പ്രധാനമന്ത്രിക്കെതിരെ നടത്തിയ പരാമര്ശം... പ്രിയങ്ക ഗാന്ധിക്ക് കാരണം കാണിക്കല് നോട്ടീസ് നല്കി തിരഞ്ഞെടുപ്പ് കമ്മീഷന്
പ്രധാനമന്ത്രി നരേന്ദ്ര മോഡിക്കെതിരെ നടത്തിയ സ്ഥിരീകരിക്കാത്ത പരാമര്ശങ്ങളുടെ പേരില് കോണ്ഗ്രസ് നേതാവ് പ്രിയങ്ക ഗാന്ധിക്ക് കാരണം കാണിക്കല് നോട്ടീസ് നല്കി തിരഞ്ഞെടുപ്പ് കമ്മീഷന് (ഇസി). ബിജെപി നല്കിയ പരാതിയിലാണ് നോട്ടീസ്. പ്രധാനമന്ത്രിക്കെതിരായ തെറ്റും സ്ഥിരീകരിക്കാത്ത പ്രസ്താവനകളും വ്യക്തമാക്കണമെന്നാണ് പ്രിയങ്ക ഗാന്ധിയോട് തിരഞ്ഞെടുപ്പ് കമ്മീഷന് നിര്ദ്ദേശിച്ചിരിക്കുന്നത്. വ്യാഴാഴ്ച രാത്രി 8 മണിക്കകം വിശദീകരണം നല്കണമെന്നാണ് നോട്ടീസില് പറയുന്നത്.
'മറ്റ് രാഷ്ട്രീയ പാര്ട്ടികളെ വിമര്ശിക്കുന്നത് അവരുടെ നയങ്ങളിലും പരിപാടികളിലും മുന്കാല റെക്കോര്ഡുകളിലും പ്രവര്ത്തനങ്ങളിലും ഒതുങ്ങും. മറ്റ് പാര്ട്ടികളുടെ നേതാക്കളുടെയും പ്രവര്ത്തകരുടെയും പൊതു പ്രവര്ത്തനങ്ങളുമായി ബന്ധമില്ലാത്ത സ്വകാര്യ ജീവിതത്തിന്റെ എല്ലാ വശങ്ങളെയും വിമര്ശിക്കുന്നതില്നിന്ന് പാര്ട്ടികളും സ്ഥാനാര്ത്ഥികളും വിട്ടുനില്ക്കണം. സ്ഥിരീകരിക്കാത്ത ആരോപണങ്ങളുടെയോ വളച്ചൊടിക്കലിന്റെയോ അടിസ്ഥാനത്തില് മറ്റ് പാര്ട്ടികളെയോ അവരുടെ പ്രവര്ത്തകരെയോ വിമര്ശിക്കുന്നത് ഒഴിവാക്കണം,'' തിരഞ്ഞെടുപ്പ് കമ്മീഷന് നോട്ടീസില് പറഞ്ഞു.
കഴിഞ്ഞയാഴ്ച മധ്യപ്രദേശിലെ ഭോപ്പാലില് ഒരു പൊതുസമ്മേളനത്തെ അഭിസംബോധന ചെയ്യവേ, പ്രിയങ്ക ഗാന്ധി ബിജെപിയ്ക്കെതിരെ ആഞ്ഞടിക്കുകയും സര്ക്കാര് നടത്തുന്ന കമ്പനികള് പ്രധാനമന്ത്രി നരേന്ദ്ര മോദിയുടെ വ്യവസായ സുഹൃത്തുക്കള്ക്ക് നല്കിയിട്ടുള്ളതായും പരാതിയില് അവകാശപ്പെട്ടു. 'കോണ്ഗ്രസ് ഐഐഎമ്മും എയിംസും പോലുള്ള വലിയ ആശുപത്രികളും കൊണ്ടുവന്നു. അതിന് പിന്നിലെ ജവഹര്ലാല് നെഹ്റുവിന്റെ ചിന്ത രാജ്യത്തെ മുന്നോട്ട് കൊണ്ടുപോകുന്ന അത്തരം സ്ഥാപനങ്ങള് സ്ഥാപിക്കുക എന്നതായിരുന്നു. എന്നാല്, സര്ക്കാര് ഉടമസ്ഥതയിലുള്ള കമ്പനികള് വ്യവസായികള്ക്ക് കൈമാറുകയും ജനങ്ങളില് നിന്ന് പണം വാങ്ങുകയും ചെയ്യുക എന്നത് ബിജെപിയുടെ നയമായി മാറിയിരിക്കുന്നു,''-പ്രിയങ്ക ഗാന്ധി പറഞ്ഞു.
പ്രധാനമന്ത്രി മോദി തന്റെ വ്യവസായ സുഹൃത്തുക്കള്ക്ക് പൊതുമേഖലാ സ്ഥാപനമായ ഭാരത് ഹെവി ഇലക്ട്രിക്കല്സ് ലിമിറ്റഡ് (ബിഎച്ച്ഇഎല്) വിട്ടുകൊടുത്തുവെന്നും പ്രിയങ്ക ഗാന്ധി ആരോപിച്ചു. അതിനിടെ, ആം ആദ്മി പാര്ട്ടിക്കും തിരഞ്ഞെടുപ്പ് കമ്മീഷന് കാരണം കാണിക്കല് നോട്ടീസ് നല്കി. പ്രധാനമന്ത്രി നരേന്ദ്ര മോദിക്കെതിരെ അപകീര്ത്തികരവും അപമാനകരവുമായ പോസ്റ്റുകള് സോഷ്യല് മീഡിയയില് ഷെയര് ചെയ്തതിനാണ് ആം ആദ്മി പാര്ട്ടിക്ക് തിരഞ്ഞെടുപ്പ് കമ്മീഷന് കാരണം കാണിക്കല് നോട്ടീസ് നല്കിയത്. ബിജെപിയുടെ പരാതിയിലാണ് നടപടി.
https://www.facebook.com/Malayalivartha
