മിഷോങ് ചുഴലിക്കാറ്റിനെ തുടര്‍ന്ന് ചെന്നൈയില്‍ കനത്തമഴയും വെള്ളക്കെട്ടും രൂക്ഷമാകുകയാണ്. ഇപ്പോഴിതാ മിഷോങ് ചുഴലിക്കാറ്റിന്റെ ഭീകരത വ്യക്തമാക്കുന്ന വിഡിയോ പങ്കുവച്ചിരിക്കുകയാണ് നടന്‍ റഹ്മാന്‍. ഒരു അപ്പാര്‍ട്‌മെന്റിനു താഴെ പാര്‍ക്ക് ചെയ്തിരുന്ന വാഹനങ്ങള്‍ വെള്ളത്തിന്റെ ഒഴുക്കില്‍പെട്ടു പോകുന്ന ദൃശ്യങ്ങളാണ് റഹ്മാന്‍ പങ്കുവച്ച വീഡിയോയില്‍ ഉള്ളത്.

സമൂഹമാധ്യമങ്ങളില്‍ വ്യാപകമായി പ്രചരിക്കുന്ന വീഡിയോയാണ് റഹ്മാന്‍ തന്റെ ഇന്‍സ്റ്റഗ്രാം അക്കൗണ്ടിലൂടെ പങ്കുവച്ചത്. ചെന്നൈയിലെ അതിശക്തമായ മഴയും കാറ്റും കാരണം കാളിദാസ് ജയറാമും കൊച്ചിയിലേക്കുള്ള യാത്ര മാറ്റിവച്ചു. പുതിയ സിനിമയായ 'രജനി'യുടെ പ്രമോഷനുമായി ബന്ധപ്പെട്ടു കേരളത്തില്‍ ഇന്ന് എത്തേണ്ടിയിരുന്നതായിരുന്നു കാളിദാസ്.

ചുഴലിക്കാറ്റ് ചൊവ്വാഴ്ച പുലര്‍ച്ചെ കരതൊടുന്ന സാഹചര്യത്തില്‍ തമിഴ്നാട്ടില്‍ അതീവജാഗ്രത നിര്‍ദ്ദേശം പുറപ്പെടുവിച്ചിട്ടുണ്ട്. ചെന്നൈയില്‍നിന്നുള്ള 20 വിമാനസര്‍വീസുകള്‍ റദ്ദാക്കി. ചില വിമാനങ്ങള്‍ ബെംഗളൂരുവിലേക്കു തിരിച്ചുവിട്ടു. 23 വിമാനങ്ങള്‍ വൈകും അതിശക്തമായ മഴയും കാറ്റും തുടരുന്ന സാഹചര്യത്തില്‍ ചെന്നൈ നഗരത്തില്‍ പല സ്ഥലങ്ങളും വെള്ളത്തിനടയിലായി. പലയിടത്തും വൈദ്യതി ബന്ധം വിഛേദിച്ചു.

വൈകിട്ട് വരെ അതിശക്തമായ മഴ തുടരുമെന്നാണ് മുന്നറിയിപ്പ്. വടക്കന്‍ തമിഴ്നാട്ടില്‍ അതിശക്തമായ മഴയാണ് അനുഭവപ്പെടുന്നത്. തമിഴ്‌നാട്ടിലെ ദുരന്തനിവാരണ സേനയുടെ 14 ടീമുകള്‍, 350 പേര്‍, ദേശീയ ദുരന്ത നിവാരണ സേനയുടെ 225 പേര്‍ അടങ്ങുന്ന ഒമ്പത് ടീമുകള്‍ മയിലാടുംതുറൈ, നാഗപട്ടണം, തിരുവള്ളൂര്‍, കടലൂര്‍, വില്ലുപുരം, കാഞ്ചീപുരം, ചെന്നൈ തുടങ്ങിയ തീരപ്രദേശങ്ങളില്‍ നിലയുറപ്പിച്ചിട്ടുണ്ട്.

തമിഴ്‌നാട്, ഒഡീഷ, പുതുച്ചേരി ചീഫ് സെക്രട്ടറിമാരും ആന്ധ്രപ്രദേശിലെ റവന്യൂ, ദുരന്തനിവാരണ സ്‌പെഷ്യല്‍ ചീഫ് സെക്രട്ടറിയും സ്വീകരിച്ചുവരുന്ന തയ്യാറെടുപ്പ് നടപടികളെക്കുറിച്ച് എന്‍സിഎംസിയെ അറിയിച്ചു. താഴ്ന്ന പ്രദേശങ്ങള്‍ കണ്ടെത്തി ദുരിതാശ്വാസ കേന്ദ്രങ്ങളിലേക്ക് ആളുകളെ മാറ്റിപ്പാര്‍പ്പിക്കാന്‍ തുടങ്ങിയതായും അവര്‍ സമിതിയെ അറിയിച്ചു.

ഡിസംബര്‍ 4 മുതല്‍ 6 വരെ തെക്കന്‍ തീരപ്രദേശങ്ങളിലും അതിനോട് ചേര്‍ന്നുള്ള ഒഡീഷയുടെ തെക്കന്‍ ഉള്‍പ്രദേശങ്ങളിലും ഒറ്റപ്പെട്ട കനത്ത മഴയ്‌ക്കൊപ്പം മിക്ക സ്ഥലങ്ങളിലും നേരിയതോ മിതമായതോ ആയ മഴയ്ക്കും ഡിസംബര്‍ 5 ന് ഇതേ പ്രദേശത്ത് ഒറ്റപ്പെട്ട അതിശക്തമായ മഴയ്ക്കും സാധ്യതയുണ്ട്.