ബെംഗളൂരുവില് സ്കൂളില് പുലി; സ്കൂളും പരിസരവും പരിഭ്രാന്തി വരുത്തിയ പുലിയെ രാത്രിയോടെ കീഴടക്കി
പുള്ളിപ്പുലിയെ കണ്ടെത്തിയതിനെത്തുടര്ന്നു നഗരത്തിലെ സ്കൂളിലും പരിസരത്തും പരിഭ്രാന്തിയുടെ പകലായി. ഒടുവില് രാത്രി എട്ടുമണിയോടെയാണു പൊലീസ്, വനംവകുപ്പ് ഉദ്യോഗസ്ഥര് മയക്കുവെടി വച്ചു പുലിയെ കീഴടക്കിയത്. മൂന്നു വനംവകുപ്പ് ജീവനക്കാര്ക്കു പരുക്കേറ്റു. ഒരാളുടെ നില ഗുരുതരമാണ്. മാറത്തഹള്ളിക്കു സമീപം തൂബറഹള്ളി വിബ്ജിയോര് ഹൈ ഇന്റര്നാഷനല് സ്കൂള് വളപ്പില് പുലിയെ കണ്ടതായി രാവിലെ സുരക്ഷാ ജീവനക്കാരാണ് അറിയിച്ചത്.
ഏഴര ഏക്കര് വളപ്പില് നുഴഞ്ഞുകയറിയതു പുലി തന്നെയെന്നു സിസി ടിവി ദൃശ്യങ്ങളില്നിന്നു സ്ഥിരീകരിച്ചു. അവധി ദിവസമാണെന്നതായിരുന്നു ആശ്വാസം. വാര്ത്ത പരന്നതോടെ നാട്ടുകാരും മാധ്യമ പ്രവര്ത്തകരും തടിച്ചുകൂടി. അന്പതോളം പൊലീസുകാരും വനംവകുപ്പ് ഉദ്യോഗസ്ഥരും സ്കൂള് വളഞ്ഞെങ്കിലും കെട്ടിടത്തിനകത്തും വളപ്പിലുമായി പുലി ഒളിച്ചുകളി തുടര്ന്നു. അഞ്ചരയോടെയാണു നേര്ക്കുനേര് പ്രത്യക്ഷപ്പെട്ടത്. സ്വിമ്മിങ് പൂളിനടുത്തുവച്ചു മൂന്നു വനംവകുപ്പ് ജീവനക്കാര് മയക്കുവെടി വയ്ക്കാന് ശ്രമിക്കുമ്പോഴാണു പുലി ആക്രമിച്ചത്. ഒരാളെ കടിച്ചുവീഴ്ത്തി; വലതുകൈ കടിച്ചുമുറിക്കുകയും ചെയ്തു.
മയക്കുവെടിയേറ്റ ശേഷവും പുലി സ്കൂളിനുള്ളിലേക്ക് ഓടിമറഞ്ഞു. സന്ധ്യയായി വെളിച്ചം മങ്ങിയതോടെ ആശങ്കയായി. സ്പോട് ലൈറ്റുകളുമായി തുടര്ന്ന തിരച്ചിലിലാണു രാത്രി എട്ടുമണിയോടെ മയങ്ങിയ നിലയില് പുലിയെ കണ്ടെത്തിയത്. മൂന്നു വയസ്സുള്ള പുള്ളിപ്പുലിയെ ബന്നാര്ഘട്ട ബയോളജിക്കല് പാര്ക്കിലേക്കു മാറ്റി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
