കടലാമകളെ സംരക്ഷിക്കാത്തതിനാല്‍ 2019മുതല്‍ കേരളത്തില്‍ നിന്നുള്ള ചെമ്മീന്‍ ഇറക്കുമതി അമേരിക്ക വിലക്കിയിരിക്കുകയാണ്. പ്രതിവര്‍ഷം 2500കോടിയോളം വരുമാന നഷ്ടമുണ്ടാവുന്ന സാഹചര്യത്തിലാണ് വിലക്ക് നീക്കാനുള്ള ആമസംരക്ഷണ നടപടികളിലേക്ക് കടക്കുന്നത്.

ചെമ്മീന്‍വലയില്‍ കുടുങ്ങി ആമകള്‍ നശിക്കുന്നെന്ന കാരണത്താലാണ് കയറ്റുമതി നിരോധനം. കടുത്തവംശനാശ ഭീഷണി നേരിടുന്ന ഒലിവ് റിഡ്‌ലി കടലാമകളും കേരളതീരത്ത് മുട്ടയിടാറുണ്ട്. കയറ്റുമതിയില്‍ ഭൂരിഭാഗവും കടല്‍ച്ചെമ്മീനാണ്. പുഴകളിലും തോടുകളിലും ചെമ്മീന്‍കെട്ടുകളിലും വളരുന്ന ചെമ്മീനിന് കടലാമയുമായി ബന്ധമില്ലെങ്കിലും അതിന്റെ കയറ്റുമതിക്കും വിലക്കുണ്ട്.

590കി.മീറ്ററുള്ള കേരളത്തിന്റെ തീരപ്രദേശം കടലാമകളുടെ ആവാസകേന്ദ്രമാണ്. കടലാമ സംരക്ഷണത്തിന് കേരളത്തില്‍ പരിചരണകേന്ദ്രങ്ങള്‍ സ്ഥാപിക്കുമെന്ന് കേന്ദ്രബഡ്ജറ്റില്‍ പ്രഖ്യാപിച്ചിരുന്നു. കടലാമ സംരക്ഷണത്തിനുള്ള മാര്‍ഗരേഖയും സര്‍ക്കാര്‍ പുറത്തിറക്കി.

മാര്‍ഗനിര്‍ദ്ദേശങ്ങള്‍

ബീച്ചുകളിലും പ്രജനനമേഖലകളിലും നിത്യേന പട്രോളിംഗും ക്യാമ്പുകളുമുണ്ടാവും

ആവാസവ്യവസ്ഥകളില്‍ മനുഷ്യരുടെ കടന്നുകയറ്റം തടയും

ആമകള്‍ക്ക് ആഹാരം നല്‍കുന്നതും നിയന്ത്രിക്കും

ആമപിടിത്തക്കാര്‍ക്കെതിരെ ശക്തമായ നടപടിയെടുക്കും

ആവാസവ്യവസ്ഥ സൃഷ്ടിച്ച് കടലാമകളെ വളര്‍ത്താനും കൂടുണ്ടാക്കാനും മത്സ്യത്തൊഴിലാളികളെയടക്കം പ്രേരിപ്പിക്കും

കടലാമകളുടെ പ്രാധാന്യത്തെക്കുറിച്ച് ബോധവത്കരണം നടത്തും

ബീച്ചുകളിലേക്കുള്ള കൃത്രിമ വിളക്കുകള്‍ കുറയ്ക്കും

കടലിലേക്കുള്ള മാലിന്യനിക്ഷേപം തടയാന്‍ ദേശീയഅന്തര്‍ദ്ദേശീയ നിയമം നടപ്പാക്കും

4 മണിക്കൂര്‍, 350 മുട്ടകള്‍!

1)ചരിവുള്ള തീരപ്രദേശത്ത് മണലില്‍ ഒരടിയോളം താഴ്ചയില്‍ കുഴിയെടുത്താണ് കടലാമകള്‍ മുട്ടയിടുന്നത്. ഒരെണ്ണം 350 മുട്ട വരെയിടും. ഇതിന് 4 മണിക്കൂറെടുക്കും. മുട്ടയിട്ടശേഷം കുഴി മണ്ണിട്ടുമൂടി ആമകള്‍ കടലിലേക്ക് പോവും. വിരിയാന്‍ 50-55 ദിവസങ്ങളെടുക്കും. കുഞ്ഞുങ്ങളും കടലിലേക്ക് പോവും.

2)ആയിരക്കണക്കിന് കിലോമീറ്റര്‍ കടലിലൂടെ സഞ്ചരിച്ചാണ് മുട്ടയിടാനെത്തുന്നത്. കേരളത്തില്‍ ഡിസംബര്‍ മുതല്‍ മാര്‍ച്ച് വരെ മിക്ക തീരത്തുമെത്തും. പെണ്ണാമകള്‍ താന്‍ പിറന്ന തീരം തേടിയെത്തി മുട്ടയിടുമെന്നാണ് വിശ്വാസം. ആയുസ് 100വര്‍ഷം. 20 വയസോടെ മുട്ടയിട്ടു തുടങ്ങും.