കോണ്ഗ്രസിനെതിരെ ആരോപണങ്ങളുമായി അമിത് ഷാ... ഒബിസികള്ക്കായി കോണ്ഗ്രസ് എന്താണ് ചെയ്തതെന്ന് ഷാ; മണ്ഡല് കമ്മീഷന് റിപ്പോര്ട്ടിനെ വര്ഷങ്ങളോളം അടിച്ചമര്ത്തുകയും എതിര്ക്കുകയും ചെയ്താണ് കോണ്ഗ്രസ്
കോണ്ഗ്രസിനെതിരെ ആരോപണങ്ങളുമായി കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. മധ്യപ്രദേശിലെ ഇന്ഡോറില് നടന്ന നിയമസഭാ തിരഞ്ഞെടുപ്പ് റാലിയെ അഭിസംബോധന ചെയ്തുകൊണ്ടായിരുന്നു ഷായുടെ ആരോപണം. മറ്റ് പിന്നോക്ക വിഭാഗങ്ങളുടെ (ഒബിസി) ഉന്നമനത്തിനായുള്ള കോണ്ഗ്രസിന്റെ പ്രതിബദ്ധതയെ അദ്ദേഹം ചോദ്യം ചെയ്തു.
ഇന്ഡോറിലെ ദപാല്പൂര് നിയമസഭാ മണ്ഡലത്തിലെ ബെത്മയില് നടന്ന റാലിയില്, ഒബിസികള്ക്കായി കോണ്ഗ്രസ് എന്താണ് ചെയ്തതെന്ന് ഷാ ചോദിച്ചു. മണ്ഡല് കമ്മീഷന് റിപ്പോര്ട്ടിനെ വര്ഷങ്ങളോളം അടിച്ചമര്ത്തുകയും എതിര്ക്കുകയും ചെയ്താണ് കോണ്ഗ്രസ്. മോദി സര്ക്കാരിലെ 35 ശതമാനത്തിലധികം മന്ത്രിമാരും ഒബിസിക്കാരാണ്. വിദ്യാഭ്യാസ സ്ഥാപനങ്ങളില് ഒബിസിക്ക് 27 ശതമാനം സംവരണം നല്കിയതും, പിന്നാക്ക വിഭാഗ കമ്മിഷന് ഭരണഘടനാപരമായ അംഗീകാരം നല്കിയതും നരേന്ദ്ര മോദി സര്ക്കാരാണെന്നും അദ്ദേഹം പറഞ്ഞു.
ഒരു സാധാരണ കുടുംബത്തില് നിന്നുള്ള പ്രധാനമന്ത്രിയുടെ പശ്ചാത്തലവും ഷാ പരാമര്ശിച്ചു. ഒബിസികളും ദളിതരും ആദിവാസികളും ഉള്പ്പെടെയുള്ള പാര്ശ്വവല്ക്കരിക്കപ്പെട്ട സമുദായങ്ങളുടെ ക്ഷേമത്തിനായുള്ള സര്ക്കാരിന്റെ പ്രതിബദ്ധതയാണിത്. മോദി സര്ക്കാരിന്റെ നേതൃത്വത്തില് രാഷ്ട്രപതി സ്ഥാനത്തേക്ക് ഉയര്ത്തപ്പെട്ട ഒഡീഷയില് നിന്നുള്ള ആദിവാസി കുടുംബത്തിലെ അംഗമായ ദ്രൗപതി മുര്മുവിന്റെ ഉദാഹരണവും അദ്ദേഹം ഉദ്ധരിച്ചു.
550 വര്ഷമായി ശ്രീരാമന് തന്റെ ജന്മസ്ഥലത്ത് മഹത്തായ ക്ഷേത്രം നിര്മ്മിക്കുന്നതിന് വേണ്ടി കാത്തിരിക്കുകയാണ്. എന്നാല് കഴിഞ്ഞ 70 വര്ഷമായി ക്ഷേത്രത്തിന്റെ നിര്മ്മാണം കോണ്ഗ്രസ് വൈകിപ്പിക്കുകയും വഴിതിരിച്ചുവിടുകയും മാറ്റിവയ്ക്കുകയും ചെയ്യുന്നു. ക്ഷേത്രം എപ്പോള് പണിയുമെന്ന് ചോദിച്ച് കോണ്ഗ്രസ് ഞങ്ങളെ കളിയാക്കാറുണ്ട്. ജനുവരി 22ന് രാമക്ഷേത്രത്തില് രാംലാലയുടെ പട്ടാഭിഷേകം നടക്കും. ചടങ്ങില് പ്രധാനമന്ത്രി മോദി പങ്കെടുക്കുമെന്നും അദ്ദേഹം പറഞ്ഞു.
അതേസമയം, രാജ്യത്ത് ജാതി സെന്സസ് നടത്തണമെന്ന് കോണ്ഗ്രസ് ആവശ്യപ്പെട്ടു. ഒബിസി, പട്ടികജാതി, പട്ടികവര്ഗ വിഭാഗങ്ങളുടെ കൃത്യമായ കണക്ക് ഇതിലൂടെ ലഭ്യമാകുമെന്നും, എന്നാല് ബിജെപി സെന്സസ് തടസ്സപ്പെടുത്തുകയാണെന്നും കോണ്ഗ്രസ് ആരോപിച്ചു.
മധ്യപ്രദേശില് വരാനിരിക്കുന്ന നിയമസഭാ തിരഞ്ഞെടുപ്പ് ബിജെപിക്കും കോണ്ഗ്രസിനും നിര്ണായകമാണ്. സംസ്ഥാനത്ത് ഭരണം നിലനിര്ത്താന് ബി.ജെ.പി ശ്രമിക്കുമ്പോള് തിരിച്ചുവരവ് ലക്ഷ്യമിട്ടാണ് കോണ്ഗ്രസ് നീക്കങ്ങള്. 230 അംഗ മധ്യപ്രദേശ് നിയമസഭയിലേക്കുള്ള വോട്ടെടുപ്പ് നവംബര് 17 ന് ഒറ്റഘട്ടമായി നടക്കും. ഡിസംബര് 3 ന് ഫലം പ്രഖ്യാപിക്കും.
https://www.facebook.com/Malayalivartha
