ദക്ഷിണേന്ത്യയില്‍ ഹിന്ദി ഭാഷ അടിച്ചേല്‍പ്പിക്കുന്നതിനെതിരെ കമല്‍ഹാസന്‍
കന്നഡ തമിഴ് ഭാഷാ പരാമര്‍ശത്തില്‍ കര്‍ണാടകയില്‍ തഗ് ലൈഫ് വിലക്കിയതിന് തൊട്ടു പിന്നാലെയാണ് താരത്തിന്റെ ഹിന്ദി തമിഴ് പരാമര്‍ശം. തന്റെ പുതിയ ചിത്രമായ 'തഗ് ലൈഫിന്റെ ' പ്രൊമോഷനിടെയാണ് കമല്‍ഹാസന്‍ അഭിപ്രായം വ്യക്തമാക്കിയത്. വിദ്യാഭ്യാസം ഭാഷ അടിച്ചേല്‍പ്പിക്കുന്നതില്‍ നിന്ന് മുക്തമായിരിക്കണമെന്നും പഠനം എപ്പോഴും കാര്യക്ഷമമായിരിക്കണമെന്നും അദ്ദേഹം പറഞ്ഞു. ഹിന്ദി അടിച്ചേല്‍പ്പിക്കുന്നതിന് പകരം ഇംഗ്ലീഷ്, സ്പാനിഷ്, ചൈനീസ് പോലുള്ള അന്താരാഷ്ട്ര ഭാഷകള്‍ പഠിപ്പിക്കണമെന്നും അദ്ദേഹം അഭ്യര്‍ത്ഥിച്ചു. കന്നഡ ഭാഷയെക്കുറിച്ചുള്ള തന്റെ പരാമര്‍ശങ്ങള്‍ക്കിടെ വിവാദത്തില്‍പ്പെട്ടിട്ടും, താരം പിന്നോട്ടില്ലെന്നാണ് വ്യക്തമാക്കുന്നത്.
താരം പറഞ്ഞതിന് പിന്നാലെയാണ് അദ്ദേഹം എതിര്‍പ്പുകള്‍ നേരിടേണ്ടി വന്നത്. ചെന്നൈയില്‍ നടന്ന ഒരു പ്രമോഷണല്‍ പരിപാടിയില്‍ കമല്‍ഹാസന്‍ നടത്തിയ കന്നഡതമിഴ് പരാമര്‍ശത്തിന് ക്ഷമാപണം നടത്തിയില്ലെങ്കില്‍ തഗ് ലൈഫ് റിലീസ് ചെയ്യാന്‍ അനുവദിക്കില്ലെന്ന് കര്‍ണാടക ഫിലിം ചേംബര്‍ ഓഫ് കൊമേഴ്‌സ് (കെഎഫ്‌സിസി) പറഞ്ഞിരുന്നു. കന്നഡ തമിഴില്‍ നിന്ന് ഉത്ഭവിച്ചെന്ന് താരം പറഞ്ഞതിന് പിന്നാലയെണ് അദ്ദേഹം എതിര്‍പ്പുകള്‍ നേരിട്ടത്. പരാമര്‍ശത്തിനെതിരെ കോടതിയില്‍ നിന്നുള്ള വിമര്‍ശനത്തെത്തുടര്‍ന്ന്, തഗ് ലൈഫ് കര്‍ണാടകയില്‍ റിലീസ് ചെയ്തിരുന്നില്ല.
ബിജെപി നേതൃത്വത്തിലുള്ള എന്‍ഡിഎ സര്‍ക്കാര്‍ ഹിന്ദി അടിച്ചേല്‍പ്പിക്കാന്‍ ശ്രമിക്കുന്നുവെന്ന് ആരോപിച്ച് തമിഴ്‌നാട്ടിലെ ഭരണകക്ഷിയായ ഡിഎംകെ ത്രിഭാഷാ നയത്തെ ശക്തമായി എതിര്‍ത്തു. പഞ്ചാബ്, കര്‍ണാടക, ആന്ധ്രാപ്രദേശ് തുടങ്ങിയ സംസ്ഥാനങ്ങള്‍ ഉന്നയിച്ച ആശങ്കകള്‍ നടന്‍ കമല്‍ ഹാസനും ആവര്‍ത്തിച്ചു. ലോകമെമ്പാടും അവസരം ലഭിക്കണമെങ്കില്‍ ഇംഗ്ലീഷ്, സ്പാനിഷ്, ചൈനീസ് തുടങ്ങിയ അന്താരാഷ്ട്ര ഭാഷകള്‍ പഠിക്കാന്‍ വിദ്യാര്‍ത്ഥികളെ പ്രോത്സാഹിപ്പിക്കണമെന്നും അദ്ദേഹം വ്യക്തമാക്കി.
'ഇംഗ്ലീഷ് ഇത്രയൊക്കെ മതിയാകും. ഇനി മുതല്‍ നിങ്ങള്‍ സ്പാനിഷോ ചൈനീസ് ഭാഷയോ പഠിക്കണം. 350 വര്‍ഷത്തെ ഇംഗ്ലീഷ് വിദ്യാഭ്യാസത്തിന്റെ ശക്തമായ അടിത്തറ നമുക്കുണ്ട്. അത് വീണ്ടും പൊടുന്നനെ മാറ്റി ഹിന്ദി സ്ഥാപിക്കുമ്പോള്‍ അനാവശ്യമായി നിരവധി ആളുകളെ നിരക്ഷരരാക്കുകയാണ് ചെയ്യുക, പ്രത്യേകിച്ച് തമിഴ്‌നാട് പോലെയൊരു സംസ്ഥാനത്ത്'. അദ്ദേഹം പറഞ്ഞു.
https://www.facebook.com/Malayalivartha
