മുംബൈയില് എയര് ഇന്ത്യ, ഇന്ഡിഗോ വിമാനങ്ങളുടെ ചിറകുകള് തമ്മില് കൂട്ടിയിടിച്ചു
മുംബൈ ഛത്രപതി ശിവാജി രാജ്യാന്തര വിമാനത്താവളത്തില് എതിര് ദിശകളില് വന്ന എയര് ഇന്ത്യ, ഇന്ഡിഗോ വിമാനങ്ങളുടെ ചിറകുകള് കൂട്ടിയിടിച്ചു. വന് അപകടം ഒഴിവായി. ടാക്സിവേയില് വച്ച് വിമാനങ്ങളുടെ ചിറകുകളുടെ അഗ്രങ്ങള് കൂട്ടിയിടിക്കുകയായിരുന്നു. എയര് ഇന്ത്യയുടെ മുംബൈ–കോയമ്പത്തൂര് വിമാനവും ഇന്ഡിഗോയുടെ ഹൈദരാബാദ്–മുംബൈ വിമാനവുമാണ് അപകടത്തില്പ്പെട്ടത്.
പുറപ്പെടാനൊരുങ്ങിയ എയര് ഇന്ത്യ വിമാനത്തിന്റെ ചിറക് ലാന്ഡ് ചെയ്ത ഇന്ഡിഗോ വിമാനത്തിന്റെ ചിറകില് ഇടിക്കുകയായിരുന്നു. സംഭവമുണ്ടാകുമ്പോള് ഇരു വിമാനങ്ങളിലും യാത്രക്കാരുണ്ടായിരുന്നെങ്കിലും ആര്ക്കും പരിക്കില്ലെന്നാണ് വിവരം. യാത്രക്കാരെ സുരക്ഷിതരായി തിരിച്ചിറക്കിയതായി എയര് ഇന്ത്യ വക്താവ് അറിയിച്ചു. സംഭവത്തെ തുടര്ന്ന് എയര് ഇന്ത്യ വിമാനം പുറപ്പെടുന്നത് വൈകുകയാണ്.
'മുംബൈയില്നിന്ന് കോയമ്പത്തൂരിലേക്ക് പോകുന്ന ഫ്ലൈറ്റ് എഐ2732 മറ്റൊരു വിമാനത്തില് ഇടിച്ചതിനാല് പുറപ്പെടുന്നത് വൈകും. ഇരുവിമാനങ്ങളുടെയും ചിറകിന്റെ അഗ്രങ്ങളാണ് കൂട്ടിയിടിച്ചത്. സംഭവത്തില് എയര് ഇന്ത്യ വിമാനത്തിന് കേടുപാടുണ്ടായിട്ടുണ്ട്.
മുന്കരുതലെന്ന നിലയില് വിമാനം നിലത്തിറക്കി സാങ്കേതിക പരിശോധനകള് ആരംഭിച്ചിട്ടുണ്ട്. എല്ലാ യാത്രക്കാരെയും സുരക്ഷിതരായി തിരിച്ചിറക്കി. യാത്രക്കാരെ ലക്ഷ്യസ്ഥാനത്തെത്തിക്കാന് ബദല് മാര്ഗങ്ങള് സ്വീകരിക്കും.'–എയര് ഇന്ത്യ പ്രസ്താവനയില് അറിയിച്ചു. ഡിജിസിഎ സംഘം സ്ഥലത്തെത്തിയിട്ടുണ്ട്.
https://www.facebook.com/Malayalivartha
