സുഹൃത്തിനോടൊപ്പം പുറത്തുപോയ എംബിബിഎസ് വിദ്യാര്‍ത്ഥിനി കൂട്ടബലാത്സംഗത്തിന് ഇരയായി. ബംഗാളിലെ ദുര്‍ഗാപുരിലെ സ്വകാര്യ മെഡിക്കല്‍ കോളേജിന് സമീപം വെള്ളിയാഴ്ച രാത്രിയാണ് സംഭവം നടന്നത്. ഒഡീഷയിലെ ജലേശ്വര സ്വദേശിനിയായ എംബിബിഎസ് രണ്ടാം വര്‍ഷ വിദ്യാര്‍ത്ഥിനി ആണ്‍സുഹൃത്തിനൊപ്പം പുറത്തുപോയപ്പോള്‍ കോളേജിന്റെ ഗേറ്റിന് സമീപം അജ്ഞാതര്‍ ഇരുവരെയും തടഞ്ഞുനിര്‍ത്തുകയായിരുന്നു. രാത്രി എട്ടരയോടെയാണ് സംഭവം നടന്നത്. യുവതിയെ ബലം പ്രയോഗിച്ച് സമീപത്തെ കാട്ടിലേക്ക് കൊണ്ടുപോയാണ് ബലാത്സംഗം ചെയ്തത്.

പെണ്‍കുട്ടിയുടെ സുഹൃത്ത് ഓടിപ്പോയെന്നും ഇയാള്‍ക്ക് ഇതില്‍ പങ്കുണ്ടെന്ന് സംശയമുണ്ടെന്നും യുവതിയുടെ പിതാവ് ആരോപിച്ചു. ആണ്‍സുഹൃത്ത് മനഃപൂര്‍വം മകളെ തെറ്റിദ്ധരിപ്പിച്ച് ഒഴിഞ്ഞസ്ഥലത്തേക്ക് കൊണ്ടുപോയതായും പിതാവ് പരാതിയില്‍ പറയുന്നു. അക്രമികള്‍ മകളുടെ മൊബൈല്‍ ഫോണും കൈയില്‍ ഉണ്ടായിരുന്ന 5,000 രൂപയും തട്ടിയെടുത്തെന്നും പിതാവ് പരാതിയില്‍ വ്യക്തമാക്കി. ദുര്‍ഗാപുരിലെ സ്വകാര്യ ആശുപത്രിയില്‍ പ്രവേശിപ്പിച്ച വിദ്യാര്‍ത്ഥിനിയുടെ ആരോഗ്യനില ഗുരുതരമാണ്.

അതിജീവിതയുടെ മൊഴിയും രേഖപ്പെടുത്തി. സംഭവത്തില്‍ അന്വേഷണം ആരംഭിച്ചതായി യുവതിയുടെ സുഹൃത്ത് ഉള്‍പ്പടെ നിരവധി പേരെ ചോദ്യം ചെയ്യാന്‍ തുടങ്ങിയതായും പൊലീസ് അറിയിച്ചു.