ആര്‍സിബി ഐപിഎല്‍ കിരീട നേട്ടം ആഘോഷിക്കുന്നതിനിടെ ചിന്നസ്വാമി സ്‌റ്റേഡിയത്തില്‍ ഉണ്ടായ തിക്കിലും തിരക്കിലും 11 പേര്‍ മരിച്ച സംഭവത്തില്‍ ബെംഗളൂരു പൊലീസ് കമ്മിഷണര്‍ക്കും മറ്റ് ഉന്നത ഉദ്യോഗസ്ഥര്‍ക്കും സസ്‌പെന്‍ഷന്‍. അഡിഷനല്‍ കമ്മിഷണര്‍, ഡപ്യൂട്ടി കമ്മിഷണര്‍, അസിസ്റ്റന്റ് കമ്മിഷണര്‍ എന്നിവരെയും സസ്‌പെന്‍ഡ് ചെയ്തു.

റോയല്‍ ചാലഞ്ചേഴ്‌സ് ബെംഗളൂരുവിനും (ആര്‍സിബി) കര്‍ണാടക ക്രിക്കറ്റ് അസോസിയേഷനുമെതിരെ പൊലീസ് സ്വമേധയാ കേസെടുത്തു. പരിപാടിയുടെ നടത്തിപ്പുകാരായിരുന്ന ഡിഎന്‍എ ഇവന്റ് മാനേജ്‌മെന്റ് കമ്പനിക്കെതിരെയും കേസെടുത്തിട്ടുണ്ട്. അറസ്റ്റ് ഉള്‍പ്പെടെയുള്ള നടപടികള്‍ ഉണ്ടാകും. സംഘാടകര്‍ക്ക് വീഴ്ചയുണ്ടായതായാണ് പ്രാഥമിക അന്വേഷണത്തില്‍ കണ്ടെത്തിയിരിക്കുന്നത്. മജിസ്‌ട്രേട്ട് തല അന്വേഷണത്തിനു പുറമേ പ്രത്യേക പൊലീസ് സംഘത്തെ അന്വേഷണത്തിനു നിയോഗിക്കും.

സംഭവത്തെക്കുറിച്ച് അന്വേഷിക്കാന്‍ സര്‍ക്കാര്‍ ചുമതലപ്പെടുത്തിയ ജില്ലാ മജിസ്‌ട്രേട്ട് ജി.ജഗദീഷ, കര്‍ണാടക ക്രിക്കറ്റ് അസോസിയേഷനും ബെംഗളൂരു മെട്രോയ്ക്കും ആര്‍സിബി ഫ്രാഞ്ചൈസിക്കും നോട്ടിസ് അയയ്ക്കുമെന്ന് വ്യക്തമാക്കി. അപകടമുണ്ടായ ചിന്നസ്വാമി സ്‌റ്റേഡിയം അദ്ദേഹം സന്ദര്‍ശിച്ചു. 15 ദിവസത്തിനകം സര്‍ക്കാരിന് റിപ്പോര്‍ട്ടു നല്‍കും. സംഭവം നടന്ന സമയത്തെ സിസിടിവി ദൃശ്യങ്ങളും മറ്റു ദൃശ്യങ്ങളും ശേഖരിക്കും. അപകടത്തില്‍ മരിച്ചവരുടെ കുടുംബാംഗങ്ങളുടെയും പരുക്കേറ്റവരുടെയും മൊഴിയെടുക്കും. പൊതുജനങ്ങള്‍ക്കും ഡ്യൂട്ടിയിലുണ്ടായിരുന്ന പൊലീസുകാര്‍ക്കും ജൂണ്‍ 13ന് രാവിലെ 10.30നും 1.30 ഇടയില്‍ മൊഴി നല്‍കാം.

റോയല്‍ ചാലഞ്ചേഴ്‌സ് ബെംഗളൂരുവിന്റെ ഐപിഎല്‍ കിരീട നേട്ടം ആഘോഷിക്കാന്‍ ചിന്നസ്വാമി സ്‌റ്റേഡിയത്തിലെത്തിയ ആരാധകരുടെ തിക്കിലും തിരക്കിലുമാണ് 13 വയസ്സുകാരന്‍ ഉള്‍പ്പെടെ 11 പേര്‍ മരിച്ചത്. 47 പേര്‍ക്കു പരുക്കേറ്റു. പരമാവധി 40,000 പേരെ ഉള്‍ക്കൊള്ളാവുന്ന സ്‌റ്റേഡിയത്തിനു പുറത്ത് 2 ലക്ഷത്തിലധികം ആളുകള്‍ എത്തിയതാണു ദുരന്തത്തിന് ഇടയാക്കിയതെന്നാണ് അധികൃതര്‍ പറയുന്നത്. ടിക്കറ്റ് മുഖേന നിയന്ത്രിച്ചതിനാല്‍ സ്‌റ്റേഡിയത്തിലെ 3 ഗേറ്റുകള്‍ക്കു മുന്നിലും ആരാധകര്‍ തടിച്ചുകൂടിയിരുന്നു. ഗേറ്റുകള്‍ തുറന്നപ്പോള്‍ ഉള്ളിലേക്ക് ഇരച്ചു കയറാന്‍ ശ്രമിച്ചവരെ നിയന്ത്രിക്കാന്‍ പൊലീസ് ലാത്തിവീശിയെങ്കിലും ഫലം കണ്ടില്ല.