കശ്മീരിലെ കുല്ഗാം ജില്ലയിലെ ചിനിഗാമില് സൈന്യവും ഭീകരരും തമ്മിലുണ്ടായ ഏറ്റുമുട്ടലില് നാല് ഭീകരര് കൊല്ലപ്പെട്ടു
കശ്മീരിലെ കുല്ഗാം ജില്ലയിലെ ചിനിഗാമില് സൈന്യവും ഭീകരരും തമ്മിലുണ്ടായ ഏറ്റുമുട്ടലില് നാല് ഭീകരര് കൊല്ലപ്പെട്ടു. പ്രദേശത്ത് ഇപ്പോഴും ഏറ്റുമുട്ടല് തുടരുകയാണ്. സൈന്യം രണ്ട് തീവ്രവാദ വിരുദ്ധ ഓപ്പറേഷനുകള് നടത്തുന്നുണ്ട്. മോദര്ഗാം ഗ്രാമത്തിലും ഏറ്റുമുട്ടല് നടക്കുന്നുണ്ട്. ഇവിടെ ഒരു സൈനികന് വെടിവെപ്പില് വീരമൃത്യു വരിച്ചു. രഹസ്യവിവരങ്ങളുടെ അടിസ്ഥാനത്തില് സുരക്ഷാസേന പ്രദേശത്ത് തിരച്ചില് ആരംഭിച്ചതിന് ശേഷമാണ് ഭീകരരുടെ വെടിവയ്പ് ഉണ്ടായത്. മൂന്ന് ഭീകരര് ഒളിച്ചിരുക്കുന്നതായാണ് റിപ്പോര്ട്ടുകള്. പ്രദേശം സൈന്യം വളഞ്ഞിട്ടുണ്ട്.
ഭീകരരുടെ വെടിയേറ്റ ജവാനെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. രാവിലെ 11 മണിയോടെയാണ് കുല്ഗാമില് സുരക്ഷാ സേനയും ഭീകരരും തമ്മില് ഏറ്റുമുണ്ടല് ഉണ്ടായത്. വനമേഖലയില് ഭീകരര് ഒളിച്ചിരിക്കുന്നുണ്ടെന്ന വിവരത്തിന്റെ അടിസ്ഥാനത്തില് സൈന്യം തിരച്ചില് ശക്തമാക്കിയിരുന്നു. ഇതിനിടെ ഭീകരര് സൈനികരെ ലക്ഷ്യമിട്ട് വെടിയുതിര്ക്കുകയായിരുന്നു.
ശനിയാഴ്ച ജമ്മു കശ്മീരിലെ കത്വ, ഉധംപൂര് ജില്ലകളില് വാഹനാപകടങ്ങളില് അസിസ്റ്റന്റ് സബ് ഇന്സ്പെക്ടര് ഉള്പ്പെടെ രണ്ട് അതിര്ത്തി രക്ഷാ സേന (ബിഎസ്എഫ്) സൈനികര് വീരമൃത്യു വരിച്ചതായി നേരത്തെ അധികൃതര് അറിയിച്ചിരുന്നു. കത്വ ജില്ലയിലെ രാജ്ബാഗിന് സമീപം വാഹനം റോഡില് നിന്ന് തെന്നി ഉജ് കനാലിലേക്ക് വീഴുകയായിരുന്നു. അപകടത്തില്, ഹിമാചല് പ്രദേശ് സ്വദേശിയായ എഎസ്ഐ പര്ഷോതം സിംഗ് വീരമൃത്യു വരിക്കുകയും രണ്ട് സഹപ്രവര്ത്തകര് രക്ഷിക്കപ്പെടുകയും ചെയ്തു.
https://www.facebook.com/Malayalivartha
