ശ്രീലങ്കയില്‍നിന്ന് ഇന്ത്യയിലേക്കു നീന്തുന്നതിനിടെ 78-കാരനായ ബെംഗളൂരു സ്വദേശിക്ക് ദാരുണാന്ത്യം. ഗോപാല്‍ റാവുവാണ് മരിച്ചത്. ഹൃദയാഘാതമാണ് മരണ കാരണമായത്. തലൈമന്നാറില്‍നിന്ന് പാക് ഉള്‍ക്കടലിലൂടെ ധനുഷ്‌കോടി വരെ റിലേനീന്തല്‍ നടത്തിയ 31 അംഗ സംഘത്തിലെ അംഗമായിരുന്നു.

ചൊവ്വാഴ്ച പുലര്‍ച്ചെ 12.10-ന് തലൈമന്നാറില്‍ നിന്ന് ഇവര്‍ നീന്താന്‍ തുടങ്ങി. നിരയിലെ മൂന്നാമത്തെ ആളായിരുന്നു ഗോപാല്‍ റാവു. പുലര്‍ച്ചെ 3.10-ഓടെ പെട്ടെന്ന് അദ്ദേഹത്തിന് നെഞ്ചുവേദന അനുഭവപ്പെടുകയും ഉടന്‍തന്നെ നീന്തല്‍ക്കാരെ അനുഗമിക്കുന്ന ബോട്ടില്‍ കയറ്റി. തുടര്‍ന്ന് മെഡിക്കല്‍ സംഘം മരണം സ്ഥിരീകരിക്കുകയായിരുന്നു.

ദുഃഖസൂചകമായി മറ്റു നീന്തല്‍ താരങ്ങള്‍ റിലേ റദ്ദാക്കി ബോട്ടില്‍ ധനുഷ്‌കോടിയിലേക്കു മടങ്ങി. മൃതദേഹം പോസ്റ്റ്‌മോര്‍ട്ടത്തിനായി രാമേശ്വരം സര്‍ക്കാരാശുപത്രിയില്‍ എത്തിച്ചു. സംഭവത്തില്‍ രാമേശ്വരം ടൗണ്‍ പോലീസ് കേസെടുത്തു.

ഇന്ത്യ, ശ്രീലങ്ക സര്‍ക്കാരുകളില്‍നിന്നുള്ള മുന്‍കൂര്‍ അനുമതിയോടെയാണ് തങ്ങള്‍ നീന്തല്‍ റിലേ നടത്തിയതെന്ന് സംഘാംഗങ്ങള്‍ പറഞ്ഞു.