ലഡാക്കിന് സംസ്ഥാന പദവി നല്‍കണമെന്നാവശ്യപ്പെട്ട് നടക്കുന്ന സമരത്തിനിടെ നാലുപേര്‍ കൊല്ലപ്പെട്ടതായി റിപ്പോര്‍ട്ട്
കേന്ദ്രഭരണപ്രദേശമായ ലഡാക്കിന് സംസ്ഥാന പദവി നല്‍കണമെന്നാവശ്യപ്പെട്ട് നടക്കുന്ന സമരത്തിനിടെ പ്രതിഷേധക്കാരും പൊലീസും തമ്മിലിള്ള ഏറ്റുമുട്ടലില്‍ നാലുപേര്‍ കൊല്ലപ്പെട്ടതായി റിപ്പോര്‍ട്ട്. 70 പേര്‍ക്ക് പരിക്കേറ്റതായും വിവരമുണ്ട്. ഉദ്യോഗസ്ഥര്‍ക്കുനേരെ പ്രതിഷേധക്കാര്‍ കല്ലെറിഞ്ഞു. ലഡാക്കിന് സംസ്ഥാന പദവി നല്‍കുക, ഭരണഘടനയുടെ ആറാം ഷെഡ്യൂളില്‍ ഉള്‍പ്പെടുത്തുക എന്നിവയാണ് ആവശ്യം.
സംഘര്‍ഷത്തിനിടെ സമരക്കാര്‍ പൊലീസ് വാഹനത്തിന് തീയിട്ടു. ലേ മേഖലയില്‍ നടന്ന പ്രകടനത്തിനിടെ പ്രതിഷേധക്കാര്‍ ബിജെപി ഓഫീസിന് നേരെ കല്ലെറിയുകയും തുടര്‍ന്ന് തീയിടുകയും ചെയ്തു. ഇതോടെ പ്രതിഷേധക്കാരെ പിന്തിരിപ്പിക്കാന്‍ പൊലീസുകാര്‍ കണ്ണീര്‍വാതകം പ്രയോഗിക്കുകയും ലാത്തിചാര്‍ജ് നടത്തുകയും ചെയ്തു. ലഡാക്കില്‍ ഇപ്പോള്‍ നിരോധനാജ്ഞ പ്രഖ്യാപിച്ചിരിക്കുകയാണ്.
കഴിഞ്ഞ കുറച്ച് ആഴ്ചകളായി ലഡാക്കില്‍ പ്രതിഷേധം ശക്തമാണ്. പ്രമുഖ പരിസ്ഥിതി പ്രവര്‍ത്തകനായ സോനം വാംഗ്ചുക്കിന് ഐക്യദാര്‍ഢ്യം പ്രഖ്യാപിച്ചാണ് ലേ അപെക്‌സ് ബോഡിയുടെ (എല്‍എബി) യുവജന വിഭാഗം പ്രതിഷേധത്തിന് തുടക്കം കുറിച്ചത്. ലഡാക്കിന് സംസ്ഥാന പദവിയും ആറാം ഷെഡ്യൂള്‍ പദവിയും നല്‍കണമെന്ന് ആവശ്യപ്പെട്ട് സോനം വാംഗ്ചുക്ക് കഴിഞ്ഞ 14 ദിവസമായി നിരാഹാര സമരത്തിലാണ്. ഈ സമരത്തിന് പിന്തുണയേകാനാണ് യുവജനങ്ങള്‍ തെരുവിലിറങ്ങിയത്.
ലഡാക്കിലെ ജനങ്ങളുടെ ആവശ്യങ്ങളില്‍ ചര്‍ച്ചകള്‍ പുനഃരാരംഭിക്കുന്നതിന് അടുത്ത മാസം ആറിന് ലഡാക്ക് പ്രതിനിധികളുമായി ഒരു കൂടിക്കാഴ്ച നടത്താമെന്ന് കേന്ദ്രം അറിയിച്ചിട്ടുണ്ട്. ആര്‍ട്ടിക്കിള്‍ 370 റദ്ദാക്കുകയും ജമ്മുകാശ്മീര്‍ വിഭജിക്കുകയും ചെയ്തതിനെത്തുടര്‍ന്ന് 2019 ഓഗസ്റ്റില്‍ ലഡാക്ക് ഒരു പ്രത്യേക കേന്ദ്രഭരണ പ്രദേശമായി രൂപീകരിക്കപ്പെട്ടു. അന്ന് വാംഗ്ചുക്ക് ഉള്‍പ്പെടെ ലേയിലെ പല പ്രവര്‍ത്തകരും ഈ തീരുമാനത്തെ അംഗീകരിച്ചിരുന്നു. എന്നാല്‍ ഒരു വര്‍ഷത്തിനുള്ളില്‍ ലെഫ്റ്റനന്റ് ഗവര്‍ണറുടെ ഭരണത്തിന് കീഴിലുള്ള ഒരു രാഷ്ട്രീയ ശൂന്യതയെക്കുറിച്ച് ജനങ്ങള്‍ ആശങ്കകള്‍ അറിയിച്ചിരുന്നു. ഇതാണ് പ്രതിഷേധങ്ങള്‍ക്കും നിരാഹാര സമരങ്ങള്‍ക്കും കാരണമായത്.
https://www.facebook.com/Malayalivartha
