സംവരണം ആവശ്യപ്പെട്ട് ഹരിയാനയിലെ ജാട്ട് വിഭാഗക്കാര്‍ നടത്തുന്ന സമരത്തെ തുടര്‍ന്ന് ഡല്‍ഹിയിലെ കുടിവെള്ള വിതരണം തടസ്സപ്പെട്ടു. ഡല്‍ഹിയിലെക്ക് കുടിവെള്ളം എത്തിക്കുന്ന മുനക് കനാലിലെ ജലവതരണം പ്രക്ഷോഭകാരികള്‍ തടസപ്പെടുത്തിയതാണ് കാരണം. ഡല്‍ഹിയില്‍ നാളെ മുതല്‍ കുടിവെള്ളം തടസപ്പെടുമെന്ന് മുഖ്യമന്ത്രി അരവിന്ദ് കേജ്രിവാള്‍ പറഞ്ഞു. ഡല്‍ഹിയിലെ സ്‌കൂളുകള്‍ക്ക് സര്‍ക്കാര്‍ നാളെ അവധി പ്രഖ്യാപിച്ചു.

അതേസമയം സമരം കൂടുതല്‍ ശക്തമായതോടെ ഹരിയാനയില്‍ പ്രതിസന്ധി രൂക്ഷമായി. കേന്ദ്ര ആഭ്യന്തരമന്ത്രി രാജ്‌നാഥ് സിങ് വൈകീട്ട് ജാട്ട് നേതാക്കളുമായി ചര്‍ച്ച നടത്തും. സമാധാനം പുനസ്ഥാപിക്കണമെന്നും ജാട്ട് വിഭാഗക്കാര്‍ക്ക് സംവരണം നല്‍കണമെന്നും ആവശ്യപ്പെട്ട് ഹരിയാന മുന്‍മുഖ്യമന്ത്രിയും കോണ്‍ഗ്രസ് നേതാവുമായ ഭൂപിന്ദര്‍ സിങ് ഹൂഡ ഡല്‍ഹിയില്‍ അനിശ്ചിതകാല നിരാഹാരസമരം ആരംഭിച്ചു.

പ്രക്ഷോഭം ഏഴാം ദിവസത്തിലേക്ക് കടന്നതോടെ വിവിധയിടങ്ങളില്‍ കൊല്ലപ്പെട്ടവരുടെ എണ്ണം 9 ആയി. അക്രമം നടത്തുന്നതവര്‍ക്കെതിരെ കര്‍ശനടപടി സ്വീകരിക്കാന്‍ ആഭ്യന്തര മന്ത്രാലയം ഉത്തരവിട്ടു. കേന്ദ്ര പ്രതിരോധ മന്ത്രി മനോഹര്‍ പരീക്കര്‍ കരസേന മേധാവി ദല്‍ബീര്‍ സിങ് സുഗാഹുമായി കൂടിക്കാഴ്ച നടത്തി. വിവിധ സ്ഥലങ്ങളില്‍ കര്‍ഫ്യൂ പ്രഖ്യാപിച്ചും സുരക്ഷാ സൈനികരെ രംഗത്തിറക്കിയും സംഘര്‍ഷത്തിന് അയവു വരുത്താന്‍ സര്‍ക്കാര്‍ ശ്രമിക്കുന്നുണ്ടെങ്കിലും പ്രക്ഷോഭം കൂടുതല്‍ പ്രദേശങ്ങളിലേക്ക് വ്യാപിക്കുകയാണ്.സോനിപട്ട്, റോഹ്തക്, ഗോഹാന, ജജ്ജാര്‍, ബിവാനി എന്നിവിടങ്ങളിലാണ് കര്‍ഫ്യൂ പ്രഖ്യാപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha