മദ്ധ്യപ്രദേശിലേയും ഛത്തീസ്ഗഢിലേയും മുഖ്യമന്ത്രിമാര്‍ ഇന്ന് സത്യപ്രതിജ്ഞ ചെയ്യും. മദ്ധ്യപ്രദേശ് മുഖ്യമന്ത്രിയായി മോഹന്‍ യാദവിനെയും ഛത്തീസ്ഗഢ് മുഖ്യമന്ത്രിയായി വിഷ്ണു ഡിയോ സായിയേയും നേരത്തെ പ്രഖ്യാപിച്ചിട്ടുണ്ടായിരുന്നു.

സത്യപ്രതിജ്ഞാ ചടങ്ങില്‍ പ്രധാനമന്ത്രി നരേന്ദ്ര മോദിയും മുതിര്‍ന്ന ബി ജെ പി നേതാക്കളും പങ്കെടുക്കും. തികച്ചും അപ്രതീക്ഷിതമായിട്ടായിരുന്നു ബി ജെ പി വിഷ്ണു ഡിയോ സായിയേയും മോഹന്‍ യാദവിനെയും മുഖ്യമന്ത്രിയായി പ്രഖ്യാപിച്ചത്.

ഒ ബി സി നേതാവായ മോഹന്‍ യാദവ് കഴിഞ്ഞ ചൗഹാന്‍ മന്ത്രിസഭയില്‍ ഉന്നത വിദ്യാഭ്യാസ മന്ത്രിയായിരുന്നു. ബി ജെ പിയെ വീണ്ടും അധികാരത്തിലെത്തിച്ച ചൗഹാന് വീണ്ടും മുഖ്യമന്ത്രി പദം നല്‍കുമെന്നായിരുന്നു കരുതിയിരുന്നത്.

ഛത്തീസ്ഗഢിലെ ആദ്യ ഗോത്ര വിഭാഗക്കാരനായ മുഖ്യമന്ത്രിയാണ് അമ്പത്തിയൊന്‍പതുകാരനായ വിഷ്ണു ഡിയോ സായി. നിയമസഭാ തിരഞ്ഞെടുപ്പില്‍ കുങ്കുരിയില്‍ നിന്നാണ് ജയിച്ചത്. 2020 മുതല്‍ 2022 വരെ ബിജെപിയുടെ സംസ്ഥാന പ്രസിഡന്റായിരുന്നു ഇദ്ദേഹം. 1994, 2004, 2009, 2014 തുടങ്ങിയ വര്‍ഷങ്ങളില്‍ റായ്ഗഡ് മണ്ഡലത്തില്‍ നിന്നും മത്സരിച്ച് തുടര്‍ച്ചയായി വിജയിച്ചു.

അതേസമയം, രാജസ്ഥാന്‍ മുഖ്യമന്ത്രിയായി ഭജന്‍ലാല്‍ ശര്‍മ ഈ മാസം പതിനഞ്ചിന് സത്യപ്രതിജ്ഞ ചെയ്യും. തികച്ചും അപ്രതീക്ഷിതമായിട്ട് തന്നെയായിരുന്നു ബി ജെ പി കന്നി എം എല്‍ എയായ ബ്രാഹ്മണ നേതാവ് ഭജന്‍ലാല്‍ ശര്‍മ്മയെ മുഖ്യമന്ത്രിയായി പ്രഖ്യാപിച്ചത്.