സണ്ണിയുടെ മകള്‍ നിഷ 'ബൂ ബോക്‌സ്' എന്നൊരു ഉല്‍പ്പന്നം കണ്ടുപിടിച്ചിരുന്നു. 'ബൂ ബോക്‌സ്' എന്നത് ഒരു 2ഇന്‍1 ടിഷ്യൂ ഹോള്‍ഡറാണ്. ഇതില്‍ ചെറിയൊരു വേസ്റ്റ് ബിന്നും ഉള്‍പ്പെടുത്തിയിട്ടുണ്ട്. ടിഷ്യൂ എടുക്കാനും ഉപയോഗിച്ച ടിഷ്യൂ കളയാനും പ്രത്യേകം ബിന്‍ തിരയേണ്ട ആവശ്യമില്ലാത്ത രീതിയിലാണ് ഇത് രൂപകല്‍പ്പന ചെയ്തിരിക്കുന്നത്. അതിന് പേറ്റന്റ് നേടുകയും ചെയ്തിട്ടുണ്ട്.

മുംബൈയിലെ പൊടിപടലങ്ങള്‍ കാരണം പല കുട്ടികളെയും പോലെ നിഷയ്ക്കും അലര്‍ജിയുണ്ട്. ഉപയോഗിച്ച ടിഷ്യൂ അലക്ഷ്യമായി കിടക്കുന്നത് കണ്ട്, സണ്ണി അവളെ വഴക്കുപറയുമായിരുന്നു. ഒരുദിവസം വീട്ടില്‍ വന്ന സണ്ണി കണ്ടത്, ഒരു ഡിസ്‌പോസിബിള്‍ കപ്പ് ടിഷ്യൂ ബോക്‌സുമായി ടേപ്പ് ഉപയോഗിച്ച് നിഷ ഒട്ടിച്ചുവെച്ചിരിക്കുന്നതാണ്. അത് സണ്ണിക്ക് വളരെ രസകരമായി തോന്നി.

'അവള്‍ വളരെ ബുദ്ധിമതിയാണ്. അവള്‍ കണ്ടുപിടിച്ച ഒരു കാര്യം ഞാന്‍ കാണിച്ചുതരാം. അതിന് പേറ്റന്റ് എടുത്തിട്ടുണ്ട്. തുടക്കം മുതല്‍ ഒടുക്കം വരെ എല്ലാം അവളാണ് ചെയ്തത്' തന്റെ മകളെക്കുറിച്ച് സംസാരിക്കവേ സണ്ണി പറഞ്ഞു.

താന്‍ വീട്ടില്‍ പോയി എന്റെ കുട്ടികളെ ശകാരിക്കട്ടെയെന്നു ഫറ തമാശരൂപേണ ഇതിനോട് പ്രതികരിച്ചിരുന്നു. 'നിഷയ്ക്ക് പണം ലഭിക്കാന്‍ പോകുന്നതില്‍ ഇപ്പോള്‍ സഹോദരങ്ങള്‍ക്ക് അസൂയയാണ്. പത്തു വയസ്സുള്ളപ്പോഴേ അവള്‍ പണം സമ്പാദിക്കാന്‍ തുടങ്ങി,' സണ്ണി കൂട്ടിച്ചേര്‍ത്തു.

2017ല്‍ മഹാരാഷ്ട്രയിലെ ലാതൂരില്‍ നിന്നാണ് സണ്ണിയും ഭര്‍ത്താവ് ഡാനിയല്‍ വെബറും നിഷയെ ദത്തെടുത്തത്. പിന്നീട് വാടക ഗര്‍ഭപാത്രത്തിലൂടെ ഇവര്‍ക്ക് നോഹ, ആഷര്‍ എന്നീ ആണ്‍കുട്ടികള്‍ കൂടി ജനിച്ചു.