രഥ പ്രദക്ഷണത്തിനിടെ ഇലക്ട്രിക് വയറില്‍ നിന്ന് ഷോക്കേറ്റ് 13 കുട്ടികള്‍ക്ക് പരിക്കേറ്റു.ആന്ധ്രാപ്രദേശിലെ കുര്‍ണൂല്‍ ജില്ലയിലെ തേക്കൂര്‍ ഗ്രാമത്തില്‍ രഥ പ്രദക്ഷണത്തിനിടെയാണ് ഹൈ-വോള്‍ട്ടേജ് ഇലക്ട്രിക് വയറില്‍ നിന്ന് ഷോക്കേറ്റ് 13 കുട്ടികള്‍ക്ക് പരിക്കേറ്റത്. ആന്ധ്രാപ്രദേശിലെ ഉഗാദി ഘോഷയാത്രയുടെ ഭാഗമായുള്ള രഥ പ്രദക്ഷണത്തിനിടെയാണ് സംഭവം. സംഭവത്തില്‍ വൈദ്യുതാഘാതമേറ്റ കുട്ടികളെ ചികിത്സയ്ക്കായി കുര്‍ണൂലിലെ അടുത്തുള്ള ആശുപത്രിയില്‍ പ്രവേശിപ്പിച്ചു. കുട്ടികളുടെ ജീവന് അടിയന്തര ഭീഷണിയില്ലെന്ന് ഡോക്ടര്‍മാര്‍ സ്ഥിരീകരിച്ചു.

തെലുങ്ക് കലണ്ടറിലെ പുതുവര്‍ഷത്തിന്റെ തുടക്കമാണ് ഉഗാദി. തെലങ്കാന, ആന്ധ്രാപ്രദേശ്, കര്‍ണാടക എന്നിവിടങ്ങളിലെ ആളുകള്‍ ചൈത്ര നവരാത്രിയുടെ ആദ്യ ദിവസം ആഘോഷിക്കുന്നു. 'ഇന്ന് രാവിലെ ഉഗാദി ഉത്സവത്തിന്റെ സമാപനത്തിന് ശേഷം 13 കുട്ടികള്‍ക്ക് വൈദ്യുതാഘാതമേറ്റ് പരിക്കേറ്റു. എല്ലാ പരിക്കുകളും 10 ശതമാനത്തില്‍ താഴെയാണ്, മരണമൊന്നും രേഖപ്പെടുത്തിയിട്ടില്ല,' കുര്‍ണൂല്‍ റൂറല്‍ പോലീസ് സ്റ്റേഷന്‍ സര്‍ക്കിള്‍ ഇന്‍സ്‌പെക്ടര്‍ കിരണ്‍ കുമാര്‍ റെഡ്ഡി പറഞ്ഞു.

വൈഎസ്ആര്‍സിപി നേതാവും പനയം എംഎല്‍എയുമായ കടസാനി രാമഭൂപാല്‍ റെഡ്ഡിയും നന്ദ്യാല ടിഡിപി സ്ഥാനാര്‍ഥി ബൈറെഡ്ഡി ശബരിയും പരിക്കേറ്റ കുട്ടികളെ കാണാന്‍ ആശുപത്രിയിലെത്തി.സംഭവത്തില്‍ ആശങ്ക പ്രകടിപ്പിച്ച ടിഡിപിയുടെ ബൈറെഡ്ഡി ശബരി, ഭാവിയില്‍ ഇത്തരം സംഭവങ്ങള്‍ ഉണ്ടാകാതിരിക്കാന്‍ പ്രതിരോധ നടപടികളുടെ ആവശ്യകത ഊന്നിപ്പറഞ്ഞു.