ഇന്ത്യയുടെ സമ്പദ്വ്യവസ്ഥ വളരുകയാണ്, എന്നാല്‍ സമ്പത്ത് ഏതാനും കൈകളില്‍ മാത്രം കേന്ദ്രീകരിക്കപ്പെടുകയാണെന്നും തൊഴിലില്ലായ്മയുടെ വെല്ലുവിളി തുടരുകയാണെന്നും കേന്ദ്ര സര്‍ക്കാരിനെ രൂക്ഷമായി വിമര്‍ശിച്ച് കോണ്‍ഗ്രസ് നേതാവ് രാഹുല്‍ ഗാന്ധി. ഹാര്‍വാര്‍ഡ് യൂണിവേഴ്സിറ്റിയിലെ ചില വിദ്യാര്‍ത്ഥികളുമായുള്ള സംവാ?ദത്തിനിടയിലാണ്, കഴിഞ്ഞ 10 വര്‍ഷത്തെ ഇന്ത്യയുടെ സാമ്പത്തിക വളര്‍ച്ചയെക്കുറിച്ച് ചോദ്യം ഉയര്‍ന്നത്. സാമ്പത്തിക വികസനത്തെ കുറിച്ച് പറയുമ്പോള്‍ ആ സാമ്പത്തിക വികസനം ആരുടെ താല്‍പ്പര്യത്തിലാണ് എന്ന ചോദ്യമാണ് ചോദിക്കേണ്ടതെന്നും കോണ്‍ഗ്രസ് നേതാവ് പ്രതികരിച്ചു.

''രാജ്യത്തിന്റെ സാമ്പത്തിക പുരോഗതിയെക്കുറിച്ച് സംസാരിക്കുമ്പോള്‍ അവ, ആരുടെ താത്പര്യമാണെന്നുള്ള ചോദ്യമാണ് വേണ്ടത്. രാജ്യത്തിന്റെ വളര്‍ച്ച ഏതുതരത്തില്‍, അവ ആര്‍ക്ക് ഗുണപ്രദമാകുമെന്നും അറിയണം. രാജ്യത്തിന്റെ വളര്‍ച്ചയോട് തന്നെ ചേര്‍ത്തു നിര്‍ത്തേണ്ടതാണ് തൊഴിലില്ലായ്മയുടെ കണക്കുകള്‍. രാജ്യം വളരുന്നു. എന്നാല്‍ ധനം ഒരുവിഭാഗം ആളുകള്‍ക്ക മാത്രം ഗുണം ചെയ്യുന്ന തരത്തിലാണ് വളരുന്നത്. ആളുകള്‍ക്ക് നിരവധി തൊഴില്‍ ലഭിക്കുന്ന ഉത്പാദനക്ഷമമായ സാമ്പത്തികരംഗമാണ് രാജ്യത്തിന് ആവശ്യം'' അദ്ദേഹം പറഞ്ഞു.

'നിങ്ങള്‍ക്ക് ഒരു ന്യായമായ മാധ്യമം, ന്യായമായ നിയമസംവിധാനം, ന്യായമായ തിരഞ്ഞെടുപ്പ് കമ്മീഷന്‍, ധനസഹായം, നിഷ്പക്ഷമായ സ്ഥാപനങ്ങള്‍ എന്നിവ ആവശ്യമാണ്. ഞങ്ങളുടെ സന്ദേശം ലഭ്യമാക്കാന്‍ മറ്റ് മാര്‍ഗങ്ങളില്ലാത്തതിനാല്‍ ഞാന്‍ 4,000 കിലോമീറ്റര്‍ നടന്നു,' തന്റെ ഭാരത് ജോഡോ യാത്രയെ പരാമര്‍ശിച്ചുകൊണ്ട് അദ്ദേഹം പറഞ്ഞു. 'എന്റെ സോഷ്യല്‍ മീഡിയ പോലും പൂര്‍ണ്ണമായും അടച്ചിരിക്കുന്നു. എന്റെ ട്വിറ്റര്‍ നിയന്ത്രണത്തിലാണ്, എന്റെ യൂട്യൂബ് നിയന്ത്രണത്തിലാണ്, എനിക്ക് മാത്രമല്ല മുഴുവന്‍ പ്രതിപക്ഷത്തിന്റെയും അവസ്ഥ ഇതാണ്. രാജ്യത്തെ ഒറ്റ ആശയവും ഒറ്റമതവും ഒറ്റഭാഷയുമുള്ള രാഷ്ട്രമായിട്ടാണ് കേന്ദ്ര സര്‍ക്കാര്‍ കണക്കാക്കുന്നതെന്നും അദ്ദേഹം കുറ്റപ്പെടുത്തി.

'അതിനാല്‍ അവര്‍ ചര്‍ച്ചകള്‍ ഇല്ലാതാക്കുന്നു. അവര്‍ സ്ഥാപനങ്ങള്‍ പിടിച്ചെടുക്കാന്‍ ശ്രമിക്കുന്നു. അതിനാല്‍ ഇതാണ് യഥാര്‍ത്ഥത്തില്‍ ഇന്ത്യയിലെ രാഷ്ട്രീയ പോരാട്ടം,' അദ്ദേഹം പറഞ്ഞു. മണിപ്പൂര്‍ കത്തുന്നത് നിങ്ങള്‍ക്ക് കാണാം, ജമ്മു കശ്മീര്‍ കത്തുന്നത് കാണാം. തമിഴ്നാടിന് പ്രശ്നമുണ്ടെന്ന് നിങ്ങള്‍ക്ക് അറിയാം...,' അദ്ദേഹം കൂട്ടിച്ചേര്‍ത്തു.