നീറ്റ് പരീക്ഷയെഴുതാന്‍ നിര്‍ബന്ധിച്ച അച്ഛനെ വെടിവെച്ച് കൊലപ്പെടുത്തി മകന്‍. സഹോദരിയുടെ മുന്നില്‍വെച്ചാണ് ഈ ക്രൂര കൃത്യം സഹോദരന്‍ ചെയ്തത്. ലഖ്‌നൗവിലാണ് സംഭവം നടന്നത്. 21 വയസ്സുകാരനായ അക്ഷതിനെ അറസ്റ്റ് ചെയ്തതായി പോലീസ് പറഞ്ഞു. ഫാര്‍മസ്യൂട്ടിക്കല്‍, മദ്യ വ്യാപാരം തുടങ്ങിയ മേഖലകളില്‍ ബിസിനസ് നടത്തിയിരുന്ന 49 കാരനായ മാനവേന്ദ്ര സിംഗാണ് കൊല്ലപ്പെട്ടത്. വെള്ളിയാഴ്ച മുതല്‍ ഇയാളെ കാണാനില്ലായിരുന്നു. വീപ്പയില്‍ നിന്ന് ശരീരഭാഗങ്ങള്‍ കണ്ടെത്തിയതിനെ തുടര്‍ന്ന് മകന്‍ അക്ഷത് പ്രതാപ് സിങ്ങിനെ ചോദ്യം ചെയ്യാന്‍ തുടങ്ങിയപ്പോഴാണ് സംഭവങ്ങളുടെ ചുരുളഴിയുന്നത്. കൊലപാതകം നടത്തിയതായും മൃതദേഹം മറവുചെയ്തതായും അക്ഷത് സമ്മതിച്ചതായി പൊലീസ് പറഞ്ഞു.

മകനെ മെഡിക്കല്‍ മത്സര പരീക്ഷ എഴുതിപ്പിക്കണമെന്നും മെഡിക്കല്‍ കരിയര്‍ പിന്തുടരണമെന്നും മാനവേന്ദ്ര സിംഗ് ആഗ്രഹിച്ചിരുന്നതായി പൊലീസ് പറഞ്ഞു. എന്നാല്‍ മകന് എതിര്‍പ്പായിരുന്നു. ഇതിന്റെ പേരില്‍ ഇരുവരും തമ്മില്‍ ഇടയ്ക്കിടെ തര്‍ക്കങ്ങള്‍ ഉണ്ടാകാറുണ്ടായിരുന്നു. യുവാവ് ഒരിക്കല്‍ വീട്ടില്‍ നിന്ന് ഒളിച്ചോടുകയും ചെയ്തിരുന്നു. വെള്ളിയാഴ്ച വൈകുന്നേരം 4.30 ഓടെ വീണ്ടും തര്‍ക്കമുണ്ടായി. തുടര്‍ന്ന് അക്ഷത് തന്റെ പിതാവിനെ വെടിവച്ചു. തുടര്‍ന്ന് മൃതദേഹം മൂന്നാം നിലയില്‍ നിന്ന് താഴത്തെ നിലയിലേക്ക് എത്തിച്ച് ഒഴിഞ്ഞ മുറിയില്‍ കഷണങ്ങളാക്കാന്‍ തുടങ്ങി.

സഹോദരി കണ്ടപ്പോള്‍ ഭയപ്പെടുത്തി നിശബ്ദയാക്കി. തുടര്‍ന്ന് സഹോദരിയുടെ മുന്നില്‍ വെച്ച് മൃതദേഹം കഷണങ്ങളാക്കി. ശരീരഭാഗങ്ങള്‍ പ്ലാസ്റ്റിക്കില്‍ പൊതിഞ്ഞു. പിന്നീട് സദരുണയ്ക്ക് സമീപം ഉപേക്ഷിച്ചു. ചില ഭാഗങ്ങള്‍ വീടിനുള്ളില്‍ സൂക്ഷിച്ചിരുന്ന നീല ഡ്രമ്മില്‍ സൂക്ഷിച്ചു. കുറ്റസമ്മതം നടത്തിയതിന് ശേഷം ഫോറന്‍സിക് സംഘത്തെ വിളിച്ചുവരുത്തി. ശരീരഭാഗങ്ങള്‍ കണ്ടെത്താനുള്ള ശ്രമങ്ങളും പുരോഗമിക്കുകയാണ്. അക്ഷതിനെ പോലീസ് കസ്റ്റഡിയിലെടുത്തിട്ടുണ്ട്. ലഭിച്ച തെളിവുകളുടെ അടിസ്ഥാനത്തില്‍, ബന്ധപ്പെട്ട വകുപ്പുകള്‍ പ്രകാരം കേസ് രജിസ്റ്റര്‍ ചെയ്യുകയും തുടര്‍ നിയമനടപടികള്‍ ഉറപ്പാക്കുകയും ചെയ്യുമെന്ന് ലഖ്‌നൗവിലെ ആഷിയാന ഏരിയയിലെ മുതിര്‍ന്ന ഉദ്യോഗസ്ഥന്‍ വിക്രാന്ത് വീര്‍ പറഞ്ഞു.