രാജസ്ഥാനിൽ നാലുവയസുള്ള ദളിത് പെൺകുട്ടിയെ പൊലീസ് ഉദ്യോ​ഗസ്ഥൻ മദ്യം നൽകി ബലാത്സംഗം ചെയ്തു. ദൗസയിൽ ഉണ്ടായ സംഭവത്തിൽ എസ് ഐ ഭൂപേന്ദ്ര സിം​ഗിനെ കസ്റ്റഡിയിലെടുത്തു. ഇയാൾ താമസിക്കുന്ന വാടക വീട്ടിലേക്ക് പെൺകുഞ്ഞിനെ കൂട്ടിക്കൊണ്ടുവന്നാണ് ഇയാൾ മദ്യം നൽകി പീഡിപ്പിച്ചത്. ലൈം​ഗികാതിക്രമം നേരിട്ട കുഞ്ഞിന്റെ പിതാവും പൊലീസ് ഉദ്യോ​ഗസ്ഥനാണെന്ന് റിപ്പോർട്ടുണ്ട്.

കേസിൽ ഭൂപേന്ദ്ര സിം​ഗിനെ പൊലീസ് വിശദമായി ചോദ്യം ചെയ്ത് വരികയാണ്. മെഡിക്കൽ പരിശോധനയും മറ്റ് അന്വേഷണങ്ങളും പുരോ​ഗമിക്കുകയാണ്. സംഭവത്തിൽ പ്രതിഷേധവുമായി ദൗസ നിവാസികൾ മുദ്രാവാക്യങ്ങളുമായി രാഹുവാസ് പൊലീസ് സ്റ്റേഷൻ ഉപരോധിച്ചു. ബിജെപി എം പി കിരോടി ലാൽ മീര ഉൾപ്പെടെയുള്ളവരും പൊലീസ് സ്റ്റേഷൻ പ്രതിഷേധത്തിനെത്തി. പൊലീസിനിടയിൽ ഇത്തരം ക്രൂരതകൾ വ്യാപകമാകുന്നത് അശോക് ​ഗെഹ്ലോട്ട് സർക്കാരിന്റെ പിടിപ്പുകേടുകൊണ്ടാണെന്ന് ബിജെപി കുറ്റപ്പെടുത്തി.