ബോളിവുഡ് നടന്‍ സുശാന്ത് സിംഗ് രാജ്പുത്തിന്റെ ആത്മഹത്യയുമായി ബന്ധപ്പെട്ട കേസില്‍ നടി റിയ ചക്രവര്‍ത്തിക്ക് ക്ലീന്‍ ചിറ്റ് നല്‍കി സിബിഐ (സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍) 'ക്ലോഷര്‍ റിപ്പോര്‍ട്ട്' സമര്‍പ്പിച്ചു. സുശാന്തിനെ 'നിയമവിരുദ്ധമായി തടവിലാക്കുകയോ, ഭീഷണിപ്പെടുത്തുകയോ, ആത്മഹത്യക്ക് പ്രേരിപ്പിക്കുകയോ' ചെയ്തതിന് തെളിവില്ലെന്ന് റിപ്പോര്‍ട്ടില്‍ പറയുന്നു.

2020 ജൂണ്‍ 14ന് മുംബൈയിലെ ബാന്ദ്രയിലുള്ള ഫ്‌ലാറ്റില്‍ സുശാന്തിനെ തൂങ്ങിമരിച്ച നിലയില്‍ കണ്ടെത്തുകയായിരുന്നു. എന്നാല്‍, സിബിഐയുടെ കണ്ടെത്തലുകള്‍ 'കണ്ണില്‍ പൊടിയിടല്‍' ആണെന്നും 'അപൂര്‍ണ്ണമായ രേഖ'യാണെന്നും വിശേഷിപ്പിച്ച് സുശാന്തിന്റെ കുടുംബം റിപ്പോര്‍ട്ട് തള്ളിക്കളഞ്ഞു. സുശാന്തിന്റെ പിതാവ് കെ.കെ. സിംഗ് നല്‍കിയ കേസ് ഉള്‍പ്പെടെ രണ്ട് കേസുകളിലാണ് സിബിഐ ക്ലോഷര്‍ റിപ്പോര്‍ട്ട് സമര്‍പ്പിച്ചത്.

റിയ ചക്രവര്‍ത്തിക്കെതിരെ സുശാന്തിന്റെ കുടുംബം ഉന്നയിച്ച പ്രധാന ആരോപണങ്ങളെല്ലാം സിബിഐ റിപ്പോര്‍ട്ടില്‍ തള്ളിക്കളയുന്നു. റിയയും സഹോദരന്‍ ഷോവിക്കും ജൂണ്‍ 8ന് ഫ്‌ലാറ്റ് വിട്ടുപോയെന്നും, സുശാന്തിന്റെ മരണം വരെ (ജൂണ്‍ 14) അവര്‍ ആരും അവിടെ താമസിക്കുകയോ സുശാന്തുമായി സംസാരിക്കുകയോ ചെയ്തിട്ടില്ലെന്നും റിപ്പോര്‍ട്ടില്‍ പറയുന്നു. അതേസമയം, ജൂണ്‍ 8 മുതല്‍ 12 വരെ സുശാന്തിന്റെ സഹോദരി മീതു സിംഗ് അദ്ദേഹത്തോടൊപ്പം ഫ്‌ലാറ്റില്‍ ഉണ്ടായിരുന്നു. സുശാന്ത് സമ്മാനമായി നല്‍കിയ ആപ്പിള്‍ ലാപ്‌ടോപ്പും വാച്ചുമല്ലാതെ, മറ്റെന്തെങ്കിലും സ്വത്ത് റിയ കൈക്കലാക്കിയതിന് തെളിവില്ലെന്നും സാമ്പത്തിക ഇടപാടുകള്‍ അദ്ദേഹത്തിന്റെ ചാര്‍ട്ടേഡ് അക്കൗണ്ടന്റാണ് കൈകാര്യം ചെയ്തിരുന്നതെന്നും റിപ്പോര്‍ട്ടില്‍ പറയുന്നു.

റിയയെ സുശാന്ത് 'കുടുംബം' എന്ന് വിശേഷിപ്പിച്ചിരുന്നുവെന്നും, റിയയോ മറ്റ് പ്രതികളോ സുശാന്തിനെ ഭീഷണിപ്പെടുത്തിയതിന് ഡിജിറ്റല്‍ തെളിവുകള്‍ ലഭ്യമല്ലെന്നും സിബിഐ വ്യക്തമാക്കി. റിയ ആത്മഹത്യാ ഭീഷണി മുഴക്കിയതായി കുടുംബം ആരോപിച്ചത് കേട്ടുകേള്‍വി മാത്രമാണെന്നും റിപ്പോര്‍ട്ട് കൂട്ടിച്ചേര്‍ത്തു. കൂടാതെ, സുശാന്തിനെ ആരും തടവിലാക്കുകയോ നിയന്ത്രിക്കുകയോ ചെയ്തതിന് തെളിവില്ലെന്നും, ആത്മഹത്യയിലേക്ക് നയിക്കാന്‍ പ്രതികളാരെങ്കിലും ഉടനടി പ്രകോപനമുണ്ടാക്കുകയോ പ്രേരിപ്പിക്കുകയോ ചെയ്തതിന് തെളിവില്ലെന്നും ക്ലോഷര്‍ റിപ്പോര്‍ട്ടില്‍ സിബിഐ അന്തിമമായി പറയുന്നു.