ഡല്‍ഹിയിലെ വായുവിന്റെ ഗുണനിലവാരം ഇന്ന വീണ്ടും 'ഗുരുതരമായി' മാറി. നഗരത്തിലെ എയര്‍ ക്വാളിറ്റി ഇന്‍ഡക്‌സ് (എക്യുഐ) രാവിലെ എട്ടിന് 401 ആയിരുന്നു. എല്ലാ ദിവസവും വൈകുന്നേരം നാലിന് രേഖപ്പെടുത്തിയ 24 മണിക്കൂര്‍ ശരാശരി എക്യുഐ, വ്യാഴാഴ്ച 390, ബുധനാഴ്ച 394, ചൊവ്വാഴ്ച 365, തിങ്കളാഴ്ച 348, ഞായറാഴ്ച 301 എന്നിങ്ങനെയാണ്.

അയല്‍പക്കത്തുള്ള ഗാസിയാബാദ് (386), ഗുരുഗ്രാം (321), ഗ്രേറ്റര്‍ നോയിഡ (345), നോയിഡ (344), ഫരീദാബാദ് (410) എന്നിവിടങ്ങളിലും ഗുണനിലവാരം താഴ്ന്നു.
പൂജ്യത്തിനും 50 നും ഇടയിലാണെങ്കില്‍ വായു നിലവാര സൂചിക മികച്ചത്' എന്നാണ് കണക്കാക്കുക. 51 നും 100 നും ഇടയിലാണെങ്കില്‍ തൃപ്തികരം', 101 നും 200 നും ഇടയില്‍ ഇടത്തരം', 201 നും 300 നും ഇടയില്‍ മോശം', 301 നും 400 നും ഇടയില്‍ വളരെ മോശം', 401 നും 500 നുമിടയില്‍ ഗുരുതരം' എന്നിങ്ങനെയാണ് കണക്കാക്കുന്നത്.


പൂനെ ആസ്ഥാനമായുള്ള ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ട്രോപ്പിക്കല്‍ മെറ്റീരിയോളജി വികസിപ്പിച്ച വായു ഗുണനിലവാര മുന്നറിയിപ്പ് സംവിധാനം അനുസരിച്ച്, അടുത്ത അഞ്ചോ ആറോ ദിവസത്തിനുള്ളില്‍ മലിനീകരണ തോത് വര്‍ധിക്കാനാണ് സാധ്യത. ഡല്‍ഹി സര്‍ക്കാരും കാണ്‍പൂരിലെ ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ടെക്‌നോളജിയും (ഐഐടി) സംയുക്തമായി നടത്തിയ പഠനത്തില്‍ തലസ്ഥാനത്തെ വായു മലിനീകരണത്തിന്റെ 38 ശതമാനവും വാഹനങ്ങള്‍ പുറന്തള്ളുന്നുവെന്നാണ് കണ്ടെത്തിയിട്ടുള്ളത്.