യുവതിയുടെ ഗര്‍ഭത്തെ ചൊല്ലിയുള്ള തര്‍ക്കം കലാശിച്ചത് കൊലപാതകത്തില്‍. ഗര്‍ഭിണിയായ യുവതിയെ കാമുകന്‍ നടുറോഡിലിട്ട് പരസ്യമായിട്ട് കുത്തിക്കൊലപ്പെടുത്തി. സംഭവത്തിന് പിന്നാലെ യുവതിയുടെ ഭര്‍ത്താവ് കാമുകനെയും കുത്തിക്കൊലപ്പെടുത്തി. ഇന്നലെ രാത്രിയോടെ ഡല്‍ഹിയിലെ കുത്തബ് റോഡിലാണ് സംഭവം. 22കാരിയായ ശാലിനി എന്ന വീട്ടമ്മയാണ് കൊല്ലപ്പെട്ടത്. ശാലിനിയുമായി അടുപ്പത്തിലായിരുന്ന 34കാരനായ ആഷു എന്ന ഷൈലേന്ദ്രനെയാണ് യുവതിയുടെ ഭര്‍ത്താവ് കുത്തി കൊലപ്പെടു്ത്തിയത്. 23കാരിയായ ശാലിനിയുടെ പങ്കാളി ആകാശ് ഗുരുതരമായ പരിക്കുകളോടെ ആശുപത്രിയില്‍ ചികിത്സയിലാണ്.

ശാലിനി തന്റെ കുഞ്ഞിനെയാണ് ഗര്‍ഭം ധരിച്ചിരിക്കുന്നതെന്നും, ഭര്‍ത്താവിനൊപ്പം ജീവിക്കാനുള്ള ശാലിനിയുടെ തീരുമാനത്തില്‍ തനിക്ക് ദേഷ്യമുണ്ടെന്നും ആഷു പൊലീസിനോട് പറഞ്ഞിരുന്നു. ശാലിനിയും ഭര്‍ത്താവ് ആകാശും ശാലിനിയുടെ അമ്മയെ കാണാനായി കുത്തബ് റോഡില്‍ പോയതായിരുന്നു. ഈ സമയത്ത് അപ്രതീക്ഷിതമായി അവിടെയെത്തിയ ആഷു, ആകാശിനെ കത്തികൊണ്ട് ആക്രമിക്കാന്‍ ശ്രമിച്ചെങ്കിലും ആകാശ് ഒഴിഞ്ഞുമാറി. തുടര്‍ന്ന് റിക്ഷയിലുണ്ടായിരുന്ന ശാലിനിയുടെ നേര്‍ക്ക് ആഷു പലതവണ കുത്തിപ്പരിക്കേല്‍പ്പിക്കുകയായിരുന്നു.

ഭാര്യയെ രക്ഷിക്കാന്‍ ആകാശ് ശ്രമിക്കുന്നതിനിടെ, ആഷു ഇയാളെയും കുത്തിപ്പരിക്കേല്‍പ്പിച്ചു. എന്നാല്‍ ആകാശ് ആഷുവിനെ കീഴ്‌പ്പെടുത്തി അയാളുടെ കൈവശമുണ്ടായിരുന്ന കത്തിയെടുത്ത് തിരികെ കുത്തി കൊലപ്പെടുത്തുകയായിരുന്നു. ശാലിനിയുടെ സഹോദരന്‍ രോഹിത് ഉടന്‍ തന്നെ ശാലിനിയെയും ഭര്‍ത്താവിനെയും ആശുപത്രിയിലെത്തിച്ചു. പൊലീസ് ആഷുവിനെയും ഇതേ ആശുപത്രിയിലെത്തിച്ചു. ആശുപത്രിയില്‍ വച്ച് ശാലിനിയും ആഷുവും മരിച്ചതായി ഡോക്ടര്‍മാര്‍ സ്ഥിരീകരിച്ചു. ഭാര്യയെ രക്ഷിക്കാനുള്ള ശ്രമത്തിനിടെ ആകാശിന് ഗുരുതരമായി പരിക്കേല്‍ക്കുകയും ചെയ്തു.

സംഭവത്തെ തുടര്‍ന്ന് പ്രദേശത്ത് വലിയ ആശങ്കയാണ് ഉണ്ടാക്കിയിരിക്കുന്നത്. ശാലിനിയുടെ അമ്മയായ ഷീലയുടെ മൊഴിയുടെ അടിസ്ഥാനത്തില്‍ പൊലീസ് കൊലപാതകത്തിനും വധശ്രമത്തിനും കേസെടുത്തു. മൃതദേഹങ്ങള്‍ പോസ്റ്റ്‌മോര്‍ട്ടത്തിനായി അയച്ചിട്ടുണ്ട്. വര്‍ഷങ്ങള്‍ക്ക് മുമ്പ് ശാലിനിയും ആകാശും തമ്മിലുള്ള ബന്ധം വഷളായപ്പോഴാണ് ശാലിനി ആഷുവുമായി ബന്ധം ആരംഭിച്ചതെന്നും കുറച്ചുകാലം ഒരുമിച്ച് താമസിച്ചിരുന്നതായും ഷീല മൊഴി നല്‍കി. പിന്നീട് ശാലിനിയും ആകാശും തമ്മില്‍ പിണക്കം മാറി തങ്ങളുടെ രണ്ട് കുട്ടികള്‍ക്കൊപ്പം വീണ്ടും ഒരുമിച്ച് ജീവിക്കാന്‍ തുടങ്ങുകയുമായിരുന്നു. ഇതാണ് ആഷുവിനെ പ്രകോപിപ്പിച്ചത്. താനാണ് ശാലിനിയുടെ ഗര്‍ഭസ്ഥശിശുവിന്റെ പിതാവെന്ന് ആഷു അവകാശപ്പെട്ടു. എന്നാല്‍ കുഞ്ഞിന്റെ പിതാവ് ആകാശാണെന്ന് ശാലിനി വാദിക്കുകയായിരുന്നു. ഇതാണ് ആക്രമണം ആസൂത്രണം ചെയ്യാന്‍ ആഷുവിനെ പ്രേരിപ്പിച്ചതെന്നും പൊലീസ് വ്യക്തമാക്കി.