കോണ്‍ഗ്രസ് നേതാവ് രാഹുല്‍ ഗാന്ധിയുടെ 'മെയ്ഡ് ഇന്‍ ചൈന' പരാമര്‍ശത്തില്‍ രൂക്ഷ വിമര്‍ശനവുമായി പ്രധാനമന്ത്രി. ചൈനയില്‍ നിര്‍മ്മിക്കുന്ന മൊബൈലുകളാണ് ഇന്ത്യയിലെ ആളുകള്‍ ഉപയോഗിക്കുന്നത് എന്നാണ് രാഹുല്‍ ഗാന്ധി പറഞ്ഞത്. 'മൂര്‍ഖോണ്‍ കെ സര്‍ദാര്‍ (വിഡ്ഢികളുടെ നേതാവ്) ഏത് ലോകത്താണ് ജീവിക്കുന്നത്' എന്നായിരുന്നു മോദിയുടെ പ്രതികരണം. മധ്യപ്രദേശിലെ ബെതൂല്‍ ജില്ലയില്‍ നടന്ന തിരഞ്ഞെടുപ്പ് പ്രചാരണ പൊതുയോഗത്തില്‍ സംസാരിക്കുകയായിരുന്നു അദ്ദേഹം.

മൊബൈല്‍ ഫോണ്‍ നിര്‍മ്മാണത്തിലെ ഇന്ത്യയുടെ സുപ്രധാന പുരോഗതിയെയും അദ്ദേഹം എടുത്തുപറഞ്ഞു. രാജ്യം ഇപ്പോള്‍ ഒരു ലക്ഷം കോടി രൂപയുടെ മൊബൈല്‍ ഫോണുകള്‍ കയറ്റുമതി ചെയ്യുന്നുണ്ടെന്നും മോദി വ്യക്തമാക്കി. 'ഇന്ത്യക്കാര്‍ക്ക് 'മെയ്ഡ് ഇന്‍ ചൈന' മൊബൈലുകള്‍ മാത്രമേയുള്ളൂവെന്ന് കോണ്‍ഗ്രസിലെ ഒരു 'മഹാജ്ഞാനി' ഇന്നലെ പറഞ്ഞു. വിഡ്ഢികളുടെ നേതാവ് ഏത് ലോകത്താണ് താമസിക്കുന്നത് രാജ്യത്തിന്റെ നേട്ടം കാണാന്‍ കഴിയാത്ത അവര്‍ എന്ത് വിദേശ കണ്ണടയാണ് ധരിക്കുന്നതെന്ന് ഞാന്‍ അത്ഭുതപ്പെടുന്നു,'' രാഹുല്‍ ഗാന്ധിയുടെ പേര് പരാമര്‍ശിക്കാതെ പ്രധാനമന്ത്രി പറഞ്ഞു.

'കോണ്‍ഗ്രസ് അധികാരത്തിലിരുന്നപ്പോള്‍ 20,000 കോടി രൂപയില്‍ താഴെയായിരുന്നു മൊബൈല്‍ ഫോണ്‍ നിര്‍മ്മാണം. ഇന്ന്, ഇന്ത്യയുടെ വ്യവസായം 3.5 ലക്ഷം കോടി രൂപയായി വളര്‍ന്നു. ഇന്ത്യയും ഒരു ലക്ഷം കോടി രൂപയുടെ മൊബൈല്‍ ഫോണുകള്‍ കയറ്റുമതി ചെയ്യുന്നു'-പ്രധാനമന്ത്രി മോദി പറഞ്ഞു. കോണ്‍ഗ്രസിനെതിരെ ആഞ്ഞടിച്ച പ്രധാനമന്ത്രി, പാര്‍ട്ടി പരാജയം ഏറ്റുവാങ്ങിയതായും തിരഞ്ഞെടുപ്പ് പ്രചാരണത്തിന്റെ അവസാന ഘട്ടത്തില്‍ ഭാഗ്യം പുനരുജ്ജീവിപ്പിക്കാന്‍ കാഴ്ചക്കാരിലേക്ക് തിരിയുകയാണെന്ന് പ്രധാനമന്ത്രി കൂട്ടിച്ചേര്‍ത്തു. മോദിയുടെ വാഗ്ദാനങ്ങള്‍ക്ക് മുന്നില്‍ തങ്ങളുടെ വ്യാജ വാഗ്ദാനങ്ങള്‍ പ്രവര്‍ത്തിക്കില്ലെന്ന് കോണ്‍ഗ്രസിന് അറിയാമെന്നും അദ്ദേഹം അരോപിച്ചു.

കഴിഞ്ഞ ദിവസം മധ്യപ്രദേശില്‍ ഒരു സമ്മേളനത്തെ അഭിസംബോധന ചെയ്ത് സംസാരിക്കവെ, ബിജെപി സര്‍ക്കാരിനെ വിമര്‍ശിക്കുകയും ചൈനീസ് ഉല്‍പ്പന്നങ്ങളാണ് ഇന്ത്യന്‍ വിപണിയെ നിയന്ത്രിക്കുന്നതെന്നും കോണ്‍ഗ്രസ് നേതാവ് രാഹുല്‍ ഗാന്ധി പറഞ്ഞിരുന്നു. സംഭവം നടന്ന് ഒരു ദിവസത്തിന് ശേഷമാണ് പ്രധാനമന്ത്രി മോദി ഇതിനെതിരെ പരിഹാസിച്ചുകൊണ്ട് രംഗത്തെത്തിയത്.

'ഇന്ന് നമ്മള്‍ ഷര്‍ട്ടുകളിലും ക്യാമറകളിലും മൊബൈല്‍ ഫോണുകളിലും 'മെയ്ഡ് ഇന്‍ ചൈന' എന്ന് കാണുന്നു. ഏതെങ്കിലും ഉല്‍പ്പന്നത്തില്‍ 'മെയ്ഡ് ഇന്‍ മധ്യപ്രദേശ്' എന്ന് എഴുതിയിരിക്കുന്നത് നിങ്ങള്‍ എപ്പോഴെങ്കിലും കണ്ടിട്ടുണ്ടോ സംസ്ഥാനത്തെ യുവാക്കള്‍ക്ക് തൊഴിലവസരങ്ങള്‍ ലഭിക്കുന്നതിനായി മധ്യപ്രദേശില്‍ ഫാക്ടറികള്‍ തുടങ്ങാനാണ് കോണ്‍ഗ്രസ് ആഗ്രഹിക്കുന്നത്. മധ്യപ്രദേശില്‍ നിര്‍മ്മിച്ച മൊബൈല്‍ ഫോണ്‍ ചൈനയിലെ യുവാക്കളുടെ കൈവശം വരുന്ന ഒരു ദിവസം വരുമെന്ന് ഞങ്ങള്‍ പ്രതീക്ഷിക്കുന്നു,'-രാഹുല്‍ ഗാന്ധി പറഞ്ഞു.