ബോളിവുഡ് താരം സല്‍മാന്‍ ഖാന്റെ വീടിന് നേരെ വെടിവച്ച കേസിലെ അന്വേഷണത്തില്‍ വഴിത്തിരിവ്. വെടിവയ്പ്പ് ആസ്രൂത്രണം ചെയ്തത് യുഎസിലുള്ള ഗുണ്ടാ സംഘങ്ങളാണെന്ന് മുംബയ് പൊലീസിന് വിവരം ലഭിച്ചതായി ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു. ഗുണ്ടാത്തലവന്‍ ലോറന്‍സ് ബിഷ്ണോയിയുടെ ഇളയ സഹോദരന്‍ അന്‍മോല്‍ ബിഷ്ണോയി ഫേസ്ബുക്ക് പോസ്റ്റ് പങ്കുവച്ചുകൊണ്ട് വെടിവയ്പ്പിന്റെ ഉത്തരവാദിത്തം ഏറ്റെടുത്തിരുന്നു. ഈ പോസ്റ്റ് കേന്ദ്രീകരിച്ച് പൊലീസ് വിശദമായ അന്വേഷണം നടത്തിയിരുന്നു.

പോസ്റ്റ് പങ്കുവച്ച ഐപി അഡ്രസ് കാനഡയില്‍ നിന്നുള്ളതാണെന്നും ഇതിന്റെ യഥാര്‍ത്ഥ ലൊക്കേഷന്‍ യുഎസിലെ കാലിഫോര്‍ണിയയിലാണെന്ന് പൊലീസ് കണ്ടെത്തി. അതുകൊണ്ട് തന്നെ വെടിവയ്പ്പ് ആസൂത്രണം ചെയ്തത് യുഎസിലാണെന്ന അനുമാനത്തിലാണ് പൊലീസ്. ഗായകന്‍ സിദ്ദു മൂസെവാലയുടെ കൊലപാതകം അടക്കം നിരവധി കുറ്റകൃത്യങ്ങളില്‍ പൊലീസ് അന്വേഷിക്കുന്നയാളാണ് അന്‍മോല്‍ ബിഷ്ണോയി. സല്‍മാന്‍ കേസില്‍ ഇയാളെ കൂടാതെ യുഎസിലുള്ള മറ്റൊരു ഗുണ്ടാത്തലവനും ഉള്‍പ്പെട്ടിട്ടുണ്ടെന്നാണ് വിവരം.

നിലവില്‍ യുഎസില്‍ താമസിക്കുന്ന ഗുണ്ടാത്തലവന്‍ രോഹിത് ഗോദരയെയാണ് ഷൂട്ടര്‍മാരെ തിരഞ്ഞെടുക്കാന്‍ അന്‍മോല്‍ ബിഷ്ണോയി ചുമതലപ്പെടുത്തിയത്. ഒരു മാസങ്ങള്‍ക്ക് മുമ്പ് പദ്ധതി ആസൂത്രണം ചെയ്തെന്നാണ് പൊലീസ് കരുതുന്നത്. വിവിധ സംസ്ഥാനങ്ങളിലായി പ്രൊഫഷണല്‍ ഷൂട്ടര്‍മാരുള്ള ഗുണ്ടാസംഘമാണ് രോഹിത് ഗോദരയ്ക്കുള്ളത്. മഹാരാഷ്ട്ര, ഡല്‍ഹി, രാജസ്ഥാന്‍, പഞ്ചാബ് എന്നീ സംസ്ഥാനങ്ങളില്‍ രോഹിത് പറഞ്ഞാല്‍ എന്തും ചെയ്യുന്ന ഗുണ്ടകള്‍ ഈ സംഘത്തിനുണ്ട്.

ലോറന്‍സ് ബിഷ്ണോയിയുടെ ഏറ്റവും അടുത്ത അനുയായിയാണ് രോഹിത്. പല ഉന്നതരുടെ കൊലപാതകത്തിലും രോഹിത്തിന് കൃത്യമായ പങ്കുണ്ടെന്നാണ് വിവരം. ഇയാളാണ് ആക്രമികള്‍ക്ക് തോക്ക് അടക്കമുള്ള സൗകര്യങ്ങള്‍ ഏര്‍പ്പെടുത്തി നല്‍കിയത്. കര്‍ണി സേന തലവന്‍ സുഖ്ദേവ് സിംഗ് ഗോഗമേദിയുടെ കൊലപാതകത്തിലും ഗുണ്ടാത്തലവന്‍ രാജു തേത്തിന്റെ കൊലപാതകത്തിലും ഇയാള്‍ക്ക് സുപ്രധാന പങ്കുണ്ട്.

ലോറന്‍സ് ബിഷ്ണോയിക്കും സംഘത്തിനും വിവിധ സംസ്ഥാനങ്ങളിലെ അനുയായികളുടെ വീടുകളില്‍ വലിയ ആയുധശേഖരമുണ്ടെന്നാണ് വിവരം. സല്‍മാന്‍ ഖാന്റെ വീടിന് പുറത്ത് വെടിയുതിര്‍ക്കാന്‍ ഉപയോഗിച്ച ആയുധങ്ങള്‍ ഈ ശൃംഖല വഴിയാണ് രോഹിത് ഗോദാര എത്തിച്ചതെന്നും സംശയിക്കുന്നു.