രാജീവ് ഗാന്ധി വധക്കേസിലെ പ്രതി നളിനിക്ക് പരോള്‍ അനുവദിച്ചു. നടപടികള്‍ പൂര്‍ത്തിയാക്കി നളിനി നാളെ പുറത്തിറങ്ങും. പിതാവിന്റെ സംസ്‌കാര ചടങ്ങില്‍ പങ്കെടുക്കാന്‍ 12 മണിക്കൂര്‍ നേരത്തേക്കാണ് പരോള്‍ അനുവദിച്ചിരിക്കുന്നത്. രാവിലെ എട്ടുമുതല്‍ വൈകിട്ട് എട്ടുവരെയാണ് പരോള്‍. രാജീവ് ഗാന്ധി വധക്കേസില്‍ ജീവപര്യന്തം തടവിനു ശിക്ഷിക്കപ്പെട്ട് വെല്ലൂര്‍ ജയിലിലാണ് നളിനി.

1991 മേയ് 21, ന് ശ്രീപെരുംപുത്തൂരിലെ ചാവേര്‍ സ്ഫാടനത്തിലാണ് മുന്‍ പ്രധാനമന്ത്രി രാജീവ് ഗാന്ധി കൊല്ലപ്പെട്ടത്. രാജീവ്ഗാന്ധി വധക്കേസ് വിചാരണ നിര്‍വഹിച്ച പൂനമല്ലി പ്രത്യേക കോടതി പ്രതിപ്പട്ടികയിലുള്ള 26 പേര്‍ക്കും വധശിക്ഷയാണ് വിധിച്ചിരുന്നത്. പിന്നീട് കേസ് പരിഗണിച്ച സുപ്രീം കോടതി ഏഴുപേരുടേത് ഒഴികെ 19 പ്രതികളുടെ ശിക്ഷ റദ്ദാക്കി. മുരുകന്‍, ഭാര്യ നളിനി, ശാന്തന്‍, പേരറിവാളന്‍ എന്നിവര്‍ക്ക് 1999 മേയ് 11നു സുപ്രീം കോടതി തൂക്കുമരം വിധിച്ചു, ജയകുമാര്‍, റോബര്‍ട്ട് പയസ, രവിചന്ദ്രന്‍ എന്നിവര്‍ക്ക് ജീവപര്യന്തവും.

നിരന്തരമായ ദയാപേക്ഷയ്‌ക്കൊടുവില്‍ നളിനിയുടെ ശിക്ഷ ജീവപര്യന്തമായി കുറയ്ക്കാന്‍ 2000 ഏപ്രില്‍ 21നു സംസ്ഥാന സര്‍ക്കാര്‍ തയാറായി. വധശിക്ഷ വിധിക്കപ്പെട്ട ശാന്തന്‍, പേരറിവാളന്‍, നളിനിയുടെ ഭര്‍ത്താവ് മുരുകന്‍ എന്നിവരും ജീവപര്യന്തം തടവിലുള്ള റോബര്‍ട്ട് പയസും, ജയകുമാറും വെല്ലൂര്‍ ജയിലിലാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha