പശ്ചിമേഷ്യയിലെ സംഘര്ഷങ്ങള്.. രാജ്യത്ത് ഇന്ധനവില വര്ധിക്കാന് സാധ്യത.. ക്രൂഡ് ഓയില് വില കുതിച്ചുയരുന്നത് എണ്ണക്കമ്പനികള്ക്ക് മേല് വലിയ സാമ്പത്തിക സമ്മര്ദ്ദമാണ് ചെലുത്തുന്നത്..
യുദ്ധം ആഗോള വിപണിയെ ഉലയ്ക്കുന്നതിനിടെ രാജ്യത്ത് ഇന്ധനവില വര്ധിക്കാന് സാധ്യതയേറുന്നു. അന്താരാഷ്ട്ര വിപണിയില് ക്രൂഡ് ഓയില് വില കുതിച്ചുയരുന്നത് എണ്ണക്കമ്പനികള്ക്ക് മേല് വലിയ സാമ്പത്തിക സമ്മര്ദ്ദമാണ് ചെലുത്തുന്നത്. പശ്ചിമേഷ്യയിലെ അനിശ്ചിതാവസ്ഥ തുടരുന്ന സാഹചര്യത്തില് പെട്രോള്, ഡീസല് വിലകളില് വരുംദിവസങ്ങളില് ഗണ്യമായ മാറ്റമുണ്ടായേക്കാമെന്നാണ് സാമ്പത്തിക വിദഗ്ധരുടെ വിലയിരുത്തല്.പശ്ചിമേഷ്യയിലെ സൈനിക നീക്കങ്ങളും ഹോര്മുസ് കടലിടുക്കിലെ ഗതാഗത തടസ്സങ്ങളും ആഗോള എണ്ണ വിതരണത്തെ ബാധിച്ചിട്ടുണ്ട്.
ബ്രെന്റ് ക്രൂഡ് ഓയില് വില ഉയരുന്നത് ഇന്ത്യയെപ്പോലുള്ള ഇറക്കുമതിയെ ആശ്രയിക്കുന്ന രാജ്യങ്ങളെ പ്രതികൂലമായി ബാധിക്കും. നിലവില് റീട്ടെയില് വില വര്ധിപ്പിക്കാനുള്ള ഔദ്യോഗിക തീരുമാനം കേന്ദ്ര സര്ക്കാര് കൈക്കൊണ്ടിട്ടില്ലെങ്കിലും, അന്താരാഷ്ട്ര വിപണിയിലെ വിലവര്ധനവ് തുടര്ന്നാല് ലിറ്ററിന് 10 രൂപ മുതല് 25 രൂപ വരെ വര്ധിക്കാന് സാധ്യതയുണ്ടെന്നാണ് ചില റിപ്പോര്ട്ടുകള് സൂചിപ്പിക്കുന്നത്.ഇന്ധനവില ഉയരുമെന്ന ഭീതിക്കിടെ വാണിജ്യ ഗ്യാസ് സിലിണ്ടറുകളുടെ വിലയില് മെയ് ഒന്ന് മുതല് റെക്കോര്ഡ് വര്ധനവാണ് രേഖപ്പെടുത്തിയത്.
19 കിലോയുടെ വാണിജ്യ സിലിണ്ടറിന് ഒറ്റയടിക്ക് 993 രൂപയാണ് എണ്ണക്കമ്പനികള് വര്ധിപ്പിച്ചത്. ഇതോടെ കൊച്ചിയില് ഒരു വാണിജ്യ സിലിണ്ടറിന്റെ വില 3,085 രൂപയായി ഉയര്ന്നു. തിരുവനന്തപുരത്ത് 3,106 രൂപയും കോഴിക്കോട്ട് 3,117.50 രൂപയുമാണ് നിലവിലെ വില. ഹോട്ടലുകളെയും ചെറുകിട വ്യവസായങ്ങളെയും ഈ വിലവര്ധനവ് സാരമായി ബാധിക്കും.വാണിജ്യ സിലിണ്ടറുകളുടെ വില കുത്തനെ കൂടിയെങ്കിലും 14.2 കിലോയുടെ ഗാര്ഹിക സിലിണ്ടറുകളുടെ വിലയില് നിലവില് മാറ്റമില്ല.
ഡല്ഹിയില് ഗാര്ഹിക സിലിണ്ടറിന് 913 രൂപയായി തുടരുമ്പോള് കേരളത്തിലും വിലയില് വലിയ മാറ്റം റിപ്പോര്ട്ട് ചെയ്തിട്ടില്ല. എങ്കിലും ക്രൂഡ് ഓയില് വിലയിലെ കുതിപ്പ് തുടര്ന്നാല് ഗാര്ഹിക ഗ്യാസ് വിലയിലും വര്ധനവുണ്ടായേക്കാമെന്ന ആശങ്ക നിലനില്ക്കുന്നുണ്ട്.ഇന്ധനവില വര്ധനയെക്കുറിച്ചുള്ള വാര്ത്തകള്ക്കിടയിലും നിലവില് വില കൂട്ടാന് ആലോചനയില്ലെന്നാണ് കേന്ദ്ര പെട്രോളിയം മന്ത്രാലയത്തിന്റെ ഔദ്യോഗിക വിശദീകരണം. രാജ്യത്ത് ആവശ്യത്തിന് ഇന്ധന ശേഖരമുണ്ടെന്നും പാനിക് ബുക്കിംഗിന്റെ ആവശ്യമില്ലെന്നും മന്ത്രാലയം വ്യക്തമാക്കി.
എന്നാല്, അന്താരാഷ്ട്ര വിപണിയിലെ ചാഞ്ചാട്ടം എണ്ണക്കമ്പനികളുടെ ലാഭവിഹിതത്തെ ബാധിക്കുന്നതിനാല് അധികനാള് വില പിടിച്ചുനിര്ത്താന് കഴിയില്ലെന്നാണ് വിപണി നിരീക്ഷകര് പറയുന്നത്
https://www.facebook.com/Malayalivartha
