ടിവികെ അധ്യക്ഷനും നടനുമായ വിജയ്‌യുടെ തഞ്ചാവൂരിലെ റാലിക്കിടെ അപകടം. അപകടത്തില്‍ ആറുപേര്‍ക്ക് പരുക്കേറ്റു. ഇതില്‍ രണ്ട് പേര്‍ സ്ത്രീകളാണ്. വിജയ്‌യുടെ വാഹനത്തെ പിന്തുടരുന്നതിനിടെയാണ് അപകടമുണ്ടായത്. കരൂരിലെ റാലിക്കിടെയുണ്ടായ ആള്‍ക്കൂട്ട ദുരന്തത്തിന്റെ ഞെട്ടല്‍ മാറുന്നതിന് പിന്നാലെയാണ് ഇപ്പോള്‍ വീണ്ടും അപകടം ഉണ്ടായത്. അപകടത്തില്‍ പരുക്കേറ്റ എല്ലാവരെയും ആശുപത്രിയിലേക്ക് മാറ്റിയിട്ടുണ്ട്. ഒരാളുടെ നില ഗുരുതരമാണെന്നാണ് വിവരം.

തലയ്ക്ക് പരുക്കേറ്റ വിഘ്‌നേഷ് എന്ന യുവാവിന്റെ നിലയാണ് ഗുരുതരമായി തുടരുന്നത്. വിജയ്‌യുടെ വാഹനത്തെ പിന്തുടരാന്‍ ശ്രമിക്കുന്നതിനിടെയാണ് വാഹനങ്ങള്‍ അപകടത്തില്‍പ്പെട്ടത്. വിജയ്‌യുടെ കാറിനെ ഇരുചക്ര വാഹനങ്ങളിലാണ് ഇവര്‍ പിന്തുടര്‍ന്നത്. ഇതിനിടെ നിയന്ത്രണം വിടുകയും മറ്റു വാഹനങ്ങളില്‍ ഇടിക്കുകയായിരുന്നു എന്നാണ് പുറത്തു വരുന്ന റിപ്പോര്‍ട്ടുകള്‍. അപകടം നടന്നയുടന്‍ പരിക്കേറ്റവരെ അവിടെയുണ്ടായിരുന്നവര്‍ ആശുപത്രിയിലേക്ക് മാറ്റുകയായിരുന്നു എന്നും റിപ്പോര്‍ട്ടുകള്‍ പറയുന്നു.