മുല്ലപ്പെരിയാര്‍ അണക്കെട്ടിലെ ജലനിരപ്പ് 140 അടി പിന്നിട്ടതോടെ തമിഴ്‌നാട് ആദ്യ മുന്നറിയിപ്പ് നല്‍കി. മൂന്നു ദിവസമായി പ്രദേശങ്ങളില്‍ മഴ മാറിനിന്നെങ്കിലും വ്യാഴം ഉച്ചയോടെ നേരിയ മഴ വീണ്ടും ആരംഭിച്ചു. തേനി ജില്ലയിലും സമാനമായ കാലാവസ്ഥയാണ്.

വ്യാഴം രാവിലെ ആറിന് 139.85 അടിയായിരുന്ന ജലനിരപ്പ് ഉച്ചയ്ക്ക് 12ന് 140 അടി എത്തി. വൈകിട്ട് നാലോടെ ഒരു പോയിന്റ് വര്‍ധിച്ച് 140.1 എത്തി. കഴിഞ്ഞവര്‍ഷം ഇതേദിവസം അണക്കെട്ടില്‍ 141.70 അടി വെള്ളം ഉണ്ടായിരുന്നു.

മഴ മാറിനിന്ന ദിവസങ്ങളിലും അണക്കെട്ടിലേക്ക് ഉയര്‍ന്ന തോതിലുള്ള നീരൊഴുക്കുണ്ടായിരുന്നു. ഇന്നലെ രാവിലെ ആറു വരെയുള്ള 24 മണിക്കൂറിനുള്ളില്‍ അണക്കെട്ടിലേക്ക് സെക്കന്റില്‍ 2023 ഘനയടി വീതം വെള്ളം ഒഴുകിയെത്തിയപ്പോള്‍ തമിഴ്‌നാട് 300 ഘനയടി വീതമാണ് കൊണ്ടുപോയത്. വ്യാഴം രാവിലെ ആറു വരെയുള്ള 24 മണിക്കൂറിനുള്ളില്‍ തേക്കടിയില്‍ 1.2 മില്ലിമീറ്റര്‍ മഴയാണ് പെയ്തത്.


മുല്ലപ്പെരിയാര്‍ ജലം ശേഖരിക്കുന്ന വൈഗ അണക്കെട്ടിലെ ജലനിരപ്പ് സംഭരണശേഷിയോട് അടുത്തതിനാല്‍, മഴ തുടര്‍ന്നാല്‍ തമിഴ്‌നാടിന് മുല്ലപ്പെരിയാറില്‍ നിന്നും വെള്ളം ഇടുക്കിയിലേക്ക് തുറന്നു വിടേണ്ടിവന്നേക്കും. തമിഴ്‌നാട് സ്പില്‍വേ ഷട്ടര്‍ തുറക്കാന്‍ സാധ്യതയുള്ളത് ജലനിരപ്പ് 142 അടി പിന്നിടുന്ന സാഹചര്യം എത്തിയാല്‍ മാത്രം.