൂര്‍ മാത്രമാണെന്ന് സര്‍ക്കാര്‍ ഉത്തരവിറക്കി. രാത്രി എട്ട് മുതല്‍ പത്ത് വരെയാണ് സമയം. ആഘോഷങ്ങള്‍ക്ക് ഹരിത പടക്കങ്ങള്‍ മാത്രമേ വില്‍ക്കാവു എന്നും ഉത്തരവിലുണ്ട്. നിര്‍ദ്ദേശങ്ങള്‍ കൃത്യമായി നടപ്പാക്കുന്നുണ്ടോയെന്ന് പരിശോധിക്കാന്‍ ജില്ലാ മജിസ്‌ട്രേറ്റുകള്‍ക്കും ജില്ലാ പൊലീസ് മേധാവികള്‍ക്കും ചുമതല നല്‍കിയിട്ടുണ്ട്. കൂടാതെ ക്രിസ്മസ്, ന്യൂയര്‍ ആഘോഷങ്ങളിലും പടക്കം പൊട്ടിക്കുന്നതിനു സമയ നിയന്ത്രണമുണ്ട്. രാത്രി 11.55 മുതല്‍ 12.30 വരെയാണ് പടക്കം പൊട്ടിക്കാനുള്ള സമയം.

വായൂ ഗുണനിലവാരം മിതമായതോ അതിനു താഴെയുള്ളതോ ആയ നഗരങ്ങളില്‍ അന്തരീക്ഷ മലിനീകരണം നിയന്ത്രിക്കുന്നതിന്റെ ഭാഗമായി ഗ്രീന്‍ ട്രൈബ്യൂണല്‍ പുറപ്പെടുവിച്ച വിധിയുടെ അടിസ്ഥാനത്തിലാണ് ഉത്തരവ്. ആഘോഷങ്ങളില്‍ ഹരിത പടക്കങ്ങള്‍ മാത്രമേ വില്‍ക്കാന്‍ പാടുള്ളൂവെന്നും ജില്ലാ മജിസ്‌ട്രേറ്റുമാര്‍, ജില്ലാ പൊലീസ് മേധാവിമാര്‍ എന്നിവര്‍ ഇക്കാര്യങ്ങള്‍ ഉറപ്പാക്കണമെന്നും ഉത്തരവില്‍ പറയുന്നു. ദേശീയ ഹരിത ട്രൈബ്യൂണലിന്റെ ഉത്തരവിന്റെ അടിസ്ഥാനത്തില്‍ ആഭ്യന്തര വകുപ്പാണ് നിയന്ത്രണം ഏര്‍പ്പെടുത്തിയത്.

അതേസമയം രാജ്യത്ത് പടക്കം പൊട്ടിക്കുന്നതുമായി ബന്ധപ്പെട്ട നിര്‍ദ്ദേശങ്ങള്‍ എല്ലാ സംസ്ഥാനങ്ങള്‍ക്കും ബാധകമാണെന്ന് സുപ്രീം കോടതി പറഞ്ഞു. ദീപാവലി സമയത്തും മറ്റ് ആഘോഷങ്ങളുമായും ബന്ധപ്പെട്ട് പടക്കം പൊട്ടിക്കരുതെന്ന ഉത്തരവുകള്‍ പാലിക്കാന്‍ എല്ലാ സംസ്ഥാനങ്ങളോടും കേന്ദ്ര ഭരണ പ്രദേശങ്ങളോടും സുപ്രീം കോടതി നിര്‍ദ്ദേശം നല്‍കി.

രാജ്യത്ത് പടക്കങ്ങള്‍ വില്‍ക്കുന്നതും വാങ്ങുന്നതും ഉപയോഗിക്കുന്നതും നിരോധിക്കണമെന്ന് ആവശ്യപ്പെട്ട് രാജസ്ഥാന്‍ സമര്‍പ്പിച്ച ഹര്‍ജികള്‍ പരിഗണിക്കവെയാണ് ജസ്റ്റിസുമാരായ എ എസ് ബൊപ്പണ്ണ, എം എം സുന്ദ്രേഷ് എന്നിവരടങ്ങിയ ബെഞ്ച് ഉത്തരവിറക്കിയത്. ഡല്‍ഹിയില്‍ നടപ്പാക്കിയ ഉത്തരവ് രാജ്യവ്യാപകമാക്കാനുള്ള നിര്‍ദ്ദേശം മാത്രമാണ് ആവശ്യമെന്നും ഹര്‍ജിക്കാര്‍ ആവശ്യപ്പെടുന്നു.

പടക്ക നിരോധനം സംബന്ധിച്ച ഉത്തരവ് എല്ലാ സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ബാധകമാണെന്നും എന്നാല്‍ നിലവില്‍ അത് ഡല്‍ഹി-എന്‍സിആറില്‍ മാത്രമാണ് നടപ്പിലാക്കിയിരിക്കുന്നതെന്നും വാദത്തിനിടെ ഹര്‍ജിക്കാരന്‍ ചൂണ്ടിക്കാട്ടി. എല്ലാ സംസ്ഥാനങ്ങളും അന്തരീക്ഷ മലിനീകരണം കുറക്കുന്നതിനാവശ്യമായ നടപടികള്‍ കൈക്കൊള്ളാന്‍ നിര്‍ദ്ദേശിച്ച കോടതി, രാജസ്ഥാന്‍ സംസ്ഥാനത്തിന്റെ മുന്‍ ഉത്തരവും ശ്രദ്ധയില്‍പ്പെടുത്തി. ഇതുമായി ബന്ധപ്പെട്ട് ജനങ്ങളെ ബോധവല്‍ക്കരിക്കുക എന്നതാണ് പ്രധാനം, കോടതി കൂട്ടിച്ചേര്‍ത്തു.

പാരിസ്ഥിതിക വിഷയങ്ങളില്‍ കോടതിക്ക് മാത്രമേ കടമകള്‍ ഉള്ളൂ എന്ന തെറ്റായ ധാരണ നിലനില്‍ക്കുന്നുണ്ടെന്ന് ജസ്റ്റിസ് സുന്ദ്രേഷ് ചൂണ്ടിക്കാട്ടി. ''വായുവും ശബ്ദ മലിനീകരണവും നിയന്ത്രിക്കേണ്ടത് എല്ലാവര്‍ക്കും വേണ്ടിയാണ്,'' അദ്ദേഹം പറഞ്ഞു. ദേശീയ തലസ്ഥാനത്തും അയല്‍ സംസ്ഥാനങ്ങളിലും വായുവിന്റെ ഗുണനിലവാരം മോശമായിക്കൊണ്ടിരിക്കുന്നതിനാല്‍ ഡല്‍ഹിയിലെ വായു മലിനീകരണ വിഷയത്തില്‍ കേന്ദ്ര-സംസ്ഥാന സര്‍ക്കാരുകളെയും കോടതി വിമര്‍ശിച്ചു. 'ഡല്‍ഹി വായു മലിനീകരണത്തില്‍ അങ്ങോട്ടും ഇങ്ങോട്ടും കുറ്റപ്പെടുത്തുന്ന ഒരു രീതി കാണുന്നു. കാരണത്തിന്റെ ഉത്തരവാദിത്വം എല്ലാവരും കൈമാറാന്‍ ശ്രമിക്കുന്നു,' ജസ്റ്റിസ് സുന്ദ്രേഷ് പറഞ്ഞു.