ബംഗളൂരു അമൃതഹള്ളിയില്‍ പത്തൊന്‍പതുകാരിയെ വില്ലയില്‍ എത്തിച്ച് കൂട്ടബലാത്സംഗത്തിനിരയാക്കിയ കേസില്‍ രാഷ്ട്രീയ നേതാവിന്റെ മകന്‍ ഉള്‍പ്പെടെ അഞ്ച് പേരെ പോലീസ് അറസ്റ്റ് ചെയ്തു. നബില്‍, ഡിക്‌സണ്‍, അനിരുദ്ധ, മോഹിത്, അവന്‍ എന്നിവരാണ് പിടിയിലായത്. ഇതില്‍ അനിരുദ്ധ് ദാവന്‍ഗരെ കൗണ്‍സിലറുടെ മകനാണ്. ഒരു ഐപിഎസ് ഉദ്യോഗസ്ഥന്റെ ഉടമസ്ഥതയിലുള്ള വില്ലയിലാണ് ക്രൂരമായ സംഭവം അരങ്ങേറിയത്.

ഇന്‍സ്റ്റഗ്രാം വഴി സൗഹൃദം സ്ഥാപിച്ചാണ് പ്രതികള്‍ പെണ്‍കുട്ടിയെ വലയിലാക്കിയത്. പാര്‍ട്ടി ആഘോഷിക്കാനെന്ന വ്യാജേന പെണ്‍കുട്ടിയെ വില്ലയില്‍ എത്തിക്കുകയായിരുന്നു. അവിടെ വെച്ച് നിര്‍ബന്ധപൂര്‍വ്വം ലഹരി ഗുളികകള്‍ നല്‍കി അബോധാവസ്ഥയിലാക്കിയ ശേഷം രണ്ടുപേര്‍ ചേര്‍ന്ന് തന്നെ ലൈംഗികമായി പീഡിപ്പിച്ചുവെന്നാണ് പെണ്‍കുട്ടിയുടെ പരാതി. പീഡനത്തിന് ശേഷം മോഹിത്തിന്റെ കാറില്‍ കയറ്റി പെണ്‍കുട്ടിയെ ലുലു മാളിന് സമീപം ഉപേക്ഷിക്കുകയായിരുന്നു.

ഈ കേസില്‍ പോലീസ് അന്വേഷണം ഊര്‍ജ്ജിതമാക്കിയതോടെ സമാനമായ രീതിയില്‍ തട്ടിപ്പിനിരയായ 19 ഓളം പെണ്‍കുട്ടികള്‍ കൂടി പരാതിയുമായി രംഗത്തെത്തിയിട്ടുണ്ട്. നഗരത്തിലെ പ്രമുഖ കോളേജുകളിലെ വിദ്യാര്‍ത്ഥിനികളെ ലക്ഷ്യമിട്ടാണ് സംഘം പ്രവര്‍ത്തിച്ചിരുന്നത്. മോഡലിംഗ്, ഫോട്ടോഷൂട്ട്, പാര്‍ട്ടി എന്നിവയുടെ പേരില്‍ പെണ്‍കുട്ടികളെ ക്ഷണിക്കുന്നതാണ് ഇവരുടെ രീതി. ആദ്യം പബ്ബുകളിലും കഫെകളിലും വെച്ച് കണ്ട് വിശ്വാസം നേടിയെടുത്ത ശേഷം, പിന്നീട് വില്ലകളിലെത്തിച്ച് പീഡിപ്പിക്കുകയും ദൃശ്യങ്ങള്‍ പകര്‍ത്തി ഭീഷണിപ്പെടുത്തുകയും ചെയ്യുന്നത് ഈ സംഘത്തിന്റെ സ്ഥിരം രീതിയാണെന്ന് പോലീസ് കണ്ടെത്തി.

കേസിലെ പ്രധാന പ്രതിയായ അനിരുദ്ധാണ് പീഡനം നടന്ന വില്ല ബുക്ക് ചെയ്തതെന്ന് പോലീസ് സ്ഥിരീകരിച്ചു. കോണ്‍ട്രാക്ടര്‍ കൂടിയായ അനിരുദ്ധിനെ വിശദമായി ചോദ്യം ചെയ്ത ശേഷമാണ് അറസ്റ്റ് രേഖപ്പെടുത്തിയത്. സംഘത്തിലെ മറ്റ് അംഗങ്ങളായ ശ്രാവണ്‍, മോഹിത്ത് എന്നിവര്‍ക്കും കുറ്റകൃത്യത്തില്‍ പങ്കുണ്ടെന്ന് കണ്ടെത്തിയിട്ടുണ്ട്. പെണ്‍കുട്ടികളെ ഇത്തരത്തില്‍ വില്ലകളില്‍ എത്തിക്കുന്നതിനായി സംഘത്തലവന്‍ നിഖില്‍ മറ്റുള്ളവര്‍ക്ക് പണം നല്‍കിയിരുന്നതായും വിവരമുണ്ട്. നിലവില്‍ കേസില്‍ ഏഴ് പേരെ സാക്ഷികളായി ചേര്‍ത്തിട്ടുണ്ട്.