17 വയസ്സുള്ള ആദിവാസി പെണ്‍കുട്ടിയെ 10 പുരുഷന്മാര്‍ ചേര്‍ന്ന് ബലാത്സംഗത്തിന് ഇരയാക്കിയതായി പറയുന്നു. ജാര്‍ഖണ്ഡിലെ ഗൊഡ്ഡ ജില്ലയില്‍ സുന്ദര്‍ പഹാരി പൊലീസ് സ്‌റ്റേഷന്‍ പരിധിയില്‍ വെള്ളിയാഴ്ച നടന്ന സംഭവത്തില്‍ ഇതുവരെ 8 പ്രതികളെ അറസ്റ്റ് ചെയ്തിട്ടുണ്ടെന്ന് പൊലീസ് പറഞ്ഞു. പെണ്‍കുട്ടി ഒരു ബന്ധുവിന്റെ വിവാഹത്തില്‍ പങ്കെടുക്കാന്‍ പോയപ്പോഴാണ് ദാരുണ സംഭവം.

വീട്ടില്‍നിന്ന് പുറത്തിറങ്ങിയപ്പോള്‍ ഒരാള്‍ പിടികൂടി വായില്‍ തുണി കെട്ടി ആളൊഴിഞ്ഞ സ്ഥലത്തേക്കു കൊണ്ടുപോയി എന്നാണ് പൊലീസിനു നല്‍കിയ മൊഴിയില്‍ പെണ്‍കുട്ടി പറയുന്നത്. തുടര്‍ന്ന് 10 പുരുഷന്മാര്‍ ചേര്‍ന്ന് ബലാത്സംഗം ചെയ്തതായും പെണ്‍കുട്ടി പറയുന്നു. ശനിയാഴ്ച പ്രാദേശിക പഞ്ചായത്ത് യോഗം ചേര്‍ന്ന് വിഷയം ഒതുക്കി തീര്‍ക്കാന്‍ ശ്രമിച്ചതായാണ് പെണ്‍കുട്ടിയുടെ കുടുംബത്തിന്റെ ആരോപണം.

ഇരയുടെ കുടുംബം നല്‍കിയ പരാതിയുടെ അടിസ്ഥാനത്തില്‍ ഞായറാഴ്ച 10 പേര്‍ക്കെതിരെ എഫ്‌ഐആര്‍ റജിസ്റ്റര്‍ ചെയ്തു. 8 പേരെ അറസ്റ്റ് ചെയ്തു. ശേഷിക്കുന്ന രണ്ടു പ്രതികള്‍ക്കായി തിരച്ചില്‍ തുടരുകയാണ്. ഇരയെ വൈദ്യ പരിശോധനയ്ക്ക് വിധേയമാക്കിയിരിക്കുകയാണെന്ന് അന്വേഷണ ഉദ്യോഗസ്ഥര്‍ പറഞ്ഞു.