വിദ്യാഭ്യാസ സമ്പ്രദായം ആധുനികവൽക്കരിക്കുന്നതിനും കൂടുതൽ സുതാര്യമാക്കുന്നതിനുമുള്ള കേന്ദ്രസർക്കാരിന്റെ നീക്കത്തിന്റെ ഭാഗമായി സ്‌കൂളുകളുടെ ഫീസ് പേയ്മെന്റ് പ്രക്രിയയിൽ മാറ്റം വരുത്തുന്നു.

ഫീസ്, പരീക്ഷാ ഫീസ്, മറ്റ് സാമ്പത്തിക ഇടപാടുകൾ എന്നിവയ്ക്കായി എല്ലാ സ്‌കൂളുകളും യുപിഐ അടക്കമുള്ള ഡിജിറ്റൽ പേയ്മെന്റ് സംവിധാനങ്ങളിലേക്ക് മാറണമെന്ന് കേന്ദ്ര വിദ്യാഭ്യാസ മന്ത്രാലയം നിർദ്ദേശിച്ചു. സ്‌കൂളുകളുടെ ഭരണപരമായ പ്രക്രിയകൾ ലളിതമാക്കുന്നതിനൊപ്പം മാതാപിതാക്കൾക്കും വിദ്യാർഥികൾക്കും ഇത് ഏറെ ആശ്വാസമാകുമെന്നാണ് വിലയിരുത്തപ്പെടുന്നത്.

ഇതിന്റെ ഭാഗമായി കേന്ദ്ര വിദ്യാഭ്യാസ മന്ത്രാലയം എല്ലാ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും അനുബന്ധ വിദ്യാഭ്യാസ സ്ഥാപനങ്ങൾക്കും കത്തയച്ചു. ഫീസ് പേയ്മെന്റുകളിൽ സുതാര്യത വർദ്ധിപ്പിക്കുന്നതിനും ഭരണപരമായ നടപടിക്രമങ്ങൾ വേഗത്തിലാക്കുന്നതിനും പണമിടപാടുകൾക്ക് പകരം ഡിജിറ്റൽ പേയ്മെന്റ് സംവിധാനങ്ങൾ സ്വീകരിക്കാനാണ് കത്തിൽ ശുപാർശ ചെയ്യുന്നത്.

ഡിജിറ്റൽ ഇടപാടുകൾ പിശകുകളുടെ സാധ്യത കുറയ്ക്കുകയും കൂടുതൽ സുരക്ഷിതമായ റെക്കോർഡ് സൂക്ഷിക്കൽ പ്രക്രിയയിലേക്ക് നയിക്കുകയും ചെയ്യുമെന്നും മന്ത്രാലയം .ഈ സംവിധാനം നടപ്പിലാക്കിയാൽ ഫീസ് അടയ്ക്കാൻ മാതാപിതാക്കൾ ഇനി എല്ലാ മാസവും സ്‌കൂളുകൾ സന്ദർശിക്കേണ്ടി വരില്ല. അവർക്ക് അവരുടെ മൊബൈൽ ഫോണുകൾ വഴി യുപിഐ അല്ലെങ്കിൽ നെറ്റ് ബാങ്കിങ് ഉപയോഗിച്ച് വീട്ടിൽ നിന്ന് ഫീസ് അടയ്ക്കാൻ കഴിയും.

ഇത് സമയം ലാഭിക്കുകയും പണമടയ്ക്കൽ പ്രക്രിയയിൽ സുതാര്യത ഉറപ്പാക്കുകയും ചെയ്യും.