അഞ്ചാം ക്ലാസുകാരനെ പിവിസി പൈപ്പ് കൊണ്ട് മര്‍ദിച്ച് പ്രിന്‍സിപ്പല്‍
സ്‌കൂളില്‍ വരാത്തതിനെ ചോദ്യം ചെയ്ത് അഞ്ചാം ക്ലാസുകാരനെ സ്‌കൂള്‍ പ്രിന്‍സിപ്പല്‍ പിവിസി പൈപ്പ് കൊണ്ട് മര്‍ദിച്ചതായി പരാതി. കര്‍ണാടകയിലെ സുങ്കടകട്ടെയിലെ പൈപ്പ് ലൈന്‍ റോഡിലുള്ള ന്യൂ സെന്റ് മേരീസ് പബ്ലിക് സ്‌കൂളിലെ പ്രിന്‍സിപ്പല്‍ രാകേഷ് കുമാറിനെതിരെയാണ് പരാതി ഉയര്‍ന്നത്. ഈ മാസം 14നാണ് സംഭവം നടന്നത്. പ്രിന്‍സിപ്പലിനെ കൂടാതെ സ്‌കൂള്‍ ഉടമ വിജയ് കുമാര്‍, അദ്ധ്യാപിക ചന്ദ്രിക എന്നിവര്‍ക്കെതിരെയും കുട്ടിയുടെ മാതാവ് ദിവ്യ പരാതി നല്‍കി.
കുട്ടിയുടെ മാതാവിന്റെ പരാതിയുടെ അടിസ്ഥാനത്തില്‍ ആരോപണവിധേയരായ മൂന്ന് പേര്‍ക്ക് പൊലീസ് നോട്ടീസ് അയച്ചു. സംഭവം സ്‌കൂളില്‍ നടന്നതിനാല്‍ ഇക്കാര്യം വിദ്യാഭ്യാസ വകുപ്പിന്റെ ശ്രദ്ധയില്‍പ്പെടുത്തിയെന്നും പൊലീസ് അറിയിച്ചു. സ്‌കൂള്‍ സമയം കഴിഞ്ഞപ്പോള്‍ തന്റെ മകനെ ക്ലാസ് മുറിയില്‍ പൂട്ടിയിട്ട് മര്‍ദ്ദിച്ചതായും പരാതിയില്‍ പറയുന്നു. 2000ലെ ജുവനൈല്‍ ജസ്റ്റിസ് ആക്ടിലെ സെക്ഷന്‍ 75 പ്രകാരം കുട്ടികളോടുള്ള ക്രൂരത, അപകടകരമായ ആയുധങ്ങള്‍ ഉപയോഗിച്ച് പരിക്കേല്‍പ്പിക്കല്‍, ഭീഷണിപ്പെടുത്തല്‍ എന്നീ കുറ്റങ്ങള്‍ ചുമത്തി പ്രതിക്കെതിരെ കേസെടുത്തതായി പൊലീസ് അറിയിച്ചു.
രണ്ട് ദിവസം സ്‌കൂളില്‍ കുട്ടി വന്നിരുന്നില്ല. ഇതിനാണ് മര്‍ദനമെന്നാണ് പരാതി. 14ാം തീയതി വൈകുന്നേരം നാലിനും അഞ്ചിനും ഇടയിലാണ് കുട്ടിയെ മര്‍ദിച്ചതെന്നും അടുത്ത ദിവസം തന്നെ പരാതി നല്‍കിയെന്നും ദിവ്യ വ്യക്തമാക്കി. കഴിഞ്ഞ മൂന്ന് വര്‍ഷമായി മകന് ഈ സ്‌കൂളിലാണ് പഠിക്കുന്നതെന്നും ഫീസ് കൃത്യമായി നല്‍കുന്നുണ്ടെന്നും ദിവ്യ പറയുന്നു.
'രാകേഷ് കുമാര്‍ പ്ലാസ്റ്റിക് പിവിസി പൈപ്പ് ഉപയോഗിച്ച് എന്റെ മകനെ നിഷ്‌കരുണം അടിച്ചു. ശക്തിയായി അടിച്ചതിന്റെ ഫലമായി ആ ഭാഗത്ത് രക്തം കട്ടപിടിച്ചു. അടി കിട്ടാതിരിക്കാന്‍ ഓടിമാറാന്‍ ശ്രമിച്ച കുട്ടിയെ ക്ലാസ് ടീച്ചര്‍ ചന്ദ്രിക പിടിച്ചുവയ്ക്കുകയും വീണ്ടും ആക്രമിക്കുകയും ചെയ്തു. സംഭവ സമയത്ത് സ്‌കൂള്‍ ഉടമ വിജയ് കുമാറും അവിടെ ഉണ്ടായിരുന്നു. ഇയാള്‍ കുട്ടിയെ അടിക്കുന്നത് തുടരാന്‍ പ്രിന്‍സിപ്പലിനെ പ്രോത്സാഹിപ്പിക്കുകയായിരുന്നു. ഈ സംഭവത്തില്‍ കുട്ടിക്ക് ശാരീരികവും മാനസികവുമായ ആഘാതം ഉണ്ടായി.
സംഭവത്തെ ചോദ്യം ചെയ്തപ്പോള്‍ ഞങ്ങളുടെ സ്‌കൂളിലെ വിദ്യാര്‍ത്ഥികളെ ഇങ്ങനെയാണ് ശിക്ഷിക്കുന്നതെന്നും അതില്‍ ഇടപെടരുതെന്നുമാണ് അധികൃതര്‍ പറഞ്ഞത്. സംഭവത്തിന് ശേഷം മകനെക്കുറിച്ച് മാനോജ്‌മെന്റ് വിളിച്ചുപോലും അന്വേഷിച്ചില്ല. എന്റെ മകന് ലഹരിവസ്തുക്കള്‍ കഴിച്ചതായാണ് അവര്‍ ആരോപിക്കുന്നത്. അങ്ങനെയെങ്കില്‍ എന്റെ മകന് വേണ്ടി അവര്‍ ഒരു മെഡിക്കല്‍ പരിശോധന നടത്തട്ടെ. അവരുടെ തെറ്റുകള്‍ മറയ്ക്കാന്‍ എന്റെ മകനെ തെറ്റുക്കാരനാക്കുകയാണ് ' ദിവ്യ പരാതിയില്‍ വ്യക്തമാക്കി.
https://www.facebook.com/Malayalivartha
