മുംബയിലെ റാം മന്ദിര്‍ റെയില്‍വേ പ്‌ളാറ്റ്‌ഫോമില്‍ യുവതിയുടെ പ്രസവമെടുത്ത് ട്രെയിന്‍ യാത്രക്കാരനായ യുവാവ്. ഇന്നലെ പുലര്‍ച്ചെ ഒരു മണിയോടെയാണ് സംഭവം. സംഭവസ്ഥലത്ത് ഉണ്ടായിരുന്ന മന്‍ജീത് ദില്ലന്‍ എന്നയാള്‍ സമൂഹമാദ്ധ്യത്തില്‍ പോസ്റ്റ് പങ്കുവച്ചതോടെയാണ് വിവരം പുറത്തറിയുന്നത്. വികാസ് ബെന്‍ഡ്രെ എന്ന യുവാവാണ് ധീരകൃത്യത്തിന് കയ്യടി നേടുന്നത്.

പോസ്റ്റിന്റെ പൂര്‍ണരൂപം:

ഈ മനുഷ്യന്‍ ശരിക്കും ഒരു ധീരനാണ്, വാക്കുകള്‍ കൊണ്ട് വിവരിക്കാന്‍ കഴിയില്ല. രാം മന്ദിര്‍ സ്‌റ്റേഷനില്‍ പുലര്‍ച്ചെ ഒരു മണിയോടെ ഈ യുവാവ് ചെയിന്‍ വലിച്ച് ട്രെയിന്‍ നിര്‍ത്തിയതാണ് എല്ലാത്തിനും തുടക്കം. ഇത് പറയുമ്പോള്‍ എനിക്ക് ഇപ്പോഴും മരവിപ്പ് തോന്നുന്നു. ആ യുവതിയുടെ കുഞ്ഞ് പകുതി പുറത്തായിരുന്നു, പകുതി അകത്തും പകുതി പുറത്തും. ആ നിമിഷം, ദൈവം ഈ സഹോദരനെ അവിടെ അയച്ചതിന് ഒരു കാരണമുണ്ടായിരുന്നു എന്നെനിക്ക് തോന്നുന്നു.

ഞങ്ങള്‍ എല്ലാവരും ചെയ്യാവുന്ന കാര്യങ്ങളെല്ലാം ചെയ്തു. നിരവധി ഡോക്ടര്‍മാരെ വിളിച്ചു. എന്നാല്‍ ആംബുലന്‍സ് എത്താന്‍ വൈകുമെന്നായിരുന്നു അവര്‍ അറിയിച്ചത്. ഒടുവില്‍, ഒരു വനിതാ ഡോക്ടര്‍ വീഡിയോ കോളിലൂടെ യുവാവിന് നിര്‍ദേശങ്ങള്‍ നല്‍കുകയായിരുന്നു. അദ്ദേഹം കൃത്യമായി നിര്‍ദേശങ്ങള്‍ പിന്തുടര്‍ന്നു. ആ നിമിഷത്തില്‍ അദ്ദേഹം കാട്ടിയ ധൈര്യം വാക്കുകള്‍ക്കതീതമാണ്.

നേരത്തെ, യുവതിയുടെ കുടുംബം അവരെ അടുത്തുള്ള ആശുപത്രിയിലേക്ക് കൊണ്ടുപോയിരുന്നു. എന്നാല്‍ പ്രസവം അവിടെ നടത്താന്‍ കഴിയില്ലെന്നാണ് ആശുപത്രി അധികൃതര്‍ പറഞ്ഞത്. അതിനാല്‍ അവര്‍ക്ക് അവരെ ട്രെയിനില്‍ തിരികെ കൊണ്ടുവരേണ്ടി വരികയായിരുന്നു. ഇത്തരമൊരു സാഹചര്യത്തില്‍ അമ്മയെ സഹായിക്കാന്‍ ഒരു ആശുപത്രി വിസമ്മതിച്ചത് ശരിക്കും ലജ്ജാകരമാണ്.

ആ രാത്രിയില്‍, രണ്ട് ജീവന്‍ രക്ഷിക്കാന്‍ ആ യുവാവ് കാരണമായി. പലരും നോക്കി നില്‍ക്കുകയും നടന്നു പോകുകയുമാണ് ചെയ്തത്. ആരെയെങ്കിലും സഹായിക്കാന്‍ നിങ്ങള്‍ക്ക് എപ്പോഴെങ്കിലും അവസരം ലഭിക്കുകയാണെങ്കില്‍, അത് ദൈവത്തില്‍ നിന്നുള്ള ഒരു അടയാളമായി കണക്കാക്കി ചെയ്യുക സുഹൃത്തുക്കളേ. ആ യുവാവ് അമ്മയുടെയും കുഞ്ഞിന്റെയും ജീവന്‍ രക്ഷിച്ചു. പിന്നീട് ഞങ്ങള്‍ ഒരുമിച്ച് അവരെ സുരക്ഷിതമായി ആശുപത്രിയില്‍ എത്തിക്കുകയും ചെയ്തു. എനിക്ക് ഇപ്പോള്‍ എന്താണ് തോന്നുന്നതെന്ന് വാക്കുകളില്‍ പ്രകടിപ്പിക്കാന്‍ സാധിക്കില്ല.