ഓണ്‍ലൈനായി റെയില്‍വേ തത്കാല്‍ ടിക്കറ്റുകളെടുക്കാന്‍ ഐആര്‍സിടിസി അക്കൗണ്ടിനെ ആധാറുമായി ബന്ധിപ്പിക്കണം
ഐആര്‍സിടിസി അക്കൗണ്ടിനെ ആധാറുമായി ബന്ധിപ്പിച്ചവര്‍ക്കു മാത്രമേ ജൂലായ് ഒന്നു മുതല്‍ ഓണ്‍ലൈനായി റെയില്‍വേ തത്കാല്‍ ടിക്കറ്റുകളെടുക്കാന്‍ സാധിക്കുകയുള്ളൂ. ടിക്കറ്റെടുക്കുമ്പോള്‍ ആധാര്‍ അധിഷ്ഠിത ഒടിപി നല്‍കുന്ന സംവിധാനം അടുത്ത മാസം 15 മുതല്‍ നിര്‍ബന്ധമാക്കുന്നതാണ്.
ഐആര്‍സിടിസി വെബ് സൈറ്റോ ആപ്പോ ഉപയോഗിച്ച് ടിക്കറ്റെടുക്കുന്നവരില്‍ ഭൂരിപക്ഷവും തങ്ങളുടെ അക്കൗണ്ട് ആധാറുമായി ബന്ധിപ്പിച്ചിട്ടില്ലാത്തവരാണ്. ഐആര്‍സിടിസി അക്കൗണ്ടില്‍ ലിങ്ക് ആധാര്‍ എന്ന ഭാഗം തുറന്ന് ആവശ്യമായ വിവരങ്ങള്‍ നല്‍കിയാല്‍ ആധാറുമായി ബന്ധപ്പെടുത്താനാവുന്നതാണ്.
ഇത് ഒറ്റത്തവണ ചെയ്താല്‍ മതിയാവും. എന്നാല്‍, ജൂലായ് 15 മുതല്‍ ഓണ്‍ലൈന്‍ ആയോ കൗണ്ടറില്‍ ചെന്നോ ഓരോ തവണ ടിക്കറ്റെടുക്കുമ്പോഴും ആധാര്‍ ഒടിപി നല്‍കേണ്ടിവരുന്നതാണ്. ആധാറുമായി ബന്ധിപ്പിച്ചിട്ടുള്ള മൊബൈല്‍ ഫോണിലേക്കാണ് ഒടിപി വരിക. തത്ക്കാല്‍ ടിക്കറ്റ് ബുക്കിങ് തുടങ്ങി ആദ്യത്തെ അര മണിക്കൂര്‍ ഏജന്റുമാര്‍ക്ക് ടിക്കറ്റ് ലഭിക്കില്ലെന്ന് റെയില്‍വേ വ്യക്തമാക്കി.
"
https://www.facebook.com/Malayalivartha
