ബി.ജെ.പി തമിഴ്‌നാട് അധ്യക്ഷനും കോയമ്പത്തൂര്‍ ലോക്‌സഭ മണ്ഡലം സ്ഥാനാര്‍ഥിയുമായ കെ. അണ്ണാമലൈക്കെതിരെ തെരഞ്ഞെടുപ്പ് പെരുമാറ്റച്ചട്ട ലംഘനത്തിന് കേസെടുത്തു.

രാത്രി പത്തിന് ശേഷം തെരഞ്ഞെടുപ്പ് പ്രചാരണം നടത്തിയതിന് കോയമ്പത്തൂര്‍ പീളമേട് പൊലീസാണ് കേസെടുത്തത്. രാത്രി പത്തിന് ശേഷം നഗരത്തിലെ ആവരം പാളയത്ത് നടന്ന പ്രചാരണവുമായി ബന്ധപ്പെട്ട് അണ്ണാമലൈ, ബി.ജെ.പി കോയമ്പത്തൂര്‍ പ്രസിഡന്റ് രമേഷ് കുമാര്‍, ജില്ലാ ട്രഷറര്‍ സെന്തില്‍ കുമാര്‍ എന്നിവ?ര്‍ക്കെതിരെ കേസെടുത്തതായി പൊലീസ് .

തെരഞ്ഞെടുപ്പ് സെല്ലിലെ ഉദ്യോഗസ്ഥന്‍ നല്‍കിയ പരാതിയുടെ അടിസ്ഥാനത്തിലാണ് ചട്ടലംഘനത്തിന് കേസെടുത്തത്. രാത്രി 10 വരെയാണ് പ്രചാരണത്തിന് അനുമതിയുള്ളത്. നേരത്തെ, അണ്ണാമലൈക്കെതിരെ ഡി.എം.കെ തെരഞ്ഞെടുപ്പ് കമീഷന് പരാതി നല്‍കിയിരുന്നു. കന്നി വോട്ടര്‍മാര്‍ക്കായി ക്രിക്കറ്റ്, ഫുട്ബാള്‍ മത്സരങ്ങള്‍ സംഘടിപ്പിച്ചതുമായി ബന്ധപ്പെട്ടാണ് പരാതി.

മത്സരങ്ങളുമായി ബന്ധപ്പെട്ട ബോര്‍ഡുകളില്‍ നരേന്ദ്ര മോദിയുടെയും അണ്ണാമലൈയുടെയും ചിത്രങ്ങളും ഉള്‍പ്പെടുത്തിയത് പരാതിയില്‍ ചൂണ്ടിക്കാട്ടുകയും ചെയ്യുന്നു.