24 വര്ഷത്തെ നിയമപോരാട്ടം... ഒടുവില് അഞ്ച് മാസത്തെ തടവിന് ശിക്ഷിച്ച് കോടതി
മാനനഷ്ടക്കേസില് 24 വര്ഷത്തെ നിയമപോരാട്ടത്തിനൊടുവില് സാമൂഹിക പ്രവര്ത്തക മേധാ പട്കറിനെ ഡല്ഹി കോടതി അഞ്ച് മാസത്തെ തടവിന് ശിക്ഷിച്ചു. ഡല്ഹി ലെഫ്റ്റനന്റ് ഗവര്ണറായ വികെ സക്സേനയ്ക്ക് 10 ലക്ഷം രൂപ നഷ്ടപരിഹാരം നല്കാനും പട്കറിന് കോടതി ഉത്തരവിട്ടു. 24 വര്ഷം പഴക്കമുള്ള കേസിലാണ് വിധി. ഈ വര്ഷം മേയില് മെട്രോപൊളിറ്റന് മജിസ്ട്രേറ്റ് രാഘവ് ശര്മ കോടതിയാണ് മേധാ പട്കറെ ശിക്ഷിച്ചത്.
തനിക്കും നര്മദാ ബച്ചാവോ ആന്ദോളനും (എന്ബിഎ) എതിരെ പരസ്യങ്ങള് പ്രസിദ്ധീകരിച്ചതിന് സക്സേനയ്ക്കെതിരെ കേസ് ഫയല് ചെയ്തതിനെത്തുടര്ന്ന് 2000 മുതല് അവര് സക്സേനയുമായി നിയമപോരാട്ടത്തിലായിരുന്നു. അഹമ്മദാബാദ് ആസ്ഥാനമായുള്ള നാഷണല് കൗണ്സില് ഫോര് സിവില് ലിബര്ട്ടീസിന്റെ തലവനായിരുന്നു സക്സേന.
ഒരു ടിവി ചാനലില് തനിക്കെതിരെ അപകീര്ത്തികരമായ പരാമര്ശം നടത്തിയതിന് സക്സേനയ്ക്കെതിരെ രണ്ട് കേസുകളും ഫയല് ചെയ്തിട്ടുണ്ട്. കേസില് പട്കറെ ശിക്ഷിക്കുമ്പോള് സക്സേനയ്ക്കെതിരായ അവരുടെ മൊഴികള് അപകീര്ത്തികരം മാത്രമല്ല, നിഷേധാത്മക ധാരണകള് ഉളവാക്കാന് രൂപകല്പ്പന ചെയ്തതാണെന്ന് മജിസ്ട്രേറ്റ് കോടതി പ്രസ്താവിച്ചിരുന്നു.
2001-ല് വി.കെ സക്സേനയുടെ പരാതിയില് അഹമ്മദബാദ് മെട്രോപൊളിറ്റന് മജിസ്ട്രേറ്റ് കോടതി മേധയ്ക്കെതിരെ ഐപിസി 500-ാം വകുപ്പ് പ്രകാരമുള്ള കുറ്റം ചുമത്തിയിരുന്നു. 2003-ല് സുപ്രീംകോടതി ഉത്തരവ് പ്രകാരം കേസ് ഡല്ഹിയിലെ ചീഫ് മെട്രോപൊളിറ്റന് മജിസ്ട്രേറ്റ് കോടതിയിലേക്കു മാറ്റി. 2011-ല് താന് കുറ്റക്കാരിയല്ലെന്ന് വാദിച്ച മേധ, കേസില് വിചാരണ ആവശ്യപ്പെടുകയായിരുന്നു.
https://www.facebook.com/Malayalivartha
