നാഷണല്‍ ഹെറാള്‍ഡ് കേസില്‍ കോണ്‍ഗ്രസ് അധ്യക്ഷ സോണിയാ ഗാന്ധിയും ഉപാധ്യക്ഷന്‍ രാഹുല്‍ ഗാന്ധിയും വിചാരണയുടെ എല്ലാ ഘട്ടത്തിലും കോടതിയില്‍ നേരിട്ടു ഹാജരാകേണ്ടതില്ലെന്നു സുപ്രീം കോടതി. ആവശ്യമുണെ്ടങ്കില്‍ മജിസ്‌ട്രേറ്റിനു വിളിപ്പിക്കാം.

വിചാരണയുടെ എല്ലാ ഘട്ടങ്ങളിലും പ്രമുഖരായ വ്യക്തികള്‍ ഹാജരാകുന്നതു കോടതിയുടെ സ്വാഭാവിക പ്രവര്‍ത്തനത്തിനു അസൗകര്യങ്ങളുണ്ടാക്കുമെന്നു ചൂണ്ടിക്കാട്ടിയ കോടതി, സോണിയയും രാഹുലും എങ്ങും ഓടിയൊളിക്കില്ലെന്നും നിരീക്ഷിച്ചു. കേസുമായി ബന്ധപ്പെട്ട് ഡല്‍ഹി ഹൈക്കോടതി നടത്തിയ പരാമര്‍ശങ്ങളും പരമോന്നത കോടതി രേഖകളില്‍ നിന്നു നീക്കി. 
നാഷണല്‍ ഹെറാള്‍ഡ് ദിനപത്രത്തിന്റെ കെട്ടിടം അടക്കമുള്ളവ സോണിയാ ഗാന്ധിക്കും കുടുംബത്തിനും ഓഹരി പങ്കാളിത്തമുള്ള യംഗ് ഇന്ത്യ കമ്പനി തട്ടിയെടുത്തെന്ന് ആരോപിച്ച് ബിജെപി നേതാവ് സുബ്രഹ്മണ്യന്‍ സ്വാമി നല്‍കിയ ഹര്‍ജിയില്‍ സോണിയ, രാഹുല്‍ എന്നിവര്‍ നേരിട്ടു ഹാജരാകണമെന്നു ഡല്‍ഹി കോടതി ഉത്തരവിട്ടിരുന്നു.

കോണ്‍ഗ്രസ് ട്രഷറര്‍ മോത്തിലാല്‍ വോറ, ഓസ്‌കാര്‍ ഫെര്‍ണാണ്ടസ്, സുമന്‍ ദുബെ, ദേശീയ വിജ്ഞാന കമ്മിഷന്‍ മുന്‍ അധ്യക്ഷന്‍ സാം പിത്രോഡ എന്നിവര്‍ക്കും നോട്ടീസ് അയച്ചിരുന്നു. ഇതിനെതിരേ സമര്‍പ്പിച്ച ഹര്‍ജി ഡല്‍ഹി ഹൈക്കോടതി തള്ളിയതിനെതിരേയാണ് കോണ്‍ഗ്രസ് നേതാക്കള്‍ സുപ്രീം കോടതിയെ സമീപിച്ചത്. അതിനിടെ, ഹൈക്കോടതി ഹര്‍ജി തള്ളിയതിനെ തുടര്‍ന്ന് ഡിസംബര്‍ 19നു നേതാക്കള്‍ ഹാജരായെങ്കിലും തുടര്‍ന്നുള്ള നടപടികളിലും നേരിട്ടു ഹാജരാകണമെന്നു പട്യാല ഹൗസ് കോടതി നിര്‍ദേശിച്ചിരുന്നു. 
എന്നാല്‍, കോണ്‍ഗ്രസ് നേതാക്കള്‍ക്കെതിരേയുള്ള ക്രിമിനല്‍ നടപടികള്‍ റദ്ദാക്കാന്‍ ജസ്റ്റീസുമാരായ ജെ.എസ്. ഖെഹര്‍, സി. നാഗപ്പന്‍ എന്നിവരുടെ ബെഞ്ച് തയാറായില്ല. കേസിന്റെ നിലവിലുള്ള അവസ്ഥയില്‍ ഇടപെടുന്നില്ല. എന്നാല്‍, വിചാരണ കോടതി തെളിവുകള്‍ പരിശോധിക്കുകയും രേഖപ്പെടുത്തുകയും ചെയ്യുന്നതിനു മുമ്പ് ഹൈക്കോടതി വിലയിരുത്തലുകള്‍ നടത്തിയതു ശരിയായില്ല. ഈ സാഹചര്യത്തില്‍ കേസുമായി ബന്ധപ്പെട്ട് ഹൈക്കോടതി നടത്തിയ എല്ലാ നിരീക്ഷണങ്ങളും വിലയിരുത്തലുകളും പരാമര്‍ശങ്ങളും രേഖകളില്‍ നിന്നു നീക്കണമെന്നും രണ്ടംഗ ബെഞ്ച് നിര്‍ദേശിച്ചു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha