പ്രധാനമന്ത്രി നരേന്ദ്ര മോദി വീണ്ടും അധികാരത്തില്‍ വന്നാല്‍ രാജ്യം 200 വര്‍ഷം പിന്നോട്ട് പോകുമെന്ന് തമിഴ്നാട് മുഖ്യമന്ത്രിയും ഡിഎംകെ നേതാവുമായ എംകെ സ്റ്റാലിന്‍ പറഞ്ഞു. ഡിഎംകെ സ്ഥാനാര്‍ത്ഥി ടി ആര്‍ ബാലുവിനെ പിന്തുണച്ച് ശ്രീപെരുമ്പത്തൂരില്‍ സംഘടിപ്പിച്ച റാലിയെ അഭിസംബോധന ചെയ്ത് സംസാരിക്കുകയായിരുന്ന് അദ്ദേഹം. 'പ്രധാനമന്ത്രി മോദി വീണ്ടും അധികാരത്തില്‍ വന്നാല്‍ രാജ്യം 200 വര്‍ഷം പിന്നോട്ട് പോകും, ചരിത്രം തിരുത്തിയെഴുതപ്പെടും, അതുപോലെ ശാസ്ത്രവും പിന്നോട്ട് തള്ളപ്പെടും. അന്ധവിശ്വാസ കഥകള്‍ക്ക് പ്രാധാന്യം നല്‍കുകയും ഡോ.ബി.ആര്‍.അംബേദ്കറുടെ ഭരണഘടന ആര്‍.എസ്.എസ് തിരുത്തുമെന്നും അദ്ദേഹം പറഞ്ഞു. ഇതിനെതിരായ ഏക ആയുധം വോട്ടാണെന്നും സ്റ്റാലിന്‍ കൂട്ടിച്ചേര്‍ത്തു.

ബിജെപിക്കുള്ള വോട്ട് തമിഴ്നാടിന്റെ ശത്രുവിനുള്ള വോട്ടാണ്. എഐഎഡിഎംകെക്കുള്ള വോട്ട് സംസ്ഥാനത്തെ വഞ്ചിക്കുന്നവര്‍ക്കുള്ള വോട്ടാണെന്നും അദ്ദേഹം പറഞ്ഞു.

എഐഎഡിഎംകെയ്ക്ക് വോട്ട് ചെയ്യുന്നത് ബിജെപിക്ക് വോട്ട് ചെയ്യുന്നതിന് തുല്യമാണെന്നും എഐഎഡിഎംകെക്കെതിരെ ആഞ്ഞടിച്ച് സ്റ്റാലിന്‍ പറഞ്ഞു. എഐഎഡിഎംകെയെയും ബിജെപിയെയും സ്വാഭാവിക സഖ്യകക്ഷികളെന്നാണ് വിളിച്ചിരുന്നത്. എന്നാല്‍ ഇപ്പോള്‍ അവര്‍ വേര്‍പിരിഞ്ഞതുപോലെയാണ് പെരുമാറുന്നത്. ഭൂരിപക്ഷം ആവശ്യമുള്ള സാഹചര്യത്തില്‍ പാര്‍ട്ടി ബിജെപിയെ പിന്തുണയ്ക്കുമോയെന്ന ചോദ്യത്തിന് എടപ്പാടി കെ പളനിസ്വാമി എഐഎഡിഎംകെ പിന്തുണയ്ക്കില്ലെന്ന് പറഞ്ഞില്ല. കാത്തിരുന്നു കാണൂ എന്നായിരുന്നു ബിജെപിയുടെ മറുപടി.

തനിക്ക് കേന്ദ്രത്തില്‍ നിന്ന് നിരവധി അവാര്‍ഡുകള്‍ ലഭിച്ചിട്ടുണ്ടെന്ന മുന്‍ മുഖ്യമന്ത്രിയും എഐഎഡിഎംകെ ജനറല്‍ സെക്രട്ടറിയുമായ പളനിസ്വാമിയുടെ അവകാശവാദത്തോട് പ്രതികരിച്ച സ്റ്റാലിന്‍, 'അടിമകളില്‍ ഏറ്റവും മികച്ചവനാണ്' എന്നതിനാണ് പളനിസ്വാമിക്ക് അവാര്‍ഡുകള്‍ ലഭിച്ചതെന്ന് പറഞ്ഞു. 'തമിഴ്‌നാടിന്റെ വികസനത്തിനായി ഞങ്ങള്‍ പദ്ധതികള്‍ ശ്രദ്ധാപൂര്‍വം നടപ്പിലാക്കുമ്പോള്‍, തനിക്ക് കേന്ദ്രത്തില്‍ നിന്ന് അവാര്‍ഡുകള്‍ ലഭിച്ചുവെന്ന് പളനിസ്വാമി അവകാശപ്പെടുന്നു, നിങ്ങള്‍ക്ക് ഏറ്റവും മികച്ച അടിമ എന്ന അവാര്‍ഡ് ലഭിച്ചു, പക്ഷേ ഞങ്ങള്‍ക്ക് ജനങ്ങളുടെ അവാര്‍ഡ് ലഭിച്ചു, ഞങ്ങള്‍ക്ക് മറ്റൊരു അവാര്‍ഡ് ലഭിക്കും. ജൂണ്‍ നാലിന്.' അദ്ദേഹം പറഞ്ഞു. തമിഴ്നാട്ടില്‍ ബിജെപി വിജയിക്കുമെന്ന് പറഞ്ഞ് ആരോ പ്രധാനമന്ത്രി മോദിയെ വഞ്ചിക്കുകയാണെന്നും അദ്ദേഹം പറഞ്ഞു. ''രാജ്യത്തിന്റെ സുരക്ഷ ഇന്ത്യാ സഖ്യത്തിന്റെ കൈകളിലാണെന്ന് ആളുകള്‍ വിശ്വസിക്കുന്നു,'' അദ്ദേഹം കൂട്ടിച്ചേര്‍ത്തു.