മുന്‍കൂട്ടി ബുക്ക് ചെയ്ത വീല്‍ചെയര്‍ എയര്‍ ഇന്ത്യ നല്‍കാത്തതിനെ തുടര്‍ന്ന് വീണു ഗുരുതരമായി പരുക്കേറ്റ 82-കാരി ആശുപത്രിയില്‍. ഡല്‍ഹി ഇന്ദിരാഗാന്ധി രാജ്യാന്തര വിമാനത്താവളത്തിലാണ് 82-കാരിയായ പസ്രിച രാജിന് മുന്‍കൂട്ടി ബുക്ക് ചെയ്ത വീല്‍ചെയര്‍ നിഷേധിച്ചത്. മാര്‍ച്ച് 4-നാണു സംഭവം. ബെംഗളൂരുവിലേക്കുള്ള യാത്രയ്ക്കായി ടെര്‍മിനല്‍ 3-ലേക്ക് നടക്കുന്നതിനിടെയാണ് വയോധിക മുഖമിടിച്ച് വീണത്. തലച്ചോറില്‍ രക്തസ്രാവമുണ്ടാകാന്‍ സാധ്യതയുണ്ടെന്ന് കണ്ടെത്തിയതിനെ തുടര്‍ന്നാണ് ഇവരെ തീവ്ര പരിചരണ വിഭാഗത്തില്‍ (ഐസിയു) പ്രവേശിപ്പിച്ചത്. മുന്‍ സൈനിക ഉദ്യോഗസ്ഥന്റെ ഭാര്യയാണ് പസ്രിച.

രണ്ടു ദിവസമായി മുത്തശ്ശി ഐസിയുവിലാണെന്നും ശരീരത്തിന്റെ ഇടതുവശത്തെ ബലം കുറഞ്ഞുവരികയാണെന്നും ചെറുമകള്‍ പരുള്‍ കന്‍വാര്‍ പറഞ്ഞു. എയര്‍ ഇന്ത്യക്കും വ്യോമയാന മന്ത്രാലയ ഡയറക്ടര്‍ക്കും കുടുംബം പരാതി നല്‍കി. അന്വേഷണം നടത്തുമെന്നും കുടുംബവുമായി സംസാരിക്കുമെന്നും എയര്‍ ഇന്ത്യ അധികൃതര്‍ അറിയിച്ചു.

വീല്‍ചെയറിനായി ഒരു മണിക്കൂറിലധികം കാത്തിരുന്നിട്ടും, കിട്ടാതെ വന്നതോടെയാണു മുത്തശ്ശി നടന്നതെന്നു ചെറുമകള്‍ പരുള്‍ കന്‍വാര്‍ പറഞ്ഞു. അല്‍പസമയം നടന്നതിനുശേഷം എയര്‍ ഇന്ത്യയുടെ പ്രീമിയം കൗണ്ടറിന് സമീപം പസ്രിച വീഴുകയായിരുന്നു. വീണു പരുക്കേറ്റിട്ടും മുത്തശ്ശിക്ക് മതിയായ ചികിത്സ നല്‍കാന്‍ വിമാനത്താവള അധികൃതര്‍ തയാറായില്ലെന്നും പരുള്‍ എക്‌സ് പ്ലാറ്റ്‌ഫോമില്‍ കുറിച്ചു.

''മനുഷ്യ ജീവനു യാതൊരു വിലയും കല്‍പ്പിക്കുന്നില്ലെന്ന് മനസിലായതോടെയാണ് ഇത്തരത്തിലൊരു കുറിപ്പ് പങ്കുവയ്ക്കുന്നത്. മനുഷ്യനാണെന്നു പോലും പരിഗണിക്കാതെയാണ് എയര്‍ ഇന്ത്യ എന്റെ മുത്തശ്ശിയോട് പെരുമാറിയത്. ലജ്ജ തോന്നുന്നു. വീണതിനു ശേഷം വീല്‍ചെയര്‍ കിട്ടി. മൂക്കിനും ചുണ്ടിനും പരുക്കേറ്റിട്ടും യാതൊരുവിധ വൈദ്യസഹായവും നല്‍കാതെയാണു വിമാനത്തിലേക്ക് കയറ്റിയത്. മുറിവില്‍ വയ്ക്കാനും വേദന ശമിപ്പിക്കാനുമായി വിമാനത്തിലെ ജീവനക്കാരാണ് ഐസ് കട്ട തന്നത്. അവര്‍ ബെംഗളൂരു വിമാനത്താവളത്തില്‍ വിവരം അറിയിക്കുകയും ചെയ്തു. ലാന്‍ഡിങ്ങിനു ശേഷം പ്രാഥമിക ശുശ്രൂഷ നല്‍കുകയും മുത്തശ്ശിയെ ആശുപത്രിയില്‍ പ്രവേശിപ്പിക്കുകയായിരുന്നു''- പരുള്‍ എക്‌സില്‍ കുറിച്ചു.