കേരളത്തിനു പിന്നാലെ തമിഴ്നാടും...സംസ്ഥാനത്തെ സ്കൂള് അധ്യാപികമാര്ക്ക് ചുരിദാര് ധരിച്ചു ജോലിക്കെത്താം
കേരളത്തിനു പിന്നാലെ തമിഴ്നാടും...സംസ്ഥാനത്തെ സ്കൂള് അധ്യാപികമാര്ക്ക് ചുരിദാര് ധരിച്ചു ജോലിക്കെത്താം.ദീര്ഘനാളായുള്ള ആവശ്യത്തിനു വിദ്യാഭ്യാസ മന്ത്രി അന്പില് മഹേഷ് പൊയ്യാമൊഴി പച്ചക്കൊടി വീശി.
സര്ക്കാര് സ്കൂളുകളില് ജോലി ചെയ്യുന്ന അധ്യാപികമാര്ക്ക് അവരുടെ ഇഷ്ടമനുസരിച്ച് സാരിയും ചുരിദാറും അടക്കമുള്ള വസ്ത്രങ്ങള് ധരിക്കാമെന്ന് മന്ത്രി പറഞ്ഞു. നിയമങ്ങള്ക്കു വിധേയമായി, എന്തു വസ്ത്രം ധരിക്കണമെന്ന് തീരുമാനിക്കേണ്ടത് ഓരോ വ്യക്തിയുമാണെന്നു മന്ത്രി വ്യക്തമാക്കി.
തമിഴ്നാട്ടിലെ സ്കൂളുകളില് അധ്യാപികമാര് സാരി ധരിക്കണമെന്നാണ് നിര്ദേശിച്ചിട്ടുള്ളത്. പുരുഷ അധ്യാപകര് പാന്റ്സും ഷര്ട്ടും അല്ലെങ്കില് മുണ്ടും ഷര്ട്ടും ധരിച്ചാണ് സ്കൂളിലെത്തുന്നത്. വനിതാ അധ്യാപകരെ ചുരിദാര് ധരിക്കാന് അനുവദിക്കണമെന്ന് ആവശ്യപ്പെട്ട് അധ്യാപക സംഘടനകളടക്കം രംഗത്തെത്തിയിരുന്നെങ്കിലും വിദ്യാഭ്യാസ വകുപ്പില്നിന്ന് അനുകൂല പ്രതികരണം ലഭിച്ചിരുന്നില്ല. സര്ക്കാര് ജീവനക്കാരുടെ വസ്ത്രധാരണം സംബന്ധിച്ച് 2019 ജൂണില് പുറപ്പെടുവിച്ച ഉത്തരവ് പ്രകാരം, വൃത്തിയുള്ളതും ഓഫിസിന് യോജ്യമായതുമായ വസ്ത്രങ്ങള് ധരിക്കാമെന്ന് വ്യക്തമാക്കിയിരുന്നു.
വനിതാ ജീവനക്കാര്ക്ക് സാരി, സല്വാര് കമ്മീസ്, ചുരിദാര്, ദുപ്പട്ട എന്നിവ ധരിക്കാമെന്നും പുരുഷ ജീവനക്കാര് പാന്റ്സ്ഷര്ട്ട്, ദോത്തി അല്ലെങ്കില് ഇന്ത്യന് സംസ്കാരം പ്രതിഫലിപ്പിക്കുന്ന ഏത് വസ്ത്രവും ധരിക്കാമെന്നായിരുന്നു ഉത്തരവ്. ഈ ഉത്തരവിനെ തുടര്ന്ന് അധ്യാപികമാര് ചുരിദാര് ധരിക്കാനുള്ള അനുമതിക്കായി വിദ്യാഭ്യാസ വകുപ്പിനെ സമീപിച്ചെങ്കിലും ആവശ്യം അംഗീകരിക്കപ്പെട്ടില്ല. ഈ സാഹചര്യത്തിലാണ് അധ്യാപികമാരുടെ ആവശ്യത്തെ അംഗീകരിക്കുന്ന നടപടിയുമായി മന്ത്രി തന്നെ രംഗത്തെത്തിയത്.
വനിതാ അധ്യാപകര്ക്ക് അവരവരുടെ ഇഷ്ടാനുസരണം സാരിയും ചുരിദാറും അടക്കമുള്ള വസ്ത്രങ്ങള് ധരിക്കാമെന്നു അദ്ദേഹം പറഞ്ഞു. എന്ത് ധരിക്കണമെന്നത് തിരഞ്ഞെടുക്കാന് നിയമപ്രകാരം ജീവനക്കാര്ക്ക് അവകാശമുണ്ടെന്നും 'കനവാശ്രിയര്' പുരസ്കാരദാന ചടങ്ങില് പങ്കെടുക്കവേ മന്ത്രി പറഞ്ഞു.
അതേസമയം വര്ഷങ്ങള്ക്കു മുന്പു തന്നെ കേരളത്തിലെ അധ്യാപികമാര്ക്ക് ചുരിദാര് ധരിക്കാന് അനുവാദം നല്കിയിരുന്നു.
"
https://www.facebook.com/Malayalivartha
