തങ്ങൾ ആക്രമിക്കപ്പെട്ടാൽ മേഖലയാകെ യുദ്ധത്തിലേക്ക് നീങ്ങുമെന്ന് ഇറാൻ പരമോന്നത നേതാവ് ആയത്തുല്ല അലി ഖാമേനി മുന്നറിയിപ്പ് നൽകി. മേഖലയിൽ അമേരിക്ക തങ്ങളുടെ സൈനിക സാന്നിധ്യം വർദ്ധിപ്പിക്കുന്നതിനിടയിലാണ് ഈ പ്രസ്താവന. 'ഇറാനെതിരെ യുദ്ധം തുടങ്ങിയാൽ ഇത്തവണ അത് ഒരു മേഖലാ യുദ്ധമായിരിക്കും എന്ന് അമേരിക്കക്കാർ മനസ്സിലാക്കണം,' ഖമേനിയെ ഉദ്ധരിച്ച് വാർത്താ ഏജൻസികൾ റിപ്പോർട്ട് ചെയ്തു. ട്രംപ് പതിവായി കപ്പലുകളെക്കുറിച്ച് പറയുന്നുണ്ടെങ്കിലും അതിലൊന്നും ഇറാനിയൻ ജനത ഭയപ്പെടുന്നില്ലെന്ന് ഖമേനി കൂട്ടിച്ചേർത്തു.ഇറാൻ്റെ ആണവ പദ്ധതികളെക്കുറിച്ചും രാജ്യത്തെ പ്രതിഷേധങ്ങളെ അടിച്ചമർത്തുന്നതിനെക്കുറിച്ചും ട്രംപ് പ്രതികരിച്ചിരുന്നു. ഇറാൻ്റെ ആണവ പദ്ധതികളെക്കുറിച്ച് ചർച്ചകൾ നടക്കുന്നുണ്ടെന്നും തൃപ്തികരമായ ഒരു ഉടമ്പടി പ്രതീക്ഷിക്കുന്നതായും ട്രംപ് പറഞ്ഞു. അമേരിക്കയുമായുള്ള ചർച്ചകളിൽ വിശ്വാസം നഷ്ടപ്പെട്ടതായി ഇറാൻ വിദേശകാര്യ മന്ത്രി അബ്ബാസ് അറാഖ്ചി പ്രസ്താവന ഇറക്കിയിട്ടുണ്ട്. അതെസമയം സൗഹൃദ രാജ്യങ്ങൾ വഴി യുഎസ്സുമായുള്ള ആശയവിനിമയം ഫലപ്രദമായി നീങ്ങുന്നുണ്ടെന്ന് മന്ത്രി അബ്ബാസ് അറാഖ്ചി പറഞ്ഞു.

ഇറാനെതിരായ അമേരിക്കയുടെ സൈനിക വിന്യാസത്തിൻ്റെ ഭാഗമായി യുഎസ്എസ് എബ്രഹാം ലിങ്കൺ വിമാനവാഹിനി കപ്പൽ മേഖലയിലേക്ക് അയച്ചിട്ടുണ്ട്. അറബിക്കടലിൽ അമേരിക്കൻ സൈനിക സാന്നിധ്യം വർദ്ധിച്ചിട്ടുണ്ട്.

അതിനിടെ ലോകത്തിലെ ഏറ്റവും പ്രധാനപ്പെട്ട കപ്പൽ പാതകളിലൊന്നായ ഹോർമുസ് കടലിടുക്കിൽ ഇറാൻ നാവിക അഭ്യാസം നടത്താൻ ഒരുങ്ങുന്നുണ്ട്. ലോകത്തിലെ ഊർജ്ജ വിതരണത്തിന് ഏറെ പ്രാധാന്യമുള്ള പാതയാണിത്. യുദ്ധമുണ്ടായാൽ ഈ മേഖലയടക്കം തടസ്സപ്പെടുമെന്ന സന്ദേശം കൂടി പകരുകയാണ് ലക്ഷ്യമെന്ന് കരുതപ്പെടുന്നു.

എന്നാൽ ഇറാനിയൻ വിപ്ലവ ഗാർഡ്സ് കോർപ്സ് (IRGC) നാവിക വിഭാഗത്തിന് അത്തരം അഭ്യാസങ്ങൾ നടത്താൻ പദ്ധതിയില്ലെന്നും ചില ഇറാനിയൻ ഉദ്യോഗസ്ഥർ പറയുന്നുണ്ട്. ലോക വ്യാപാരത്തിൻ്റെ അഞ്ചിലൊന്ന് എണ്ണയും ഈ കടലിടുക്ക് വഴിയാണ് കടന്നുപോകുന്നത്. ഇറാൻ ആക്രമിക്കപ്പെട്ടാൽ ഈ കടലിടുക്ക് അടച്ചിടുമെന്ന് ഇറാൻ മുമ്പ് ഭീഷണി മുഴക്കിയിരുന്നു. 'ഞങ്ങളുടെ ശക്തമായ സായുധ സേനകൾ സ്വന്തം തട്ടകത്തിൽ എന്ത് ചെയ്യണമെന്ന് നിർദ്ദേശിക്കാനാണ് യുഎസ് സൈന്യം ഇപ്പോൾ ശ്രമിക്കുന്നത്,' മന്ത്രി അറാഖ്ചി പറഞ്ഞു.

അതെസമയം ശനിയാഴ്ച ഇറാനിലുണ്ടായ രണ്ട് സ്ഫോടനങ്ങൾ രാജ്യത്ത് ആശങ്ക വർദ്ധിപ്പിച്ചു. തെക്കൻ തുറമുഖ നഗരമായ ബന്ദർ അബ്ബാസിലെ ഒരു കെട്ടിടത്തിലുണ്ടായ സ്ഫോടനത്തിൽ ഒരാൾ മരിക്കുകയും 14 പേർക്ക് പരിക്കേൽക്കുകയും ചെയ്തു. ഗ്യാസ് ലീക്ക് ആണ് സ്ഫോടനത്തിന് കാരണമെന്ന് അധികൃതർ പറഞ്ഞു. റവല്യൂഷണറി ഗാർഡ്സ് കോർപ്സ് നാവിക കമാൻഡറെ ലക്ഷ്യമിട്ടാണ് സ്ഫോടനം നടത്തിയതെന്ന സോഷ്യൽ മീഡിയ റിപ്പോർട്ടുകൾ ഇറാൻ നിഷേധിച്ചിട്ടുണ്ട്. തെക്കുപടിഞ്ഞാറൻ നഗരമായ അഹ്‌വാസിൽ മറ്റൊരു സ്ഫോടനത്തിൽ നാല് പേർ കൊല്ലപ്പെട്ടു. ഇതും ഗ്യാസ് ലീക്ക് മൂലമാണെന്ന് അധികൃതർ പറഞ്ഞു.