ബാങ്ക് വായ്പകള്‍ തിരിച്ചടയ്ക്കാതെ ബ്രിട്ടനിലേക്കു മുങ്ങിയ മദ്യവ്യവസായി വിജയ് മല്യയ്‌ക്കെതിരെ ഹൈദരബാദിലെ കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചു. മല്യയെ കൂടാതെ കിങ്ഫിഷര്‍ എയര്‍ലൈന്‍സ് ചീഫ് ഫിനാന്‍ഷ്യല്‍ ഓഫിസര്‍ എ. രഘുനാഥിനും വഞ്ചനാ കുറ്റത്തില്‍ ജാമ്യമില്ലാ വാറണ്ട് പുറപ്പെടുവിച്ചു. ഏപ്രില്‍ 13ന് മല്യയെ ഹാജരാക്കണമെന്ന് പൊലീസിനോട് കോടതി ആവശ്യപ്പെട്ടു.

ഹൈദരാബാദ് രാജ്യാന്തര വിമാനത്താവള അധികൃതര്‍ നല്‍കിയ പരാതിയുടെ അടിസ്ഥാനത്തിലാണ് വിജയ് മല്യയ്‌ക്കെതിരെ ജാമ്യമില്ലാ വാറണ്ട് പുറപ്പെടുവിച്ചിരിക്കുന്നത്. കിങ്ഫിഷര്‍ എയര്‍ലൈന്‍സ് നല്‍കാനുള്ള തുക തന്നില്ലെന്നും പകരം തന്ന ചെക്കില്‍ പണമുണ്ടായിരുന്നില്ലെന്നുമാണ് പരാതി. ഹൈദരാബാദ് മെട്രോ പൊളിറ്റിന്‍ കോടതിയാണ് വാറണ്ട് പുറപ്പെടുവിച്ചത്. 11 കേസുകളാണ് ജിഎംആര്‍ കമ്പനി വിജയ് മല്യയ്‌ക്കെതിരെ നല്‍കിയിരിക്കുന്നത്.

അതിനിടെ, യുകെയിലെ മാധ്യമങ്ങളെ വിമര്‍ശിച്ച് മല്യ രംഗത്തെത്തി. ട്വിറ്ററിലൂടെയാണ് മല്യയുടെ കുറ്റപ്പെടുത്തല്‍. മാധ്യമങ്ങള്‍ തന്നെ വേട്ടയാടുകയാണ്. ഇവരോട് പ്രതികരിക്കില്ലെന്നും സമയം പാഴാക്കരുതെന്നും മല്യ ട്വീറ്റ് ചെയ്തു. മാര്‍ച്ച് രണ്ടിന് ഇന്ത്യ വിട്ട വിജയ് മല്യ യുകെയിലാണുള്ളത് എന്നാണ് റിപ്പോര്‍ട്ടുകള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha